FA ELREN
8: Väabilt
WAUT BEDIET DAUT?
Elren, waut een goodet Väabilt sent, komen daut selfst no, waut see lieren. Biejlikj kjennen Elren nich velangen, daut äare Kjinja nich woaren Läajes vetalen, wan de Kjinja von de Elren hieren: “Saj, ekj sie nich tus”, wan doa wäa aune Däa es.
David sajcht: “Doa woat foaken jesajcht: ‘Doo daut, waut ekj saj, nich daut, waut ekj doo.’ Oba daut schauft nich soo bie Kjinja. Wiels dee venämen aules, waut wie sajen un doonen. Dee woaren daut fuaz en, wan wie dee waut lieren, waut wie selfst nich doonen. Un dee woaren ons daut uk sajen.”
WAUT DE SCHREFT SAJCHT: “Du prädichst aundre, daut see nich stälen sellen, un dan stälst selfst?” (Reema 2:21).
WUAROM ES DAUT WICHTICH?
Kjinja un mau rajcht de Jugentliche nämen mea Aufmoakj von äare Elren aus von irjent sestwäm, soogoa mea aus von äare Frind. Daut meent, daut jie Elren deejanje sent, waut an daut dolste lieren kjennen, waut rajcht es. Oba daut schauft bloos, wan jie daut uk selfst nokomen.
Nicole sajcht: “Wie kjennen waut noch soo foaken sajen un weeten eenjemol nich, aus de Kjinja toohorchen. Oba wan wie eemol nich daut doonen, waut wie sajen, dan halpen dee ons daut fuaz denkjen. Kjinja woaren aules en, waut wie doonen, mau rajcht, wan wie uk denkjen, daut nich.”
WAUT DE SCHREFT SAJCHT: “De Weisheit von bowen . . . heichelt nich” (Jakobus 3:17).
WAUT KAUN EENA DOONEN?
Denkj äwa daut no, waut du selfst deist. Waut vonne Sort Tietvedrief kjikjst du? Woo behaundelst du dienen Ehepoatna un june Kjinja? Waut vonne Frind hast du? Best du om aundre bekjemmat? Aulsoo, best du soon Mensch, aus du west haben, daut diene Kjinja sellen woaren?
Christine sajcht: “Ekj un mien Maun velangen von onse Kjinja nich waut, waut wie nich selfst nokomen.”
Stot june Fäla too. June Kjinja weeten aulmols aul, daut jie nich onen Fäla sent. Wan du dienen Ehepoatna ooda diene Kjinja om togoodhoolen frajchst, wan daut needich es, woascht du dee lieren, daut daut goot es, opprechtich to sennen un nich stolt sennen.
Robin sajcht: “Onse Kjinja fält daut to hieren, daut wie onse Fäla toostonen un om togoodhoolen froagen. Wan wie daut nich doonen, dan lieren dee bloos, äare Fäla unjare Dakj to hoolen.”
Wendell sajcht: “Wie Elren kjennen onse Kjinja daut dolste belieren. Un wie kjennen daut daut baste doonen derch ons Väabilt, wiels dee ons emma beoobachten, waut wie doonen. Dee lieren emma waut doavon, woo wie ons Läwen fieren.”
