Menschen, waut Veauntwuatunk äwanämen, sent opp to veloten. Dee komen eene Oppgow no un doonen daut uk enne Tiet.

Kjinja kjennen daut aul von sea junk lieren, Veauntwuatunk to äwanämen. Daut Buak Parenting Without Borders sajcht: “Kjinja von 15 Moonat sent aul emstaunt mettohalpen, un Kjinja, waut rom 18 Moonat sent, wellen bie aules methalpen, waut de Elren doonen . . . Opp väl Städen es daut soo, wan Kjinja ieescht fief bat säwen Joa sent, dan lieren de Elren dee, woo dee tus mettohalpen kjennen. Wan Kjinja uk noch mau junk sent, kjennen dee aul bie välet fein methalpen.”

Opp eenje Städen es daut soo, daut väl Jugentliche von tus gonen, oba wan daut ieescht schwoa woat, dan komen dee wada trigj no Hus. Daut es eenje Jugentliche passieet, wäajen de Elren dee kjeenmol jelieet haben, met Jelt omtogonen, de Husoabeit to doonen ooda met aundre Sachen veauntwuatlich omtogonen.

Doawäajen es daut goot, daut de Elren äare Kjinja nu aul lieren, Veauntwuatunk to äwanämen, daut dee sikj bie groot selfst weeten kjennen. Daut Buak How to Raise an Adult sajcht: “Jie wellen secha nich, daut june Kjinja bat 18 Joa gaunz von junt aufhenjich sent un dan dee gonen loten, daut dee sikj selfst weeten motten”.

Dee Oabeit oppjäwen.

BIBLISCHA GRUNTSAUZ: “Aule schwoare Oabeit brinjt vedeenst” (Spricha 14:23).

Kjliene Kjinja wellen äare Elren emma met aules halpen; dee jleichen daut. Soo, nuzt dise Jeläajenheit un jäft dee Oabeit, wuamet dee junt halpen kjennen.

Eenje Elren wellen daut nich, wäajen dee denkjen soo, wuarom de Kjinja tus noch Oabeit jäwen, wan dee jieda Dach aul een deel Schooloabeit kjrieen.

Oba Kjinja, waut tus halpen, komen enne School bäta wieda, wäajen dee daut lieren, de Oabeit to doonen, waut dee oppjejäft woat. Daut Buak Parenting Without Borders sajcht uk noch: “Wan wie onse Kjinja nich methalpen loten, wan dee noch junk sent un daut wellen, dan woaren dee aunfangen to denkjen, daut et nich wichtich es, aundre to halpen . . . Dee woaren dan uk denkjen, daut aundre aules fa an doonen motten.”

 Wan Kjinja tus aulsoo methalpen, lieren dee waut fa aundre to doonen enne Städ bloos fa sikj to strieden. Wan dee daut doonen, woaren dee späaren, daut see een wichtjet Poat enne Famielje sent, un dee woaren daut aus äare Veauntwuatunk seenen.

Halpt june Kjinja, daut dee de Veauntwuatunk fa äare Fäla selfst äwanämen.

BIBLISCHA GRUNTSAUZ: “Horch wan du Rot kjrichst un belieet woascht, daut du no däm kaust weis sennen” (Spricha 19:20).

Wan june Kjinja Fäla moaken, biejlikj wan dee waut veojjlekjt un waut beschädicht haben, waut eenen aundren sient es, dan prooft daut nich plietsch to hoolen. Kjinja kjennen de Veauntwuatunk opp sikj nämen, biejlikj sikj entschuldjen, un wan daut needich es, daut foadich moaken.

Wan Kjinja vestonen, daut see fa äare Fäla veauntwuatlich sent, dan woat dee daut halpen

• opprechtich to sennen un äare Fäla tootostonen

• nich de Schult opp aundre to schuwen

• nich proowen väatojäwen

• sikj to entschuldjen, wan daut fält