Waut eenje jleewen
De Hindus
jleewen, daut daut Lieden von daut kjemt, waut eena jedonen haft, entwäda en dit Läwen ooda en een aundret, waut eena verhäa haud. Een Mensch kaun doavon friekomen, emma wada jebuaren to woaren. Dee nanen daut “Mokscha”. Daut kaun een Mensch soo wiet kjrieen, wan dee sikj en siene Jedanken gaunz kaun von daut tietelje loosmoaken.
De Moslems
sajen, daut daut Lieden eene Strof es fa de Sind un uk toom onsen Gloowen aufproowen. Daut schwoare saul eenem denkjen halpen, “daut eena Gott fa aulet goode emma saul dankboa sennen un daut eena dee, waut daut fält, uthalpen saul”, sajcht de Dr. Sayyid Syeed, Präsident von de islamische Jesalschoft von Nuad-Amerika.
De Judengloowen
sajcht, daut daut Lieden von eenem sien Vehoolen kjemt. Eenje Juden lieren, daut de Doodes woaren oppstonen un dee, waut fa Dommheit lieden musten, woaren daut dan goot haben. Oppoat eene Grupp Juden (de kabbalistische) lieren, daut de Menschen wadajebuaren woaren un soo miere Jeläajenheiten haben, om äare Fäla oppem kloaren to brinjen.
De Buddhisten
jleewen, daut een Mensch emma wada jebuaren woat un en jieda Läwen lieden mott. Daut deit soo lang, bat de Mensch nich mea schlajchtet deit ooda denkjt ooda sikj wenscht. Wan eena Weisheit haft, goodet deit un siene Jedanken unja Kontroll haft, dan kjemt dee bat “Nirvana”. Daut es, wan aulet Lieden opphieet.
De Konfuzianisten
lieren, daut daut Lieden von “de Menschen äare Fäla un waut dee orrajcht doonen” kjemt, sajcht A Dictionary of Comparative Religion. Dee lieren, daut eena derch goodet doonen, jewesset Lieden kaun väabieejen, oba daut daut mieeschte von “Jeistawäsen häakjemt, wua Menschen nuscht jäajen doonen kjennen. Dee motten daut bloos soo aunnämen, aus daut kjemt”.
Eenje Velkja
jleewen, daut daut Lieden von Hakjsarie kjemt. Dee sajen, daut Hakjsen kjennen Jlekj brinjen ooda Schoden, oba daut eena daut kaun derch jewesse Sitten proowen auftohoolen. Dee jleewen, daut jewesse Wundaheela doa jäajen oabeiden kjennen, wan een Mensch wäajen Hakjsen krank woat.
De Christen
sajen, daut daut Lieden von de ieeschte beid Menschen kjemt, soo aus daut en daut Bibelbuak 1. Mose wiest. Oba väl Gruppen haben noch äare ieejne Meenunk doaräwa. Eenje Katoolsche sajen, daut eena derch eenem sien Lieden Gott een Opfa jäwen kaun. Un met daut froagen dee Gott, aus hee de Kjoakj säajnen kaun ooda eenen aundren erleesen kaun.
LIA NOCH MEA
Kjikj daut Video Es Gott daut endoont, waut von Gloowen wie haben? opp jw.org.
Veleicht jleichst du uk dit
WAUT SAJCHT DE SCHREFT ÄWA ...?
Fieren aule Gloowes no Gott?
De Schreft rät von twee Sachen, waut ons de Auntwuat dietlich moakt.
