Oba eenje haben uk jemoakjt, daut soone Kjinja, waut ellektroonische Sachen sea foaken brucken, . . .

• von äa Fon ooda Tablet aufhenjich woaren.

• em Internet domm to aundre sent ooda aundre to an.

• sikj em Internet schwiensche Bilda beseenen.

AUFHENJICH SENNEN

Eenje Sachen em Internet – soo aus Gäms – sent met Fliet soo jemoakt, daut dee eenem sea aufhenjich moaken. En daut Buak Reclaiming Conversation sajcht daut: “De Apps fa onse Fons sent uzhent soo jemoakt, daut wie lenja aum Fon bliewen.” Je lenja wie soone Apps brucken, wua foaken waut toom vekjeepen aunjeboden woat, je mea Jelt moaken se met ons.

TOOM NODENKJEN: Sent diene Kjinja sea aum Fon ooda aum Tablet aunjebakt? Woo kaust du dee halpen, äare Tiet bäta to brucken? (EFEESA 5:15-16).

SPOTT EM INTERNET

Eenje brucken em Internet hunjsche Wieed un jäwen nuscht om aundre äare Jefeelen rom. Soone kjennen sikj leichta domm haben äwa aundre ooda spotten.

Doa sent uk soone, waut daut Internet bloos brucken, fa äaren orrajchten Wunsch, daut see Oppmoakjsomkjeit kjrieen. Ooda wan eena sitt, daut se eenem wua nich hanjekroacht haben, kaun eena sikj schlajcht feelen ooda mau rajcht tosied jeschowen.

TOOM NODENKJEN: Stalen diene Kjinja sikj natieedlich opp em Internet? (Efeesa 4:31). Woo gonen dee doamet om, wan see sikj tosied jeschowen feelen?

SCHWIENSCHE BILDA

Em Internet komen onmoralische Sachen sea leicht opp. Internet-Filtasch kjennen halpen, oba bloos jewesset.

Schwiensche Bilda wajchschekjen ooda soone von aundre kjrieen nant sikj Sexting; un daut kaun jäajen daut Jesaz sennen. Doano woo daut Jesaz en eenem siene Jäajent es, kunn eena sea bestroft woaren, wan bie Sexting Kjinja met en sent (Kjinjapornografie).

TOOM NODENKJEN: Woo kaust du diene Kjinja halpen, äwa Internet nich schwiensche Bilda wajchtoschekjen ooda auntokjikjen? (EFEESA 5:3-4).

LIA DIENE KJINJA

Wan Kjinja daut uk sea leicht es, ellektroonische Sachen to brucken, fält dee doawäajen Help doamet. No daut Buak Indistractable no, es daut sea jefäadlich, Kjinja daut Internet brucken to loten, onen daut dee weeten, woo rajcht doamet omtogonen. “Eena wudd de Kjinja uk nich loten äwakopp em Puddel nenhupsen, onen daut dee schwamen kunnen.”

Kjikj, waut du wurscht jleichen to doonen, ooda schriew diene Iedeeen opp.

• Räd met diene Kjinja doaräwa, woo eena sikj em Internet oppstalen saul

• Halp diene Kjinja doamet omtogonen, wan dee sikj tosied jeschowen feelen

• Bruck Filtasch em Internet fa daut, wua daut mäajlich es

• See pinkjlich dien Kjint sien Fon no

• Sat eene Tiet, fa woo lang see daut jieda Dach brucken kjennen

• Lot diene Kjinja nich to Nacht Fons ooda Tablets bie sikj haben

• Habt nich ellektroonische Sachen bie junt, wan jie äten