Wan wie ons von soone Sort Menschen trigjtrakjen, wua wie nich goot äwa denkjen, dan woa wie noch eenen jratren Unjascheet moaken. Un wan wie ons bloos soone Frind sieekjen, waut soo sent aus wie, dan kjenn wie leicht denkjen, daut daut orrajcht es, wan doa wäa aundasch denkjt ooda waut aundret deit aus wie.

“Moakt june Hoaten wiet op” (2. KORINTA 6:13)

Waut meent daut? Met ons “Hoat” kaun hia jemeent sennen, woo wie äwa aundre denkjen. Wan wie bloos soone jleichen, waut soo sent aus wie, dan moak wie ons Hoat too. Doawäajen mott wie reed sennen, ons uk soone Frind to sieekjen, waut aundasch sent aus wie.

Wan wie aundre werkjlich kjanen lieren, dan kjenn wie vestonen, wuarom dee eenjet aundasch doonen aus wie. Un wan wie dee aunfangen mea to räakjnen, dan vejät wie doavon, daut dee aundasch sent. Wie jleichen dee dan emma dolla un kjennen emma bäta met dee metfeelen.

Nazaré wia ieeschtemma schlajcht äwa de Utlenda jesonnen. Woo kunn see sikj endren? See sajcht: “Ekj wia met dee toop un schauft uk met dee toop. Ekj lieed Menschen kjanen, waut goanich soo wieren, aus von dee jerät wort. Wan eena met soone Frind woat, waut von een gaunz aundret Launt sent, dan woat eena en, daut dee nich aula äwareen sent, un eena räakjent dee äare goode Sieden väl.”

Schauf doaropp, met soone to spazieren, waut von een aundret Launt ooda Volkj komen ooda waut eene aundre Sproak räden. Waut wurscht du doonen kjennen?

• Froag dee, woo see daut doa bie an haben.

• Lod dee mol en fa eene Moltiet.

• Horch dee goot too un kjikj doano, waut dee intressieet.

Wan du proofst to vestonen, waut dee aul beläft haben un waut daut aun dee jedonen haft, dan woascht du dee Sort Menschen secha mea räakjnen.