De Schreft haft äa Läwen veendat

WAUT holp eenen jungen Maun, Menschen to leewen un aundre to halpen, waut ieeschtemma goaschtrich wia, un daut nich jleicht, mank Menschen to sennen? Waut holp eenen Maun en Mexiko, daut hee nich mea een schwienschet Läwen fieed? Wuarom hieed eent von de baste Beisikjel-Reessa en Jaupaun opp met reessen, daut hee Gott jefaulen kunn? Well wie mol seenen, waut dise to sajen haben.

“Ekj wia een stolta un groffa Maun un wia nich leeftolich” (DENNIS O’BEIRNE)

WANEA JEBUAREN: 1958

VON WOON LAUNT: ENJLAUNT

WAUT EKJ EA WIA: EKJ WIA GOASCHTRICH UN JLEICHT DAUT NICH, MANK MENSCHEN TO SENNEN

MIENE VEGONENHEIT: Mien Voda siene Famielje wieren Irlenda un ekj woss aus een irlendscha Katolikj opp. Oba ekj must meist emma auleen no de Kjoakj gonen un ekj jleicht daut nich. Oba ekj intressieed mie doawäajen fa Gott. Ekj säd foaken daut Unser-Vater-Jebäd äwa. Mie denkj daut noch, wan ekj zeowes em Bad lieech un doaräwa nodocht, waut daut to bedieden haud. Ekj docht äwa jieda Sauz no.

Aus ekj en miene Jugentjoaren wia, jinkj ekj bie veschiedne Gruppen bie, waut jäajen de Rejierunk wieren. Ekj brukt Droggs un besonda Marihuana. Daut schmieekjt ekj meist jieda Dach. Ekj haud mie daut to Kopp jenomen: Ekj wudd endoontich sennen äwa aundre. Soo, ekj drunk sea, ekj sad mien ieejnet Läwen opp Spell un jeef mau weinich om aundre Menschen rom. Ekj jleicht daut nich, mank Menschen to sennen, un ekj räd uk schia kjeenmol met wäm. Buta wan daut fa mie waut wichtjet wia. Ekj jleicht daut uk nich, wan se mie opp Bilda muaken. Wan ekj nu trigjkjikj, dan kaun ekj seenen, daut ekj een stolta un groffa un nich leeftolja Mensch wia. Ekj wia bloos to miene goode Frind fein un leeftolich.

Aus ekj 20 Joa wia, intressieed ekj mie fa de Schreft. Een Frint, waut met Droggs schachren deed, haud em Jefenkjnis aunjefongen, de Bibel to läsen. Un wie vetalden dan lang äwa Jemeenten un Kjoakjen un waut de Soton enne Welt deit. Ekj koft mie eene Bibel un funk dee dan aun, fa mie selfst to studieren. Ekj un mie Frint läsden emma Poats enne Bibel un dan kjeem wie toop un räden doaräwa, waut wie jelieet hauden. Soo word wie ons dan eenich, waut daut to bedieden haud. Un dit deed wie dan fa miere Moonaten.

Dit sent eenje Sachen, wua wie ons äwa eenich worden von waut wie jeläst hauden: Daut wie enne latste Tiet läwen un daut Christen sullen de goode Norecht von daut Kjennichrikj prädjen. Dee sullen uk nich Poat sennen von dise Welt un sikj uk nich mank polietische Sachen menjen. Wie sagen uk, daut de Bibel ons Rot jeft, woo wie kjennen een opprechtjet Läwen fieren. Wie kunnen daut kloa seenen, daut de Bibel de Woarheit säd un daut doa must eene woare Jemeent sennen. Oba woone? Wie dochten äwa de groote, straume Kjoakjen no un äwa dee äare stolte Leidasch un äwa dee äare Aunjewanheiten un woo dee sikj mank de Politikj menjen deeden. Un wie sagen, daut Jesus nich soo aus daut wia. Wie wisten, daut Gott nich met dee Kjoakjen tofräd wia. Soo, wie worden ons eenich, dee Jemeenten to unjasieekjen, waut nich soo bekaunt wieren.

Wie räden dan met soone Menschen von dee Jemeenten un stalden dee een deel veschiedne Froagen. Wie wisten krakjt, waut de Schreft äwa dise Froagen säd. Soo, wan dee äare Auntwuaten nich met Gott sien Wuat stemden, dan wist wie daut fuaz. Nodäm daut wie met de Menschen jerät hauden, deed ekj emma to Gott bäden un säd: “Wan dee Menschen von dien Volkj sent un de Woarheit haben, dan brinj mie bat doa, daut mie daut wada jankat, met dee toop to sennen.” Oba nodäm daut wie miere Moonat hauden met veschiedne Menschen von veschiedne Jemeenten jerät, haud ekj noch kjeene Grupp jefungen, waut dise Froagen met de Schreft beauntwuat hauden. Un ekj haud uk kjeenen Janka, wada met dee toop to sennen.

Entlich kjeemen ekj un mien Frint met Jehova siene Zeijen enne Räd. Wie stalden dee deeselwje Froagen aus emma. Oba dee beauntwuaden ons dee met de Schreft. Waut dee säden, paust krakjt met daut toop, waut wie aul jelieet hauden. Soo, wie stalden dee uk noch aundre Froagen, wua wie enne Schreft noch nich de Auntwuaten fäa jefungen hauden soone aus: “Waut denkj Gott äwa schmieekjen un Droggs brucken?” Un dee jeewen ons wada de Auntwuaten ut de Schreft. Wie worden ons eenich, daut wie wudden no daut Toopkomen wanken em Vesaumlungshus.

Bie de Toopkomes wia mie daut sea schwoa, wäajen ekj daut nich jleicht, mank Menschen to sennen. Mie wia daut schwoa, daut dee mie aula kjeemen soo frintlich bejreessen un sikj aula soo schmock aunjetrocken hauden. Ekj vetrud dee nich un wull nich mea no de Toopkomes wanken. Oba soo aus emma bäd ekj to Gott, daut hee mie sull eenen Janka jäwen, daut ekj wada wull met dee Menschen toop sennen, wan dee dän woaren Gloowen hauden. Un ekj haud een grootet Velangen, met de Zeijen toop de Schreft to studieren.

WOO MIEN LÄWEN SIKJ DERCH DE SCHREFT JEENDAT HAFT: Ekj wist daut, daut ekj must opphieren met Droggs brucken, un daut wia mie uk gaunz leicht. Oba mie wia daut sea schwoa, opptohieren met schmieekjen. Ekj proowd mieremol, oba ekj kunn daut nich. Un aus ekj daut hieed, woo aundre daut bloos hauden kunt wajchschmieten un kjeenmol mea jeschmieekjt hauden, räd ekj met Jehova äwa daut. Un no daut, met Jehova siene Help, kunn ekj opphieren met schmieekjen. Ekj haud daut jelieet, woo needich daut es, äwa aules un gaunz frie to Jehova to bäden.

Un noch eenatlei, waut sea wichtich wia to endren, wia, woo ekj mie auntrock un woo ekj miene Hoa haud. Bie mien ieeschtet Toopkomen em Vesaumlungshus haud ekj miene Hoa met miere Spetzen jlikj no Hecht jekjamt un met eene kloa bleiwe Striep soo aus een Peihon. Lota foawd ekj miene Hoa noch kloa rootjäl. Ekj haud Leiwentbekjsen aun un eenen ladanen Wanikj met väl jeschräwnet. No miene Meenunk no durf ekj mie nich endren, uk wan de Zeijen gaunz frintlich met mie doaräwa räden deeden. Schlieslich docht ekj oba äwa 1. Johanes 2:15-17 (PB) no: “Siet nich hinjaraun no daut waut de Welt auntobeeden haft. Wäa de Welt un äare Lost jieren haft, en däm es nich de Leew vom Voda.” Ekj wort en, daut doaderch, woo ekj mie auntrock un woo ekj miene Hoa haud, wees ekj Leew fa dise Welt. Un wan ekj wull fa Gott Leew wiesen, dan must ekj daut endren. Un dan deed ekj daut.

Met de Tiet wort ekj en, daut et nich bloos de Zeijen wieren, waut daut wullen haben, daut ekj sull no de Toopkomes komen. Hebräa 10:24-25 wees mie, daut et waut wia, waut Gott wull haben, waut ekj doonen sull. Nodäm daut ekj aunfunk, no de Toopkomes to wanken, lieed ekj de Menschen doa fein kjanen. Un ekj wort mie eenich, mie Jehova hantojäwen un mie deepen to loten.

WOO MIE DAUT TOGOOD KJEEM: Mie jeit daut sea to Hoaten, daut wie kjennen goode Frind met Jehova sennen. Sien Metjefeel un siene Leew haft mie bat doa jebrocht, daut ekj am un sienen Sän, Jesus Christus, en mien Läwen nodoonen well (1. Petrus 2:21). Ekj hab jelieet, daut wan ekj no eene christelje Perseenlichkjeit sträwen doo, dan kaun ekj doawäajen noch mie selfst sennen. Ekj hab sea doafäa jeschauft, daut ekj kunn een leeftolja Mensch sennen. Ekj proow, miene Fru un onsen Sän soo to behaundlen, aus Christus daut wudd. Un ekj leew miene Gloowesbreeda un -Sestren sea. Christus nodoonen, haft mie bat doa jebrocht, daut ekj fa mie selfst Respakjt hab un daut ekj aundre Leew wiesen kaun.

“Ekj wort fein behaundelt” (GUADALUPE VILLARREAL)

WANEA JEBUAREN: 1964

VON WOON LAUNT: MEXIKO

WAUT EKJ EA WIA: EKJ FIEED EEN SCHWIENSCHET LÄWEN

MIENE VEGONENHEIT: Ekj wia eent von säwen Kjinja. Ekj woss en Hermosillo, Sonora, Mexiko, opp en eene sea oame Jäajent. Miene Pape storf, aus ekj een kjliena Jung wia. Soo, miene Mame must sea schwoa schaufen toom fa ons sorjen. Wie hauden nich Jelt toom Schoo kjeepen un ekj jinkj meist emma bloos boaft. Von junk aun funk ekj aun to schaufen toom miene Famielje met Jelt halpen. Soo aus meist aule Famieljes wond wie uk en een kjlienet Hus.

Meist dän gaunzen Dach äwa wia wie Kjinja bloos auleen, wäajens miene Mame must meist emma schaufen. Aus ekj 6 Joa wia, wort ekj mesbrukt von eenen 15-joaschen Jung. Dit passieed fa eene lange Tiet. Doawäajen docht ekj, daut et gaunz jeweenlich wia, daut ekj Mana jleicht. Wan ekj no Help socht bie de Doktasch ooda Prädjasch, dan säden dee bloos, daut doa nuscht met orrajcht wia. Dee säden, daut et gaunz jeweenlich wia, woo ekj mie feeld.

Aus ekj 14 Joa wia, wort ekj mie eenich, mie soo auntotrakjen un soo hantostalen, aus een Homoseksuella. Soo wia ekj dan fa 11 Joa un ekj läwd dan met veschiedne Mana toop. Met de Tiet leet ekj mie utlieren toom Hoa aufschnieden un ekj haud mien ieejnet Jeschaft un deed aundre Hoa aufschnieden. Oba ekj wia werkjlich nich schaftich. Mie jinkj daut foaken nich scheen un ekj feeld mie sea aunjeschmäat. Un mie späad sikj daut soo, daut et nich rajcht wia, waut ekj deed. Ekj docht bie mie soo: “Sent doa noch goode Menschen, waut eena vetruen kaun?”

Ekj docht aun miene Sesta. See funk aun, de Bibel to studieren met Jehova siene Zeijen toop. Un met de Tiet leet see sikj deepen. See vetald mie daut, waut see jelieet haud, oba ekj horcht doa nuscht no. Un doch kunn ekj seenen, daut see een scheenet Läwen un eene feine Ehe haud. Un ekj kunn uk seenen, daut see un äa Maun sikj werkjlich leewden un sikj unjarenaunda respakjten. Dee behaundelden sikj sea leeftolich. Met de Tiet funk eent von Jehova siene Zeijen uk aun, met mie de Bibel to studieren. Ieeschtlich jleicht ekj daut nich sea to studieren, oba dan lota endad sikj daut.

WOO MIEN LÄWEN SIKJ DERCH DE SCHREFT JEENDAT HAFT: De Zeijen looden mie en, no een Toopkomen to komen. Un ekj wankt doahan. Daut wia waut gaunz nieet fa mie. Jeweenlich lachten de Menschen mie leicht ut, oba de Zeijen deeden nich. Dee neemen mie leeftolich opp un behaundelden mie sea fein. Ekj kunn daut schia nich jleewen.

Aus ekj opp mienen ieeschten Kongress wia, jinkj mie daut noch dolla to Hoaten, woo Jehova siene Zeijen wieren. Ekj kunn daut seenen, daut nich bloos miene Sesta soo leeftolich wia, oba dee wieren aula soo. Dee leewden sikj unjarenaunda opp iernst. Ekj docht doaräwa no, aus dit eene Grupp goode Menschen wia, wua opp to vetruen jinkj, un wua ekj aul lang no jesocht haud. Ekj wundad mie sea äwa dee äare Eenichkjeit un woo dee de Bibel brukten toom jieda Froag beauntwuaten. Ekj wort en, daut et wäajen de Bibel wia, daut daut soone goode Menschen wieren. Un ekj kunn daut uk seenen, daut ekj mien Läwen wudd motten sea endren, wan ekj wull eent von dee woaren.

Ekj must aules en mien Läwen endren, wäajens ekj soo läwen deed, aus wan ekj eene Fru wia. Ekj must daut endren, woo ekj räden deed, woo ekj mie oppstald un bewäajd. Ekj must miene Kjleedie un miene Hoa endren un mie uk aundre Frind sieekjen. Miene väaje Frind fungen aun, äwa mie to spotten un säden: “Wuarom deist du dit? Daut wia gaunz goot, soo aus du ea wieescht. Doo nich de Bibel studieren. Du hast aules, waut die fält.” Waut mie daut schwanste wia to endren, wia mien schwienschet Läwen, daut ekj met Mana deed.

Oba ekj wist daut, daut et mäajlich wia wäajen daut, waut de Schreft en 1. Korinta 6:9-11 (PB) sajcht. Daut jinkj mie sea to Hoaten. Dee Varsch sajcht: “Weet jie nich, daut de ojjerajchte daut Gottesrikj nich oawen woaren? Lot junt nuscht enbillen! Menschen, dee Onzucht driewen, dee Jetta aunbäden, dee de Ehe bräakjen, Mana dee met Junges ooda met aundre Mana jeschlajchtlich toopkomen . . . woaren daut Gottesrikj nich oawen. Un soone sent eenje von junt jewast. Oba nu sent jie rein jewoschen.” Jehova haft aundre ieeschtemma jeholpen, Endrungen to moaken, un hee haft mie uk jeholpen. Daut dieed miere Joa un daut wia uk nich leicht, oba de Help un Leew, waut de Zeijen mie jeewen, haft mie sea jeholpen.

WOO MIE DAUT TOGOOD KJEEM: Nu fia ekj een opprechtjet Läwen. Ekj sie befriet un ekj un miene Fru lieren onsen Sän no de biblische Gruntsauzen no to läwen. Ekj läw nich mea soo aus ea, ekj sie nu een gooda Frint met Jehova un ekj sie froo, daut ekj am deenen kaun. Ekj sie een Eltesta enne Vesaumlunk un ekj hab aul kunt aundre halpen, de Woarheit to lieren von Gott sien Wuat. De Endrungen, waut ekj muak, muaken miene Mame soo schaftich, daut see uk aunfunk, de Bibel to studieren, un nu haft see sikj uk aul deepen loten. Miene jinjre Sesta, waut ea uk haud een schwienschet Läwen jefieet, es nu uk eent von Jehova siene Zeijen.

Mau rajcht eenje von dee, waut mie von ieeschtemma kjanden, kjennen daut seenen, daut ekj mie jeendat hab un nu een bätret Läwen fia. Ekj weet uk, waut mie jeholpen haft, mien Läwen to endren. Ea fruach ekj Doktasch no Help, oba ekj kjrieech nich gooden Rot, oba Jehova haft mie opp iernst jeholpen. Wan ekj mie uk nuscht wieet feeld, trock Jehova mie no am un behaundeld mie met Leew un Jedult. Daut soon besondra, weisa, leeftolja Gott sikj wudd om mie kjemren, jeef mie de Krauft, mien Läwen to endren.

“Ekj feeld mie ontofräd, ladich un auleen.” (KAZUHIRO KUNIMOCHI)

WANEA JEBUAREN: 1951

VON WOON LAUNT: JAUPAUN

WAUT EKJ EA WIA: BEISIKJEL-REESSA

MIENE VEGONENHEIT: Ekj woss en eene ruje Staut opp. Dee Staut heet Shizuoka Prefecture en Jaupaun, wua onse Famielje von acht Menschen en een kjlienet Hus wond. Mien Voda haud een Beisikjel-Stua, wua se uk deeden Beisikjels repäaren. Von kjlien aun neem mien Voda mie met no soone Städen, wua se met Beisikjels reessen deeden un daut funk mie dan sea aun to intressieren. Mien Voda plond dan, woo ekj kunn een Reessa woaren. Aus ekj noch enne School wia, funk ekj aun, sea to eewen. Aus ekj dan ieescht enne Huachschool wia, jewonn ekj dree Joa hinjarenaunda eenen nazionalen Rees. Ekj kjrieech een Aunjebott, no de Uniwersität to gonen, oba enne Städ daut, wort ekj mie eenich, no eene School to gonen, wua ekj mie kunn utlieren loten toom reessen. Aus ekj dan ieescht 19 Joa wia, haud ekj mie utjelieet toom een gooda Reessa sennen.

Ekj wull de basta Beisikjel-Reessa woaren en Jaupaun. Ekj wull een deel Jelt vedeenen, daut ekj miene Famielje kunn een sechret un een tofrädnet Läwen jäwen. Ekj jeef mie gaunz han toom eewen un wan daut eewen un reessen mol irjentwanea to schwoa wort, docht ekj emma wada soo: “Ekj sie jebuaren toom Beisikjel reessen un ekj mott bloos opp irjenteene Wajch wieda”, un ekj deed uk. Un schlieslich funk sikj daut aun to betolen. Daut ieeschte Joa jewonn ekj dän Rees von aul de niee Reessa. Un daut tweede Joa kunn ekj dan bie dän Rees metmoaken, wua sikj daut utwiesen wudd, wäa en Jaupaun de basta Reessa sennen wudd. Sas Mol wia ekj daut tweede von daut väaschte en disen Rees.

Ekj deed emma wieda reessen un ekj kunn uk foaken jewennen. Un de Menschen fungen mie aun, de stoakje Been von Tokai to nanen; daut es eene Städ en Jaupaun. Ekj wia sea opp jewennen! Un met de Tiet hauden aundre Reessa Angst fa mie, wäajens ekj soo hunjsch reessen deed. Ekj vedeend emma mea Jelt un ekj wort en, ekj kunn mie daut kjeepen, waut mie jankad. Ekj koft mie een Hus met eene Ekserseis-Stow doa bennen un met de baste Ekserseis-Maschienen. Ekj koft mie uk eene diere Koa un dee kost meist soo väl aus een Hus. Daut ekj mie mien Jelt kunn secha sennen, koft ekj mea Hiesa un lied uk de Bank un groote Jeschafta mien Jelt opp Entras.

Oba ekj feeld mie dan noch ontofräd, ladich un auleen. To dee Tiet haud ekj mie aul befriet un haud dree Kjinja. Oba ekj wia foaken nich jeduldich met miene Famielje. Ekj wort sea leicht doll äwa miene Fru un Kjinja bloos wäajens Kjlienichkjeiten. Dee wieren emma nerwees rom mie un kjikjten, aus ekj met eenst wada wudd doll sennen.

Met de Tiet funk miene Fru aun, de Bibel to studieren met Jehova siene Zeijen. Un doaderch funk ons Läwen sikj aun, sea to endren. See säd, see wull no de Toopkomes von Jehova siene Zeijen wanken. Soo, ekj wort mie eenich, wie wudden aus gaunze Famielje doa hanwanken. Mie denkjt daut noch von dän Owent, aus mie een Eltesta fond un met mie aunfunk, de Bibel to studieren. Waut ekj lieed, jinkj mie sea to Hoaten.

WOO MIEN LÄWEN SIKJ DERCH DE SCHREFT JEENDAT HAFT: Ekj woa daut kjeenmol vejäten, woo sea mie daut to Hoaten jinkj, aus ekj Efeesa 5:5 (PB) läsd, wua daut sajcht: “Wäa sikj met Huararie aufjeft ooda jiezich [ooda bejierich] es, waut Jettadeenst es, soone Menschen haben kjeenen Aundeel aun Christus un aun Gott sien Rikj.” Ekj kunn seenen, daut Beisikjel reessen soo es, aus opp Jelt spälen un daut dis Sport eenem bejierich moaken deed. Mien Jewessen funk mie aun to baudren. Mie späad sikj daut soo, wan ekj wull Jehova Gott jefaulen, dan wudd ekj motten opphieren met reessen. Oba daut wia eene sea schwoare Entscheidunk fa mie.

Daut wia jroz mien bastet Joa toom reessen, un mie jankad noch lenja. Oba toom wieda reessen, must ekj sea opp jewennen sennen. Ekj wort en, de Bibel studieren, muak mie soo ruich un tofräd, daut mie nich mol jankad to reessen. Nodäm daut ekj aunjefongen haud to studieren, deed ekj bloos noch dree Mol reessen. Oba ekj kunn noch emma nich gaunz von reessen vejäten. Ekj wist sest nich, woo ekj sull fa miene Famielje sorjen, un doawäajen feeld ekj mie soo, daut ekj aune Enj wia. Ekj kjeem nich wieda en miene Oabeit, oba uk nich met mien Bibel studieren. Un mien Frintschoft funk mie daut uk aun, schwoa to moaken wäajen mienen nieen Gloowen un mien Voda wia sea ontofräd met mie. Ekj wist mie nich mea rot, ekj haud soo väl Sorjen un kjrieech doaderch mau rajcht Moagen-Trubbel.

Waut mie en dise schwoare Tiet holp, wia, daut ekj wieda de Bibel studieed un no de Toopkomes von Jehova siene Zeijen wankt. Soo bie sacht wort mien Gloowen stoakja. Ekj prachad Jehova, daut hee no miene Jebäda horchen sull un daut hee mie halpen sull to seenen, woo hee dee auntwuaten deed. Un aus miene Fru to mie säd, daut ar goanich soon grootet Hus fäld toom schaftich sennen, dan haud ekj nich mea soo väl Sorjen. Un soo bie sacht kjeem ekj en de Woarheit wieda.

WOO MIE DAUT TOGOOD KJEEM: Ekj hab jelieet, daut Jesus siene Wieed en Matäus 6:33 (PB) werkjlich soo sent. Hee sajcht: “Oba sieekjt daut ieeschte no Gott sien Rikj un no siene Jerajchtichkjeit. Dan woa jie daut aundre uk aula kjrieen.” Ons haft daut noch newers aun daut “aundre” jefält, wua Jesus von räd. Wie haben noch emma daut needichste jehaut toom läwen. Wan miene Ennom nu uk väl weinja es aus dan, aus ekj een Reessa wia, haben ekj un miene Famielje de latste 20 Joa emma aules jehaut, waut ons fält.

Nu hab ekj soone Freid un Tofrädenheit aus noch kjeenmol ea, wäajen ekj Jehova deen met de Breeda un Sestren toop. De Doag vegonen soo bosich, wan eena siene Tiet fa Jehova brukt. Onse Famielje jeit daut nu uk väl bäta. Onse dree Junges un äare Frues deenen uk aula tru Jehova.