4. Kjeene Leew enne Famielje

“Menschen woaren . . . sikj nich goot sennen” (2. TIMOTÄUS 3:1-3, PB).

● Chris halpt soone Menschen en Nuad-Wales, waut se tus Jewault aundoonen. Hee sajcht: “Mie denkjt noch von eene Fru, waut soo vekjielt wia, daut ekj dee nich mol mea kjand. Aundre Frues wieren met äare Jefeelen soo velazt, daut dee bloos noch raufkjikjten.”

WAUT TO BEOOBACHTEN ES: En een afrikaunischet Launt wort ojjefäa jieda dredde Fru aus Kjint jeschlajchtlich mesbrukt. Bie eene Befroagunk en dautselwje Launt fungen se rut, daut äwa een Dreddel von de Mana dochten, daut doa nuscht met orrajcht wia, wan dee äare Fru schluagen. Daut sent oba nich bloos Frues, waut tus hunjsch behaundelt woaren. Biejlikj en Kanada sent meist 3 von 10 Mana von äare Fru jeschloagen worden ooda sestwoo von dee meshaundelt.

WAUT EENJE SAJEN: Soont haft daut aul emma jejäft, daut Menschen tus meshaundelt woaren. Vondoag dän Dach woat doa bloos dolla von jerät aus ieeschtemma.

ES DAUT SOO, AUS DEE SAJEN? Daut es soo, daut enne latste Joaren emma foakna von Jewault enne Famielje jerät woat. Oba es daut doaderch bäta jeworden? Nä, daut es nich. Enne Famieljes woat emma weinja Leew jewäsen.

WAUT JLEEFST DU? Erfelt sikj 2. Timotäus 3:1-3 vondoag dän Dach? Es daut soo, daut de Famieljes nich dee Leew haben, waut dee wudden sellen haben?

De fefte Profezeiunk, waut sikj ver onse Uagen erfelt, haft met de Menschen äa Tus, de Ieed, to doonen. See mol, waut de Schreft doaräwa sajcht.

[Takjst]

“Jewault enne Famielje es eent von dee Vebräakjen, waut daut weinichste em Jesaz aunjemalt woaren. Jeweenlich woat eene Fru 35 Mol von äaren Maun aunjejräpen, ea see de Poliezen daut sajcht.” (EENE FRU EN WALES, WAUT DOA SCHAUFT, WUA MENSCHEN HANFONEN KJENNEN, WAUT TUS MESHAUNDELT WOAREN)