De Schreft haft äa Läwen veendat

WAUT holp eenen Maun, waut foaken deed opp Jelt spälen un stälen, doavon loostokomen un sien Läwen to endren? Läs, waut hee doatoo sajcht.

“Ekj jeef mie väl met Pieetsrees auf” (RICHARD STEWART)

WANEA JEBUAREN: 1965

VON WOON LAUNT: JAMAIKA

WAUT EKJ EA WIA: EKJ DEED OPP JELT SPÄLEN UN STÄLEN

MIENE VEGONENHEIT: Ekj woss en eene oame Städ en Kingston opp, de Hauptstaut von Jamaika. Väle hauden doa kjeene Oabeit un daut wia doa uk sea jefäadlich. Doa wieren een deel Baunden un de Menschen hauden sea Angst wäajen daut. Meist jieda Dach kunn wie hieren, woo dee scheeten deeden.

Onse Mame schauft sea toom fa mie un mienen jinjren Brooda un miene Sesta sorjen. See sach doano, daut wie kunnen no eene goode School gonen. Ekj jleicht no de School gonen nuscht, oba ekj jeef mie väl met Pieetsrees auf. Enne Städ no de School gonen, jinkj ekj foaken doa han, wua se deeden met Pieed reessen. Ekj deed mau rajcht met de Pieed ritren.

Boolt deed ekj aunfangen, bie de Pieetsrees to waden un doa een deel Jelt nentostäakjen. Ekj haud een sea schwienschet Läwen un jeef mie met een deel Frues auf. Ekj funk aun, Marihuana to schmieekjen un deed uk stälen, soo daut ekj kunn fa aul dit betolen. Ekj haud een deel Rewolwasch un ekj wia bie väl Stälarie met en, oba ekj sie sea dankboa, daut doa kjeenmol wort wäm dootjemoakt.

Opp eemol kjrieejen de Poliezen mie to hoolen un stopten mie em Jefenkjnis fa aul daut, waut ekj jedonen haud. Aus ekj ieescht rutkjeem, dan läwd ekj krakjt soo wieda aus ieescht. Ekj wort mau rajcht noch oaja aus ea. Wan mie uk nich jefäadlich leet, wia ekj oba leicht doll un ekj wia uk sea hunjsch met aundre un ekj deed emma, waut mie jankad. Ekj docht bloos aun mie.

WOO MIEN LÄWEN SIKJ DERCH DE SCHREFT JEENDAT HAFT: En dise Tiet, aus ekj soon schlajchtet Läwen fieed, funk miene Mame aun, de Bibel to studieren un wort eent von Jehova siene Zeijen. Ekj wort en, daut miene Mame een bätra Mensch wort un daut muak mie sea nieschierich. Ekj docht soo, ekj wull utfinjen, wuarom miene Mame sikj deed endren un doawäajen funk ekj aun, met Jehova siene Zeijen äwa de Bibel to räden.

Ekj wort en, daut daut, waut Jehova siene Zeijen mie lieeden, aundasch wia aus daut von aundre Jemeenten. Un daut dee aules, waut dee lieeden, oppe Schreft stetten. Daut wia de eensje Grupp, waut ekj kjand, waut deeden von Hus to Hus prädjen, soo aus de ieeschte Christen (Matäus 28:19; Aposteljeschicht 20:20). Ekj wia mie secha, daut ekj haud dän rajchten Gloowen jefungen, wäajens ekj seenen kunn, daut dee opp iernst Leew hauden mank an (Johanes 13:35).

Von daut, waut ekj von de Bibel lieed, kunn ekj seenen, daut ekj must een deel endren en mien Läwen. Ekj lieed, daut Jehova Huararie nuscht nich jleicht un wan ekj am wull froo moaken, dan must ekj väl endren (2. Korinta 7:1; Hebräa 13:4). Aus ekj enwort, daut daut, woo ekj läwd, Jehova kunn froo ooda truarich moaken, jinkj mie daut to Hoaten (Spricha 27:11). Ekj wort mie eenich, daut ekj wull opphieren met Marihuana to schmieekjen un ekj jeef uk miene Rewolwasch opp un ekj proowd, een bätra Mensch to sennen. Waut mie daut schwanste wia, wia opptohieren, een schwienschet Läwen to haben un uk opp Jelt to spälen.

Ieeschtlich wull ekj daut nich haben, daut miene Frind daut sullen enwoaren, daut ekj met Jehova siene Zeijen deed studieren. Oba daut endad sikj, aus ekj Matäus 10:33 (PB) läsd, wua Jesus säd: “Wäa mie ver de Menschen velicht, dän woa ekj uk ver mien Voda em Himmel velieejen.” Dis Varsch holp mie, miene Frind daut to sajen, daut ekj met Jehova siene Zeijen studieed. Oba dee kunnen daut nich jleewen. Dee musten sikj sea wundren, daut soon Mensch aus ekj, wudd wellen een Christ woaren. Oba ekj säd to miene Frind, daut ekj nuscht nich mea wull met soon Läwen to doonen haben, aus ekj ieeschtemma haud.

WOO MIE DAUT TOGOOD KJEEM: Miene Mame wia sea froo aus see sach, daut ekj aunfunk, no de Bibel no to läwen. Nu brukt see sikj nich mea sorjen, daut ekj wudd irjentwaut schlajchtet doonen. Wie feelen ons nu sea vebungen, wiels wie beid Jehova leewen. Ekj kjikj eenjemol trigj un ekj kaun daut meist nich jleewen, daut ekj met Jehova siene Help hab kunt mien Läwen endren. Ekj sie nich mea no daut schwiensche Läwen un no daut Jelt hinjaraun, waut ekj ieescht haud.

Wan ekj nich jehorcht haud, waut de Schreft sajcht, dan wudd ekj vondoag dän Dach veleicht doot ooda em Jefenkjnis sennen. Nu hab ekj uk eene sea scheene Famielje un wie sent schaftich. Daut jeft mie eene sea groote Freid, daut ekj kaun Jehova deenen, met miene Fru, waut mie sea unjastett, un met onse feine Dochta toop. Ekj sie Jehova sea dankboa, daut hee mie lat eent von siene Deena sennen. Ekj sie uk sea dankboa, daut sikj wäa haft de Tiet jenomen toom mie de Woarheit von de Bibel lieren. Un ekj sie froo, daut ekj uk kaun aundre halpen, von de Bibel to lieren. Ekj sie Jehova besonda dankboa, daut hee mie lat sien Frint sennen.

[Takjst]

“Ekj wort en, daut daut, woo ekj läwd, Jehova kunn froo ooda truarich moaken”

[Bilt]

Met miene Fru un Dochta toop

[Bilt]

Ekj wort en, daut miene Mame een bätra Mensch wort