Daut Evangelium von Gott sien Rikj woat jeprädicht woaren
Daut Evangelium von Gott sien Rikj woat jeprädicht woaren
“Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (MATÄUS 24:14, PB)
Waut daut meent: De Evangeliumsschriewa Lukas säd, daut Jesus “derch aul äare Städa un Darpa jinkj un prädijd daut Evangelium vom Gottesrikj” (Lukas 8:1, PB). Jesus säd selfst: “Ekj mott . . . daut Evangelium von Gott sien Rikj . . . prädjen; wiels daut es wuatoo ekj jeschekjt sie” (Lukas 4:43, PB). Jesus schekjt siene Jinja ut, daut see de goode Norecht sullen en de Städa un en de Darpa prädjen. Un lota säd hee to an: “Jie woaren miene Zeijen sennen . . . äwa de gaunze Welt” (Aposteljeschicht 1:8, PB; Lukas 10:1).
Woo de ieeschte Christen daut nokjeemen: Jesus siene Jinja deeden daut fuaz, waut Jesus an säd. “See jinjen aule Dach nom Tempel un uk von Hus to Hus, to lieren un prädjen äwa daut Evangelium von Jesus Christus” (Aposteljeschicht 5:42, PB). Aule von de Vesaumlunk deeden prädjen, nich bloos eene kjliene besondre Grupp. De Jeschichtsforscha Neander säd: “Celsus wia de ieeschta Schriewa, waut sikj domm haud äwa de Christen, wäajen daut Schoomoaka wieren un met Woll un met Lada schauften un von de eefachste Menschen wieren, waut flietich daut Evangelium prädijden.” Jean Bernardi schreef en sien Buak: “De Christen sullen aulawäajen un aulem prädjen. Oppe Gaussen, enne Städa, oppe Parks un bie de Hiesa, endoont aus se dee oppneemen ooda nich. … Äwa de gaunze Welt” (The Early Centuries of the Church).
Wäa kjemt daut vondoag dän Dach no? De anglikanischa Priesta David Watson säd, daut een Grunt, wuarom de Menschen soo weinich Intressaunt haben aun Gott sien Wuat, es, wäajen de Kjoakjen oppjehieet haben met Gott sien Wuat lieren un prädjen. José Luis Pérez Guadalupe schreef en sien Buak von daut Woakj von de Evangelisten, de Adventisten un aundre un säd, daut “dee nich von Hus to Hus gonen”. Oba von Jehova siene Zeijen schreef hee: “Dee gonen ordentlich un räajelmässich von Hus to Hus.” (Why Are the Catholics Leaving?)
Un Jonathan Turley säd waut intressauntet un waut werkjlich soo es. Hee säd: “Wan doa irjentwäa von Jehova siene Zeijen rät, dan denkjen de mieeschte Menschen fuaz aun dee, waut bie äa Hus to eene onpaussende Tiet prädjen. Fa Jehova siene Zeijen es prädjen von Däa to Däa nich bloos toom äaren Gloowen vebreeden.” Hee säd, daut et fa dee sea wichtich wia (Cato Supreme Court Review, 2001-2002).
[Kausten]
Kaust du daut Tieekjen von de woare Christen seenen?
Wäa, denkjst du, sent de woare Christen, no daut no, waut wie ut de Schreft jelieet haben? Daut es soo, daut jeft dusende Jemeenten un Gruppen, waut sajen, daut see Christen sent, oba wie motten daut nich vejäten, waut Jesus säd: “Dee woaren nich aula en daut Himmelrikj komen, dee to mie: Har, Har! sajen. Doa komen bloos dee nenn, dee doa doonen, waut mien Voda em Himmel haben well” (Matäus 7:21, PB). Wan du daut enwoascht, wäa dän Voda sienen Wellen deit un die dan met dee toopsteist, dan woascht du kjennen fa emma unja Gott sien Kjennichrikj läwen. Du kaust wellich Jehova siene Zeijen, waut die dit Buak jebrocht haben, äwa Gott sien Kjennichrikj froagen un äwa de Säajnungen, waut daut brinjen woat (Lukas 4:43).