Habt Leew unjarenaunda

“Ekj jäw junt een nieet Jeboot, jie sellen junt unjarenaunda goot sennen, krakjt soo aus ekj junt goot jewast sie. June Leew fa eenaunda saul jrod soo groot sennen, aus meine Leew fa junt. Wan jie Leew unjarenaunda haben, woat aulemaun seenen, daut jie miene Jinja sent” (JOHANES 13:34-35, PB)

Waut daut meent: Christus säd to siene Nofolja, daut see sikj sullen unjarenaunda leewen, krakjt soo aus hee an jeleeft haud. Woo wees hee siene Leew? Jesus wia aundasch aus de Menschen to siene Tiet. Hee muak kjeenen Unjascheet un leewd aule Menschen (Johanes 4:7-10). Ut Leew brukt Jesus siene Tiet un Krauft un wia mau rajcht reed, selfst waut opptojäwen toom aundre halpen (Markus 6:30-34). Un waut wia sien jratsta Bewies von Leew? Jesus säd: “Ekj sie de gooda Hoad. De gooda Hoad jeft sien Läwen fa de Schop” (Johanes 10:11, PB).

Woo de ieeschte Christen daut nokjeemen: De ieeschte Christen nanden sikj unjarenaunda “Brooda” un “Sesta” (Filemon 1-2, PB). Menschen von aule Velkja wort en de Christenvesaumlunk oppjenomen, wäajen see säden: “Doa es kjeen Unjascheet tweschen Juden un Griechen, wiels deeselwja Har es Har äwa aule” (Reema 10:11-12, PB). No Pinjsten aune 33 n. Chr. sajcht daut von de Jinja en Jerusalem: “See vekoften äa Hab un Goot un vedeelden daut mank sikj, doano aus een jiedrem daut fäld.” Na woosoo? Om daut dee, waut sikj jroz hauden deepen loten, kunnen en Jerusalem bliewen un “bestendich en de Apostel äare Lia” bliewen (Aposteljeschicht 2:41-45, PB). Wuarom intressieeden dee sikj soo sea fa äare Gloowesbreeda? Weinja aus 200 Joa no de Apostel äaren Doot schreef Tertullian, waut aundre von de Christen säden: “Dee leewen sikj unjarenaunda . . . un dee sent mau rajcht reed, eena fa dän aundren to stoawen.”

Wäa kjemt daut vondoag dän Dach no? Daut Buak The History of the Decline and Fall of the Roman Empire (1837) sajcht, daut dee, waut sajen, daut see Christen sent, haben sikj unjarenaunda mea toojesat un sikj mea Lieden veuasoakt aus aundre Menschen an aunjedonen haben. Enne Stäts haben se utjeforscht, daut väle, waut sikj Christen nanen, eenen Unjascheet moaken mank de Menschen, wäajen dee von eene aundre Sort Menschen sent. Mau rajcht soone, waut to eene Jemeent jehieren, haben foaken nuscht met Menschen von äare ieejne Jemeent to doonen, waut en een aundret Launt wonen. Un daut moakt daut schwoa, daut dee sikj omzajcht halpen kjennen un dee talen daut veleicht uk nich mol fa needich.

Aune 2004 jinjen en Florida enne Stäts benna twee Moonat vea Uarkauns äwa. Dee Mensch, waut aunjestalt wia toom en dee Jäajent uthalpen, sach doano, daut aule de Help kjrieejen, waut dee fäld. Hee säd, daut doa kjeene aundre Grupp wia, waut aules soo ordentlich jedonen kjrieech, aus Jehova siene Zeijen. Un hee boot uk aun, irjent Help towäajtoschaufen, waut an fäld. Un ea mol aune 1997 hauden Jehova siene Zeijen Menschen no de Demokratische Republikj, Kongo, jeschekjt toom uthalpen. Dee hauden uk Medizien, Äten un Kjleeda doa hanjeschekjt toom äare christelje Breeda un aundre uthalpen, waut daut fäld. Dee äare Gloowesbreeda von Europa hauden soo väl jeschekjt, waut eene Million stätsche Dola em Wieet wia.