Ekj woss en Warialda opp, en eene kjliene Staut en New-South-Wales. En dee Jäajent jeft daut een deel Schop un Vee un doa woat uk jeakat. Daut es eene reine Staut un de Menschen kjennen doa ernoa en Fräd läwen.

Wäajen ekj de elsta wia von tieen Kjinja, funk ekj aun to schaufen, aus ekj noch mau 13 Joa wia toom halpen, fa de Famielje to sorjen. Un wäajens ekj sea weinich wia no de School jegonen, schauft ekj oppem Foarm. Aus ekj 15 wia, deed ekj Pieed enlieren.

Oppem Foarm schaufen, haud siene goode Sied uk siene schlajchte Sied. Ekj jleicht de Oabeit sea un uk de Jäajent doa, un zeowes saut ekj aum Fia un kjikjt no de Mon un de Stierns. Un eena kunn uk de scheene Loft rikjen von de Stap. Ekj weet noch, daut ekj doaräwa jrebbeld, wäa aul daut schmocke jemoakt haud. Daut schlajchte wia, daut ekj doa uk mank soone wia, daut nich een feinet Läwen fieeden. Ekj hieed aundre foaken flieekjen un de Zegoaren wieren doa uk sea riew. Soo, boolt wort schmieekjen un flieekjen uk Poat von mien Läwen.

Aus ekj 18 Joa wia, trock ekj no Sydney. Ekj proowd en de Armee nentokomen, oba wäajen ekj mau wia soo weinich no de School jegonen, kunn ekj nich. Ekj funk dan eene Oabeit un bleef doa en Sydney fa een Joa. Daut wia en dise, aus ekj daut ieeschte Mol met Jehova siene Zeijen räd. Dee kroagden mie no eent von äare Toopkomes un ekj jinkj doa uk han. Un fuaz wort ekj daut en, daut dee doa de Woarheit lieeden.

Een Stootje lota wort ekj mie eenich, daut ekj wull trigj no eene Stap trakjen. Un dan wond ekj en Goondiwindi, Queensland. Doa funk ekj eene Oabeit un befried mie. Daut schode wia, daut ekj doa aunfunk to supen.

Ekj un miene Fru hauden twee Kjinja. Nodäm daut onse Junges jebuaren wieren, funk ekj sea aun to denkjen, wua daut met mien Läwen hanjinkj. Dan docht ekj doaraun, waut ekj en de Toopkomes von Jehova siene Zeijen en Sydney jelieet haud, un ekj wort mie eenich, waut to doonen.

Ekj funk eenen oolen Woaktorm, waut eene Adrass haud von daut Betel von Jehova siene Zeijen en Australien. Dan schreef ekj eenen Breef doahan un fruach no Help. Dan kjeem een leeftolja Zeij un besocht mie. Un dan boolt funk dee aun met mie de Bibel to studieren.

Aus ekj de Bibel studieed, wort ekj en, daut ekj mien Läwen sea must endren. Een Bibelvarsch, waut mie besonda halpen deed, wia 2. Korinta 7:1 (PB). Dis Varsch rot ons too, daut wie ons “von aules reinjen waut Kjarpa un Jeist besudelt”.

Ekj muak de Entscheidunk, daut ekj wull opphieren met schmieekjen un supen. Oba daut wia nich leicht fa mie, wiels ekj haud aul fa soo väl Joaren dee Jewanheit jehaut. Oba ekj wia mie eenich, daut ekj wull soo läwen, daut Gott daut jefaulen wudd. Waut mie daut mieeschte halpen deed, wia dän Gruntsauz notokomen, waut en Reema 12:2 (PB) es. Daut sajcht: “Stalt junt nich soo han aus dise Welt deit. Jie sellen derch june niee Jesennunk veendat woaren”. Ekj wist daut, wan ekj wull miene Jewanheiten endren, dan wudd ekj uk motten miene Jedanken endren un ekj must miene Jewanheiten soo seenen, aus Gott deit – aus waut schlajchtet. Dan met Gott siene Help kunn ekj opphieren met schmieekjen un supen.

Daut schwanste fa mie wia, proowen opptohieren met flieekjen. Ekj wist daut, waut de Bibel säd en Efeesa 4:29 (PB). Doa sajcht daut: “Rät nuscht, waut dän näakjsten schoden kaun.” Oba ekj kunn nich opphieren met flieekjen. Waut mie halpen deed, wia doaräwa notodenkjen, waut Jesaja 40:26 (PB) sajcht. Daut rät doa von de Stierns. Daut sajcht: “Kjikjt emol zeowes no de Stierns. Wäa haft dee jemoakt? Hee leit dee eent nom aundren rut, – [hee] weet wooväl doa sent – un roopt dee jieda biem Nomen. Daut es wäajen Gott siene groote Krauft, daut nienich eent von dee fält.” Ekj docht doaraun: “Wan Gott de Krauft haud, aul dit to moaken, wua ekj sea jleicht no to kjikjen, dan wudd hee uk kjennen mie de Krauft jäwen, daut ekj mie kunn endren, soo daut ekj am kunn jefaulen.” Ekj deed sea väl bäden un ekj strenjd mie aun. Met de Tiet kunn ekj dan opphieren met miene schwiensche.

Aus ekj met Pieed schauft, wieren doa nich sea väl Menschen opp dän Foarm. Un doawäajen räd ekj meist kjeenmol met Menschen. Oba en de Toopkomes von Jehova siene Zeijen lieed ekj daut, woo ekj räden must. Ekj hab doa uk jelieet, woo ekj to aundre von de goode Norecht von Gott sien Kjennichrikj räden kaun (Matäus 6:9-10; 24:14).

Fa miere Joaren hab ekj aul kunt aus een Eltesta enne Vesaumlunk deenen. Un daut es eene sea groote Iea fa mie, daut ekj miene Gloowesbreeda met irjentwaut kaun halpen.

Ekj sie Jehova sea dankboa, daut ekj hab kunt von am lieren, wan ekj uk mau weinich School jehaut hab (Jesaja 54:13). Ekj hab daut selfst beläft, waut Spricha 10:22 (PB) sajcht: “Gott sien Säajen moakt eenem rikj”.