Aus ekj kjlien wia, wond wie en Leipzig, Oost-Dietschlaunt, nich wiet auf von de tschechische un poolnische Jrens. Un aus ekj sas Joa wia, must wie wäajen mienen Voda siene Oabeit wajchtrakjen, ieescht no Brasilien un dan no Ekuador.

Aus ekj 14 Joa wia, schekjten se mie no Dietschlaunt no eene School, wua ekj uk wond, wäajen miene Elren wiet auf en Sied-Amerika wonden. Ekj must mie gaunz selfst om mie kjemren un doawäajen vetrud ekj bloos opp mie selfst. Ekj jeef doa nuscht om rom, waut aundre von mie dochten.

Aus ekj 17 Joa wia, trocken miene Elren wada trigj no Dietschlaunt, un dan wond ekj wada tus. Oba wäajen ekj soo ekjich jeworden wia, wia daut schwoa fa mie, mie met miene Famielje tooptowanen. Un dan, aus ekj 18 Joa wia, veleet ekj von tus.

Ekj wort sea ontofräd un socht no een bätret Läwen. Aus ekj dan ieescht miere Gruppen un Organisazionen unjasocht haud, wort ekj mie eenich, daut et fa mie daut baste wia, wan ekj mie de schmocke Welt beseenen deed, ea de Menschen dee gaunz venicht hauden.

Ekj koft mie eenen Mootasikjel un veleet Dietschlaunt un juach no Afrika. Een Stootje no daut must ekj oba wada trigj no Europa foaren toom mienen Mootasikjel repäaren. Een bät lota wia ekj dan en Portugal biem Mäa. Dan wort ekj mie eenich, mienen Mootasikjel doa to loten un dan metem Boot romtoreisen.

Ekj stunt mie met eene Grupp junge Menschen toop toom äwa daut Atlantik-Mäa reisen. Un doa troff ekj dan Laurie, waut lota miene Fru wort. De ieeschte Reis wia no de Karibik-Inslen un dan bleew wie een Stootje en Puerto Rico un von doa reisd wie trigj no Europa. Wie sochten no een Boot, waut wie ons soo enrechten kunnen, daut doa bowen to wonen jinkj. Aus wie dan fa dree Moonat jesocht hauden, wia dee Plon haustich to Enj. Ekj must en Dietschlaunt nom Millitäadeenst.

Ekj wia 15 Moonat mank de dietschlendsche Soldoten oppem Mäa. En de Tweschentiet hauden ekj un Laurie ons dan aul befriet un muaken uk reed toom wieda romreisen, soo aus wie ieescht jeplont hauden. Jroz ea ekj em Millitäadeenst wia, haud wie ons aul een natet Boot jekoft. Un dee Tiet, aus ekj dan em Millitäadeenst wia, haud wie daut soo bie sacht aul to een Säajelboot jemoakt. Ons Plon wia, oppem Boot to wonen un wieda romtoreisen. Nodäm daut ekj met mienen Millitäadeenst derch wia, oba noch ea wie ons Boot foadich hauden, kjeem wie met Jehova siene Zeijen enne Räd un fungen aun, de Bibel to studieren.

Ekj docht nich, daut ekj waut aun mien Läwen endren must. Ekj wia befriet met dee Fru, waut ekj toop wond, un ekj haud aul oppjehieet met schmieekjen (Efeesa 5:5). Un wie dochten soo, onse Plons, en de Welt romtoreisen un Gott siene schmocke Schepfunk to beseenen, wia eene goode Wajch, ons Läwen to brucken.

Oba en Werkjlichkjeit must ekj noch waut endren, besonda aun miene Natua. Ekj wia too brow un vetrud too sea opp mie selfst. Ekj docht wunda von daut, waut ekj aules vestunt un kunn. En mien Läwen dreid sikj aules bloos om mie.

Eenen Dach läsd ekj Jesus siene bekaunde Boajchprädicht (Matäus, Kapitel 5-7). Ieeschtlich kunn ekj daut nich vestonen, wua Jesus von räd, waut een scheenet Läwen es. Hee säd biejlikj, daut deejanje Freid haben, waut hungat un darscht (Matäus 5:6). Ekj docht soo, wan eena nich mol daut needichste em Läwen haud, woo eena dan kunn schaftich sennen. Aus ekj wieda studieed, wort ekj en, daut ons daut aula aun jeisteljet fäld. Oba daut wie daut kjrieen kjennen, mott wie daut deemootich enseenen. Daut es soo aus Jesus säd: “Jlekjlich sent dee, dee sikj doaräwa em kloaren sent, daut an daut jeistelje fält” (Matäus 5:3, NW).

Nodäm daut wie ons Bibelstudium en Dietschlaunt aunjefongen hauden, trock wie no Frankreich un lota dan no Italien. Krakjt endoont wua wie hanreisden, wie sagen doa Jehova siene Zeijen. Ekj wia sea vewundat äwa dee äare woare Leew, waut dee unjarenaunda hauden, un dee äare Eenheit. Ekj sach, daut Jehova siene Zeijen werkjlich Gloowesbreeda äware gaunze Welt wieren (Johanes 13:34-35). Met de Tiet leeten ekj un Laurie ons dan uk aus Jehova siene Zeijen deepen.

No miene Doop must ekj noch wieda aun miene Natua schaufen. Wie worden ons eenich, wada met een Boot to reisen gaunz delenjd daut afrikaunische Mäa un dan äwa daut atlantische Mäa no de Stäts. Doa enne Medd oppem Mäa wieren bloos wie beid opp een kjlienet Boot. Rom ons wia dusende Miel bloos Wota. Dan wort mie daut kloa, woo kjlien ekj mau wia, jäajen ons groota Schepfa Jehova. Doa enne Medd oppem Mäa haud wie nich väl to doonen un doawäajen haud ekj een deel Tiet toom de Schreft läsen. Waut ekj sea jleicht, wia, aus ekj von Jesus sien Läwen oppe Ieed läsd. Jesus wia onen Fäla, hee vestunt sikj met soo väl, waut eena sikj nich mol denkjen kaun un doch docht hee nienich wunda von sikj selfst. En sien Läwen dreid sikj daut nich bloos om am, oba om sienen himlischen Voda.

Aus ekj äwa Jesus sien Läwen nodocht, wort ekj en, daut ekj Gott sien Kjennichrikj aune ieeschte Städ stalen must, enne Städ bloos daut doonen, waut mie jankad (Matäus 6:33). Aus wie dan bie de Stäts aunkjeemen, word wie ons eenich, daut wie nu doa wonen wudden toom Jehova deenen.

Ea, aus ekj soo ekjich enjestalt wia, wia doa foaken waut, wua ekj nich neiw wist, waut ekj soo rajcht doonen sull. Oba nu hab ekj daut jefungen, waut mie emma halpt, daut rajchte to doonen (Jesaja 48:17-18). Nu hab ekj uk een tofrädnet Läwen, waut ekj nienich ea jehaut hab. Nu kaun ekj Gott deenen un aundre halpen, mea von am to lieren.

Nu, daut wie biblische Gruntsauzen en ons Läwen brucken, hab wie onse Ehe kunt sea stoakjen. Wie haben uk eene sea feine Dochta, waut Jehova haft kjanen jelieet un dän uk sea leeft.

De Reis en ons Läwen es nich emma jlei jewast. Oba met Jehova siene Help woa wie kjeenmol oppjäwen un nich opphieren, opp am to vetruen (Spricha 3:5-6).