DE JEFOA: Väl Rejierungsmana un Gloowesleidasch deeden Sachen, waut de Schreft nich fa goot tald. Dee brukten foaken äare Macht toom de Menschen doavon aufhoolen, eene Bibel to haben, dee auftoschriewen ooda dee to äwasaten. See wie mol een poa Biespels:

• Äwa 150 Joa ver Christus wull een Kjennich, waut Antiochus Epifanes heet, de Juden proowen to bemotten, dän griechischen Gloowen auntonämen. Om daut to volbrinjen, velangd hee, daut aule Aufschreften von de Hebräische Schreften sullen venicht woaren. De Jeschichtsforscha Heinrich Graetz säd, daut dän Kjennich siene Deena aule Aufschreften von de Hebräische Schreften, waut see fungen, venichten deeden un uk deejanje dootmuaken, waut dee läsen wullen.

• Rom 800 Joa trigj musten eenje katoolsche Gloowesleidasch sikj oajren äwa de jeweenelje Menschen von äare Kjoakj. Wuarom? Wiels dee aundre daut lieeden, waut de Schreft säd, enne Städ daut, waut enne katoolsche Kjoakj jelieet wort. Wan een Mensch irjenteen Poat von de Bibel haud, dan wort dee aus ontru jetalt. Bloos de Psalmen kunnen dee opp Latiensch haben. Bie een Kjoakjen-Toopkomen säden de Gloowesleidasch to äare aunjestalde Mana, daut dee aule Hiesa un Kjalasch sullen jescheit derchsieekjen, wua see jleewden, daut de Menschen kunnen Poats von de Bibel vestäakjen. Daut Hus, wua see eenen Ontruen fungen, sull venicht woaren.

Wan de Jäajna de Schreft hauden kunt venichten, dan wudd daut de Norecht von de Schreft nu uk nich mea jäwen.

WOO DE SCHREFT BESCHIZT BLEEF: De Kjennich Antiochus wull aule Aufschreften en Israel venichten, oba väl Juden läwden to dee Tiet aul nich mea en Israel. Jelieede sajen, daut väl Juden en Jesus siene Tiet aul butakaunt Israel wonden. De Juden deeden en äare Judenschoolen Aufschreften von de Bibel oppbewoaren. Un krakjt dee worden lota uk von de Christen jebrukt (Aposteljeschicht 15:21).

Rom 800 Joa trigj deeden dee, waut de Schreft leewden, dee wieda äwasaten un aufschriewen, wan see uk vefolcht worden. Soo bie 500 Joa trigj, noch ea se aunfungen de Bibel to drekjen, hauden se dee aul oppet weinichste opp 33 Sproaken äwasat un met de Haunt aufjeschräwen. No daut wort dee dan soo bosich äwasat un jemoakt aus noch kjeenmol ea.

WOO DAUT UTKJEEM: Wan majchtje Kjennichs un Gloowesleidasch uk haben prooft, de Schreft to venichten, es dee nu doch noch emma to haben. Un dee es opp wiet mea Sproaken äwasat worden aus irjenteen aundret Buak. De Schreft haft väl aun de Jesazen un aun de Sproaken von miere Lenda jedonen un haft uk millionende Menschen äa Läwen veendat.