Aune 1949 veleet mien Voda Dietschlaunt un trock no Australien. Hee kjeem doa han toom no Oabeit sieekjen un hee trock no de Prowins Victoria. Doa befried hee sikj met miene Mame un ekj wort aune 1953 jebuaren.

Mau een poa Joa lota funk miene Mame aun, met Jehova siene Zeijen toop de Schreft to studieren. Mie denkjt daut noch, daut ekj von kjlien aun lieed, waut de Schreft sajcht. Oba mien Voda wia gaunz jäajen Gloowessachen. Hee wort doll un hunjsch un miene Mame fercht sikj sea fa dän. See deed de Schreft plietsch wiedastudieren un see jleicht daut sea, waut see lieed. Wan onse Pape nich tus wia, dan vetald see uk mie un miene Sesta von daut, waut see von de Schreft lieed. See vetald ons doavon, daut de Ieed noch mol wudd een Paradies sennen un daut wie kjennen schaftich sennen, wan wie daut nokomen, waut de Schreft sajcht (Psalm 37:10, 29; Jesaja 48:17).

Aus ekj 18 Joa wia veleet ekj von tus, wäajens mien Voda emma soo hunjsch wia. Ekj jleewd daut, waut onse Mame ons von de Schreft jelieet haud, oba ekj docht nich, daut daut sea wichtich wia. Un doawäajen kjeem ekj daut uk nich no, waut de Schreft sajcht. Ekj funk aun, en eene Kolen-Mienen to schaufen un ekj kjemmad mie doa om de ellektrische Sachen. Aus ekj 20 Joa oolt wia, befried ekj mie. Dree Joa lota kjrieej wie onse ieeschte Mejal. Un dan funk ekj wada aun, doaräwa notodenkjen, waut en mien Läwen werkjlich wichtich wia. Ekj wist goot, daut de Schreft onse Famielje halpen kunn un doawäajen funk ekj aun, met eent von Jehova siene Zeijen toop de Schreft to studieren. Oba miene Fru jleicht de Zeijen nuscht. Aus ekj eemol bie eent von dee äare Toopkomes wia, säd see lota to mie, ekj sull mie entscheiden: ekj sull opphieren met de Schreft studieren ooda ekj sull de Famielje veloten. Ekj wist kjeenen aundren Rot un doawäajen kjeem ekj nich mea met Jehova siene Zeijen toop. Lota wort mie daut oba sea schod, daut ekj met daut oppjehieet haud, waut ekj wist, daut daut daut rajchte wia.

Eenen Dach weesen miene Oabeitspoatna mie schwiensche Bilda. Ekj jleicht daut, oba to deeselwje Tiet äakjelt mie daut uk un ekj feeld mie schuldich. Ekj docht trigj aun daut, waut ekj von de Schreft jelieet haud un ekj docht soo, daut Gott mie strofen wudd. Oba wiels ekj wiedamuak met schwiensche Bilda kjikjen, wort ekj met de Tiet endoontich doaräwa. Un ekj wort mau rajcht aufhenjich doavon.

Fa de näakjste 20 Joa wort daut emma oaja un ekj kjeem emma wieda auf von daut, waut miene Mame mie ea jelieet haud. Wäajens aul daut schwiensche, waut ekj mie aunkjikjen deed, deed ekj mie uk sea schlajcht oppstalen. Ekj haud schwiensche Räd un ekj deed uk sposen äwa schwiensche Sachen. Un ekj funk uk aun, orrajcht äwa Sex to denkjen. Wan ekj uk noch met miene Fru toopläwd, haud ekj oba met aundre Frues Sex. Eenen Dach kjikjt ekj em Spieejel nenn un docht soo: “Ekj jleich die nich!”. Ekj kunn mie selfst sea schlajcht lieden.

Miene Fru un ekj leeten ons scheeden un met mien Läwen jinkj daut bloos boajauf. Oba dan bäd ekj sea iernstlich to Jehova. Ekj funk wada aun, de Schreft to studieren, wan nu uk aul 20 Joa vegonen wieren. Mien Voda wia em tweschen aul jestorwen un miene Mame haud sikj aus eent von Jehova siene Zeijen deepen loten.

Soon Läwen, aus ekj fieed, wia gaunz aundasch aus daut, waut de Schreft lieet. Oba ekj wia mie gaunz eenich jeworden, daut ekj dän ennalichen Fräd wull haben, waut de Schreft vesprakjt. Ekj strenjd mie sea aun, nich mea soone schwiensche Räd to haben un uk, daut ekj nich emma fuaz doll wort. Ekj must uk met mien schwienschet Läwen opphieren, un ekj wort mie uk eenich, daut ekj nich mea wull opp Jelt spälen, mie nich mea wull besupen un uk nich mea von mienen Wieet stälen.

Miene Oabeitspoatna kunnen daut goanich vestonen, wuarom ekj aul dit en mien Läwen endren wull. Fa dree Joa deeden dee mie dän Tiet äwa nerkjen, daut ekj wada soo sull woaren aus ieescht. Un wan ekj een Mol trigjlept un met eenst doll wort ooda een schlajchtet Wuat säd, dan freiden dee sikj un schrieejen: “Ha! De Joe von ieeschtemma es trigj.” Un wan see daut säden, feeld ekj mie sea schlajcht. Ekj docht, ekj wudd mie kjeenmol kjennen endren.

Bie mie oppe Oabeit kunn eena schia aulawäajen soone schwiensche Bilda bejäajnen. Miene Oabeitspoatna schekjten sikj dee eena dän aundren derchem Komputa, soo aus ekj ieeschtemma uk deed. Ekj wia mie gaunz eenich jeworden, doavon loostokomen, oba miene Oabeitspoatna proowden emma wada, mie mettorieten un schwiensche Bilda to kjikjen. Ekj fruach dän Brooda, waut met mie toop de Schreft studieed, no Help. Mie fäld daut uk aun Moot. Ekj schedd mie to dän ut un hee horcht jeduldich too. Hee wees mie jewesse Varzhen von de Schreft, waut mie halpen kunnen, von daut loostokomen. Un hee säd uk to mie, ekj sull emma un emma wada to Jehova bäden un am no Help froagen (Psalm 119:37).

Eenen Dach kroagd ekj aul miene Oabeitspoatna toop. Aus dee ieescht aula doa wieren, säd ekj, see sullen twee Mana von onse Grupp een Bea jäwen. Oba wiels aula wisten, daut dise beid Mana Supa wieren, wieren aula doajäajen un säden: “Soont kaust du nich doonen! Dise Mana proowen, von daut loostokomen, dee sent aufhenjich!” Un ekj säd: “Jo, krakjt soo aus ekj.” Von dan aun, kunnen dee vestonen, daut ekj proowd, von schwiensche Bilda to kjikjen loostokomen, un dee leeten mie toch.

Met de Tiet un met väl Help von Jehova, kunn ekj doamet opphieren, schwiensche Bilda to kjikjen. Aune 1999 leet ekj mie aus eent von Jehova siene Zeijen deepen. Ekj wia soo dankboa, daut Jehova mie haud noch eene Jeläajenheit jejäft toom daut ekj kunn een reinet un schaftjet Läwen haben.

Nu kaun ekj goot vestonen, wuarom Jehova dee Sachen, waut ekj ieeschtemma jleicht, soo jäajenaun sent. Hee es een leeftolja Voda un hee wull mie fa dän Schoden bewoaren, waut doavon kjemt, wan eena schwiensche Bilda kjikjt. Daut es krakjt soo aus daut en Spricha 3:5-6 (PB) sajcht! Doa sajcht daut: “Velot die opp däm HARN met dien gaunzet Hoat, un velot die nich opp dien ieejnet Vestaunt. Denkj aun am en aules waut du deist, un hee woat die dän rajchten Wajch wiesen.” Daut, waut de Schreft sajcht, wia een groota Schutz fa mie un haft mie jeholpen, schaftich to sennen (Psalm 1:1-3).

Ieeschtemma äakjeld ekj mie äwa mie selfst, oba nu sie ekj schaftich un ekj hab ennalichen Fräd. Ekj hab nu een reinet Läwen. Ekj weet, daut Jehova mie vejäft haft un mie biesteit. Aune 2000 befried ekj mie met Karolin, eene feine Sesta, waut Jehova krakjt soo sea leeft aus ekj. Wie haben een frädeljet tus. Un wie schazen daut soo sea, daut wie kjennen Poat sennen von eene reine leeftolje Famielje opp de gaunze Welt.