Mea aus 60 Prozent von onse Äwasata schaufen nich en een Betel, oba en Äwasatungsoffizen (RTOs). Waut fa goodet kjemt doabie rut? Waut fa Jereetschoft fält de Äwasata, om fein en eene Äwasatungsoffiz to schaufen? Un waut deit daut aun de Äwasatunk, doano opp waut fa eene Städ de Äwasata schaufen?

 Wan de Äwasata en eene Äwasatungsoffiz schaufen, wonen dee doa, wua väl Menschen dee äare Sproak räden. Karin, waut opp Plautdietsch äwasaten deit, sajcht: “Von dan, aus wie no de Äwasatungsoffiz en Cuauhtémoc (Chihuahua, Mexiko) trocken, räd wie unjarenaunda aus Äwasata emma opp Plautdietsch. Daut doo wie uk, wan wie em Deenst sent un wan wie enkjeepen. Wie sent emma mank soone Menschen, waut onse Sproak räden. Wie hieren biejlikj Rädensoaten, waut wie aul lang nich jehieet haben, un wie woaren uk en, woo de Menschen nu räden.”

 James, waut en de Frafra-Äwasatungsoffiz schauft, sajcht, daut hee sikj noch mol doano bangt, met de Betelfamielje toop to sennen. Oba hee sajcht uk: “Ekj jleich daut sea, enne Äwasatungsoffiz to schaufen. De Menschen hia to prädjen un to seenen, waut de goode Norecht aun dee deit, jeit mie sea to Hoaten.”

 Woo weeten onse Breeda, wua see eene Äwasatungsoffiz oppstalen sellen? Joseph, waut en de Aufdeelunk fa daut Buwoakj oppe gaunze Welt en Warwick (New York, Stäts) schauft, sajcht: “Een Trubbel es, daut opp eenje Städen nich fein Fia un Wota es ooda Internet, waut oba onbedinjt fält toom de Sachen kjrieen, waut äwasat motten. Soo, wan wie eene Äwasatungsoffiz oppstalen, mott wie veleicht uk äwalajen, opp woone Städ wie daut wellen, wäajen de Sproak opp mea aus eene Städ jerät woat.”

 Jeweenlich es daut daut leichste un billichste, de Äwasatungsoffiz bie een Kongresshus, Vesaumlungshus ooda Missionoahus opptostalen, wua de Äwasata dan wonen kjennen. Wan daut nich mäajlich es, dan kjennen de Breeda uk Woninjen un Offizen kjeepen, wua de Äwasata dan wonen un schaufen kjennen. Wan sikj doa dan waut endat, dan kjennen see de Jebieda leicht vekjeepen un daut Jelt doa brucken, wua daut daut needichste fält.

En daut Deenstjoa 2020 hab wie 13 Millionen stätsche Dola jebrukt toom de Äwasatungsoffizen enne go hoolen. En de Äwasatungsoffizen fälen onse Äwasata Komputasch, besondre Programs, Jereetschoft toom oppschnaken, Internet un aundre Sachen. Soon Komputa kost ojjefäa 750 stätsche Dola, bat dee gaunz reed es toom schaufen. De Komputasch woaren reedjemoakt met jekofte Programs un met een Program von de Organisazion, waut Watchtower Translation System heet. Dit halpt de Äwasata, äare Oabeit fein to plonen un sikj Sachen fa äare Oabeit notoforschen.

De Äwasata kjrieen uk Oppschnaks-Jereetschoft, daut dee doa jroz bie äare Offiz oppschnaken kjennen. Dit Jereetschoft kjeem ons sea togood, aus daut met de COVID-19-Krankheit aunfunk. Soo kunnen väl Äwasata dit Jereetschoft met no Hus nämen un von tus wieda Videos un aundret oppschnaken.

Breeda un Sestren von doa rom halpen met, de Bieekja, waut äwasat sent, derchtoseenen un uk de Jebieda von de Offizen to unjahoolen. Cirstin, waut en de Afrikaans-Äwasatungsoffiz en Kapstaut (Sied-Afrika) deent, sajcht: “Väl Vekjindja un Pionieren haben de Jeläajenheit hia to deenen.”

Fa dise Breeda un Sestren es daut eene Iea. Eene Sesta sajcht, daut bie de Äwasatungsoffiz mettohalpen fa ar soo scheen es, aus wan see sikj wudd fresche Loft enholen. Eenje Breeda un Sestren brucken uk äare Stemm, om biem oppschnaken mettohalpen. Juana, waut en Veracruz (Mexiko) wont un opp Totonakisch äwasat, sajcht: “Nu, daut wie dichta bie Städen wonen, wua onse Sproak jerät woat, es daut leichta, mea Breeda un Sestren to finjen, waut met oppschnaken halpen kjennen.”

Oba haben de Äwasatungsoffizen waut doatoo jedonen, daut de Äwasatunk nu bäta es? Väle von onse Läsa sajen, daut et soo es. Cédric, waut en de Demokratische Republikj Kongo läft un met aundre Breeda toop opp de Kongo-Sproak äwasat, sajcht: “Eenje Breeda un Sestren nanden onse Äwasatunk ea ‘de Kongo-Sproak von de Watch Tower-Bieekja’, wiels dee wieren nich soo äwasat, aus jeweenlich jerät wort. Oba nu sajen dee, daut onse Bieekja soo äwasat woaren, aus Kongo nu jerät woat.”

Andile, waut met aundre toop opp Kjoosa äwasat, haft en Sied-Afrika sea dautselwje beläft. Hee sajcht: “Väle haben daut jemoakjt, daut de Äwasatunk nu aundasch es, von dan, aus de Äwasata en de Äwasatungsoffiz schaufen. Mau rajcht Kjinja, waut dän Woaktorm ea opp Enjlisch läsden, läsen dän nu opp Kjoosa. Daut dolste jleichen dee, daut de Neue-Welt-Übersetzung nu soo es, aus de Menschen jeweenlich räden.”

Aule Kosten, om Äwasatungsoffizen opptostalen, to unjahoolen un fa de Breeda to sorjen, waut doa schaufen, woaren von de friewelje Gowen jedakjt, waut fa daut Woakj oppe gaunze Welt jejäft woaren. Doa sent uk dee Gowen met en, waut derch donate.pr418.com jejäft woaren.