De Väastaunt sitt doano, daut de Gowen fa Jebieda jebrukt woaren, waut ons doabie halpen, daut Kjennichrikj to prädjen. En daut Deenstjoa 2023 worden biejlikj äwa 500 Millionen Dola utjejäft, om Vesaumlungshiesa un Kongresshiesa oppe gaunze Welt to kjeepen, to buen, opptofreschen ooda to unjahoolen. a Dit es noch bowenenn to daut, waut jieda Vesaumlunk utjeft toom äa Vesaumlungshus unjahoolen.

 De Gowen woaren uk jebrukt, om Betels to buen un to unjahoolen, waut daut weltwiede Prädichtwoakj organisieren un unjastetten. Wie haben de Oabeit en de Betels veeefacht, soo daut doa mea Jelt äwablift toom Vesaumlungshiesa un Kongresshiesa buen un oppfreschen. Oba doa es doawäajen noch ernoa Jelt needich, om de Betelhiesa opptofiksen, omtobuen ooda dee opp eene aundre Städ fresch to buen. Wuarom es soont aus dit äwaheipt needich? Un woo unjastetten de Betels de Vesaumlungen en äa Launt? Well wie daut seenen.

 Väl Beteljebieda sent aul äwa 30 ooda 40 Joa oolt. Nicholas schauft en de Aufdeelunk fa daut Buwoakj oppe gaunze Welt; hee sajcht: “Mau rajcht wan eena een Jebied fein unjahelt, fält doa met de Tiet emma mea opptofiksen. Doaderch, daut wie een Jebied mol wada gaunz oppfreschen, jeit daut lenja to brucken.”

 De Jebieda en de Betels motten uk doano aunjepaust, waut en de Organisazion jroz fält. Väl Betels worden mol jebut, aus daut oppe gaunze Welt noch lang nich soo väl Vekjindja jeef aus nu. Om aul dise Vekjindja to unjastetten, fälen doa mea Oabeida en de Offizen. Betels, waut ea mol groot jenuach wieren, sent nu väl too kjlien.

 Daut jeit oba uk om Sechaheit. Je noda wie no daut Enj komen, je mea Owwadasch un Ieedbäben jeft daut, wua Menschen stoawen kjennen (Lukas 21:11). Wan wie de Jebieda derchoabeiden, dan doo wie daut soo, daut dee dan sechra sent fa dee, waut doa bennen schaufen. Foaken sent de Jebieda dan uk noch bäta to brucken, om bie eenen Nootfaul de Help to organisieren un ons Prädichtwoakj dan uk wieda to unjastetten.

 En daut Deenstjoa 2023 haben se unja de Oppsecht von dän Väastaunt en 43 Betels jebut. Daut es meist de Halft von de Betels, waut daut oppe gaunze Welt jeft. Hia sent een poa Biespels, waut wiesen, woo wichtich dise Oabeit es.

 Angoola. Matt es en daut Betelkommitee en Angoola, un hee sajcht: “Wie seenen bie ons, woo Hagai 2:7 sikj gaunz besonda erfelt. Wie haben nu 60 Prozent mea Vekjindja aus 10 Joa trigj! Om dee aula to unjastetten, fälden doa dree mol soo väl Oabeida em Betel. Oba wiels wie nich jenuach Rum hauden, kunn wie nich soo väl enloden, un soo musten väl Betelmetoabeida een deel Äwastunden schaufen.”

 Dan stalden se waut Breeda aun toom seenen, waut se doamet doonen kunnen. Ieeschtlich dochten dee, daut bosichste un baste wudd sennen, daut Betel omtobuen. Oba aus see sikj daut noch dolla unjastunden, kunnen see seenen, daut see doamet de Gowen nich daut baste brucken wudden. Daut wudd bäta sennen, een Jebied dicht bie to kjeepen un daut opptofreschen. Matt sajcht: “Aus wie toom ieeschte mol doavon hieeden, daut doa sull een Jebied jekoft un oppjefrescht woaren, wundad wie aus Betelkommitee, aus daut werkjlich bäta wia, aus selfst waut nieet to buen. Oba nu, wua daut foadich es, kjenn wie seenen, daut daut krakjt daut wia, waut ons fäld. Jehowa haft dise Entscheidunk jesäajent.”

 En Angoola woat daut woomäajlich boolt aun noch mea Rum fälen. Oba met daut niee Jebied un met kjliene Wonhiesa oppem Betel-Lott un met jerente Woninjen butakaunt Betel haben se jenuach Rum, om de Vesaumlungen to unjastetten, waut bosich jrata woaren.

 Jaupaun. De Hauptjebieda von dit Betel sent aul meist 40 Joa oolt un worden noch kjeenmol oppjefrescht. De Breeda haben dee Jebieda emma fein unjahoolen, oba dee sent nu aul väl lenja em Jebruck, aus waut daut ieeschtlich jedocht wia. Doawäajen woaren dee nu jrintlich oppjefrescht.

 En aul dee Joaren haft daut Läwen em Betel sikj sea jeendat. Bat aune 2015 muaken se daut Äten fa de gaunze Betelfamielje reed. Doawäajen hauden de Wonstowen en Jaupaun mau een kjlienet Kjäakjskje. Oba nu motten de Betelmetoabeida sikj äa Äten mieeschtens selfst reedmoaken. Aus se de Stowen ombuden, muaken se eene bätre Kjäakj nenn, daut de Breeda un Sestren sikj äa Äten leichta reedmoaken kjennen. Kumiko es eene Sesta, waut en Jaupaun em Betel schauft, un see sajcht: “Met de niee Kjäakj feelt sikj mie daut sea tusich, un daut moakt mie daut uk leichta, nu, wua daut em Betel aundasch es.”

 En daut Betel en Jaupaun doonen se eene sea wichtje Oabeit fa daut weltwiede Woakj (Matäus 28:19-20). Doa sent mau twee Betels, waut de gaunze Bibel drekjen, un Jaupaun es eent doavon. En de Drekjarie buden se Maschienen toom Papia schnieden nenn, waut dän Stoff wajchsuen, soo daut de Breeda doa secha schaufen kjennen. Dise Maschienen kosten rom eene Million Dola, oba soo moak wie secha, daut dit Betel uk fa wieda jeisteljet Äten drekjen un wajchschekjen kaun.

 Ons wia daut sea wichtich, daut se wieda Biblen drekjen kunnen, wäarent se doa buden. Trey es en daut jaupaunische Betelkommitee, un hee sajcht: “Aus se doa buden, jeef onse Organisazion opp emma mea Sproaken Biblen rut, un doa worden uk emma mea Biblen bestalt. De Aufdeelungen em Betel un de Buoabeida musten sikj goot beräden un daut fein plonen, woo se de Maschienen nennbuden, daut de Drekjarie nich hinjastalich wort.” De jräfste Buoabeiten en de Drekjarie dieeden von Moaz bat August 2023. Daut wia nich leicht, oba se kunnen doawäajen jieda Moonat meist 220,000 Biblen drekjen. Un de Buoabeiten wieren uk nich diera aus jeplont.

 De Jebieda woaren uk soo omjebut, daut dee weinja Fia un Hettinj brucken. Doa woaren niee Sonnenploten nennjebut, wuaderch se jieda Joa ojjefäa 120,000 Dola bie de Fiabill spoaren. Doa woaren uk niee Fenstren met dree Ruten nennjebut; soo motten se weinja hetten, un daut spoat äant jieda Joa ojjefäa 10,000 Dola. Soone Sachen nennbuen kost uzhent Jelt, oba aules toop spoat eena sikj doamet äwa 3.5 Millionen Dola, bat de Sonnenploten un de Fenstren motten fresch jetuscht woaren. Un bowenenn doonen de Jebieda soo uk weinja aun de Natua.

 Aun dise beid Biespels es to seenen, woo väl Oabeit daut es, daut de Betels aules haben toom de Vesaumlungen un daut Prädichtwoakj unjastetten. Un doa es noch väl to doonen. Aaron schauft en de Aufdeelunk fa daut Buwoakj oppe gaunze Welt; hee sajcht: “Wie haben aul väl kunt bestrieden, oba doa fält noch emma väl to doonen.” Woo woaren se aul dit jedonen kjrieen? Aaron sajcht noch: “Met aul de Gowen, waut de Breeda soo wellich jäwen, kjenn wie dise wichtje Oabeiten betolen. Oba waut doa uk fält un waut wie väl räakjnen, daut es de feine Enstalunk von de friewelje Oabeida, waut doa aul metjeholpen haben. Un väle endren äa Läwen, om doa uk mol methalpen to kjennen. Daut es een groota Bewies fa Jehowa sienen Säajen, daut de Breeda soo wellich von äare Tiet un Krauft un Jelt jäwen” (Psalm 110:3).

 Aul onse Buwoakjs woaren met friewelje Gowen betolt. Väle von dise Gowen woaren derch donate.pr418.com jejäft. Sea dankscheen, daut jie emma soo friejäwrich sent.