Wäajen sikj jieda Joa hundatdusende deepen loten, fälen doa emma mea Jebieda fa dän Deenst fa Jehova. Fa daut Deenstjoa 2020 plonden de Aufdeelungen fa daut Buwoakj oppe gaunze Welt, mea aus 2 700 Vesaumlungshiesa to buen ooda opptofreschen, wäajen doa emma mea Menschen tookomen. a

 Oba wäajen de COVID-19-Krankheit kunn doa välet nich jedonen woaren, waut doa jeplont wia. Un om onse Gloowesbreeda un Sestren to beschitzen un ons uk aun de Aunwiesungen von de Rejierungen to hoolen, deed daut Drekjariekommitee vom Väastaunt de mieeschte Buwoakjs oppe gaunze Welt enstalen. Un doch kunnen en daut Deenstjoa 2020 ver dise Krankheit 1 700 Vesaumlungshiesa jebut un oppjefrescht woaren. Dan worden uk noch äwa 100 groote Betel-Buwoakjs foadich jemoakt. See wie mol, woo dise Buwoakjs onse Breeda togood jekomen sent.

 Daut Betel en Kamerun. Daut Betel, waut ea en Douala wia, wia sea kjlien un doa fäld een deel aun to doonen. Daut Drekjariekommitee äwaläd, aus se daut Betel sullen oppfreschen. Oba daut wudd diera komen, aus de Jebieda selfst em Wieet wieren. Dee unjasochten uk, aus se sullen een nieet Betel opp eene aundre Städ buen ooda een aundret Jebied kjeepen un oppfreschen, oba aules schauft bloos nich.

 En dee Tiet worden de Breeda en, daut doa jeplont wort, em Nuaden von Douala eenen Heiwä to moaken, un dee jinkj krakjt biesied een Kongresshus vebie. Dis Heiwä wudd daut leichta moaken, doa hantokomen un uk doa aules hantobrinjen, waut doa fäld. Daut wia krakjt daut, waut doa fa een nieet Betel needich wia. Dan jeef de Väastaunt de Frieheit, daut opp dän Hoff von daut Kongresshus kunn een nieet Betel jebut woaren.

 Jehova siene Zeijen un uk aundre Kompanieen schauften toop aun dit Buwoakj un soo kunnen dee Tiet un Jelt spoaren. Daut brukt 2 Millionen stätsche Dola weinja, aus see jedocht hauden. De Betelfamielje kunn en dit niee Betel nentrakjen, jroz ea daut met de COVID-19-Krankheit aunfunk.

 Fa de Breeda un Sestren em Betel en Kamerun es daut nu väl makelja toom wonen un toom schaufen. Dee talen dit niee Betel aus een Jeschenkj von Jehova. Een Poa Lied sajcht: “Wie wellen ons nu noch dolla aunstrenjen un wiesen, woo väl wieet ons dit Jeschenkj es.”

 De Tocholabal-Äwasatungsoffiz en Mexiko. Fa Joaren wieren de Tocholabal-Äwasata en daut Betel von Meddel-Amerika, waut dicht bie Mexiko-Staut es. Oba Tocholabal woat daut mieeschte bloos en Altamirano un en Las Margaritas jerät; daut es rom 1 000 Kilomeeta (620 Miel) auf vom Betel. Doawäajen wia daut fa de Äwasata schwoa, daut dee met de Sproak metkjeemen, woo dee nu jerät wort. Un fa daut Betel wia daut sea schwoa, Breeda un Sestren to finjen, waut met daut äwasaten un oppschnaken halpen kunnen.

 Doawäajen wull daut Schriewkommitee vom Väastaunt, daut de Äwasata doahan trocken, wua werkjlich Tocholabal jerät wort. Daut Betel wort sikj dan eenich, een Jebied to kjeepen un daut opptofreschen. Daut wia bilja, aus een nieet Jebied to buen ooda Offizen to pachten.

 Een Äwasata vetalt, woo am dit es togood jekomen. Hee sajcht: “En de 10 Joa, waut ekj aus Äwasata em Betel deend, hab ekj nich eene Famielje bejäajent, waut miene Sproak räd. Nu es onse Offiz medden mank soone Menschen, waut Tocholabal räden doonen. Ekj hab jieda Dach met soone to doonen, waut dise Sproak räden. Dit haft mie jeholpen, daut ekj mie en miene Sproak noch vebätat hab, un doaderch es miene Oabeit bäta jeworden.”

 Fa daut Deenstjoa 2021 es doa jeplont, daut doa sellen 75 Äwasatungsoffizen un Jebieda fa Bibelschoolen jebut woaren, wan de Omstend daut sest tooloten. Doa woat uk wieda aun groote Betel-Buwoakjs jeschauft woaren, wua uk daut niee Buwoakj en Ramapo, New York, met en es. Dan woat uk daut Betel en Argentinien un en Italien omtrakjen. Doa fälen uk mea aus 1 000 niee Vesaumlungshiesa to buen. Un fa mea aus 6 000 Städen, wua Breeda sikj vesaumlen, fält eene aundre Städ to sieekjen. Un doa fälen noch 4 000 Vesaumlungshiesa opptofreschen.

 Woo woat aul dit buen un oppfreschen betolt? Dise Froag beauntwuad Lázaro González, een Brooda von daut Betelkommitee von Meddelamerika, aus see äwa de Äwasatungsoffiz von Tocholabal räden deeden. Hee sajcht: “De Breeda von ons Jebiet, wua ons Betel äwa aunjestalt es, haben daut nich soo riew. Wan wie nich de Unjastettunk hauden von oppe gaunze Welt, wudd daut ommäajlich sennen, daut wie kunnen de Äwasatungsoffizen buen fa de Breeda, waut de Indiauna-Sproaken räden. Derch de Breeda un Sestren äare Gowen es daut mäajlich, daut wie de Äwasata doahan schekjen kjennen, wua dee äare Sproak jerät woat. Wie bedanken ons bie onse Breeda oppe gaunze Welt fa äare friewelje Gowen.” Soo, aul dise Buwoakjs sent mäajlich derch de Gowen, waut fa daut Woakj oppe gaunze Welt jejäft woaren. Väle woaren derch donate.pr418.com jejäft.