FA WAUT WOAREN JUNE GOWEN JEBRUKT?
Dän dreedoagschen Kongress jeit to hieren
1. AUGUST 2021
De dreedoagscha Kongress 2020 wia sea besonda. Daut wia de ieeschta, waut oppjeschnakt wort un enne gaunze Welt äwa Internet to haben wia. De mieeschte von onse Breeda un Sestren en Malawi un Mosambik kunnen oba dän gaunzen Kongress uk onen Internet haben. Woo wia daut mäajlich?
Daut Plonakommitee un daut Liakommitee vom Väastaunt haben de Frieheit jejäft, daut de Kongress en Malawi un Mosambik äwa Rädio un Tellewizhen kunn äwajebrocht woaren. Wuarom wia daut needich, daut doa aundasch to doonen? En Malawi es daut Internet diera aus en de mieeschte aundre Lenda oppe Welt un doawäajen kjennen bloos een poa von Jehova siene Zeijen Internet haben. William Chumbi, een Brooda von daut Betelkommitee en Malawi, sajcht: “De eensje Mäajlichkjeit, daut de Breeda un Sestren dit jeistelje Äten kjrieen kunnen, wia äwa Rädio un Tellewizhen.” Un Luka Sibeko, waut uk em Betelkommitee von Malawi deent, sajcht: “Bie ons wudden bloos een poa Breeda dän Kongress haben kunt seenen, wan daut nich wudd sennen äwa Rädio un Tellewizhen jewast.” Uk en Mosambik wudden sikj bloos een poa Breeda haben kunt een Fon, een Tablet ooda Internet kjeepen.
Dee moaken Plons
Wäajen de COVID-19-Krankheit worden de Toopkomes aul äwa eenje Tellewizhen- un Rädio-Stäschens jebrocht. a Nu fruagen onse Breeda dise Stäschens, aus dee nich uk wudden kjennen dän Kongress äwabrinjen.
En Malawi hauden onse Breeda eenen Trubbel. Jeweenlich brinjen de Tellewizhen- un Rädio-Stäschens doa bloos soont äwa, waut nich lenja aus eene Stund dieet, wiels dee jleewen, daut de Toohiera daut sest enoolent woat. Oba de Breeda muaken dee dietlich, woo ons Woakj de Menschen togood kjeem. De Menschen kunnen wäajen de Krankheit nich von tus, oba wie wullen dee met de goode Norecht treesten, un daut wudd dee halpen, bätre Menschen to woaren un schaftje Famieljes to haben. Aus see dit bie de Stäschens hieeden, jeewen see de Breeda de Frieheit, daut see uk waut lenjret äwabrinjen kunnen.
En Malawi brocht een Tellewizhen-Stäschen un een Rädio-Stäschen dän Kongress äwa un millionende Menschen en daut gaunze Launt kunnen dän hieren. Un en Mosambik brochten se dän Kongress bie een Tellewizhen-Stäschen un bie 85 Rädio-Stäschens äwa.
En de beid Lenda toop musten de Breeda 28 227 Dola b betolen, om dän Kongress äwa Tellewizhen äwatobrinjen, un meist 20 000 Dola fa de Rädio-Stäschens. Bie een kjlienet Rädio-Stäschen kost daut mau 15 Dola, oba bie een aundret 2 777, wiels daut dan en daut gaunze Launt to hieren wia.
Onse Breeda strenjden sikj sea aun, de Gowen soo goot aus mäajlich to brucken. En Malawi biejlikj kunnen dee daut bat doa brinjen, daut see Aufschlach kjrieejen, opp eene Sauz soogoa 30 Prozent. Doaderch daut see opp veschiedne Städen Aufschlach kjrieejen, spoaden see sikj 1 711 Dola. En Mosambik kjrieejen de Breeda eenjemol Aufschlach, wiels de Stäschens wisten, daut dee opprechtich wieren un enne Tiet betolen wudden.
Dee sent sea dankboa
Onse Breeda wieren sea dankboa, daut see dän Kongress äwa Tellewizhen ooda Rädio haben kunnen. Patrick, een Eltesta von Malawi, sajcht: “Wie sent de Breeda vom Väastaunt sea dankboa fa aul daut, waut dee en de Tiet von dise Krankheit fa ons jedonen haben.” Isaac es uk von Malawi. Hee sajcht: “Wie haben bloos een Rädio. Doawäajen wia wie sea dankboa, daut Jehova siene Organisazion daut mäajlich jemoakt haft, daut wie dän Kongress äwa Rädio hieren kunnen. Doaderch kunn onse gaunze Famielje von dän Kongress eenen Nutzen haben. Daut bewiest ons, daut Jehova siene Deena opp iernst leeft.”
Fa eenen Vekjindja en Mosambik wia dis Kongress aune 2020 de ieeschta. Hee sajcht: “Daut wie dän Kongress em Tellewizhen kjikjen kunnen, wees mie, daut Jehova de aulmajchtja Gott es. De Krankheit kunn am nich doavon aufhoolen, ons daut jeistelje Äten to jäwen, un ekj kunn daut mau rajcht en miene Wonstow haben. Ekj kunn seenen, woo väl Leew doa mank Jehova siene Deena wia. Ekj sie mie gaunz secha, daut daut de woara Gloowen es.”
Een Eltesta, waut Wyson heet, sajcht: “Ekj well sea doafäa dankscheen sajen, daut de trua Kjnajcht en de Tiet von dise Krankheit soo goot fa ons jesorcht haft. En ons Poat von de Welt haben väle daut nich riew. Wie wudden nuscht haben kunt von dän Kongress kjrieen, wan wie dän nich äwa Rädio ooda Tellewizhen jehaut hauden.”
Aune 2021 haft daut Plonakommitee un daut Liakommitee wada de Frieheit jejäft, daut de Breeda en eenje Jäajenden dän dreedoagschen Kongress äwa Tellewizhen un äwa Rädio haben kjennen. Woo woat daut betolt? Met de Gowen, waut jie fa daut Woakj oppe gaunze Welt jäwen, soo aus daut opp donate.pr418.com utjelajcht woat. Sea dankscheen, daut jie soo friejäwrich sent!
a Aune 2020 haud daut Plonakommitee aul de Frieheit jejäft, daut se en de Tiet von de COVID-19-Krankheit opp jewesse Städen de Toopkomes kunnen äwa Tellewizhen ooda Rädio brinjen. Daut haft deejanje sea jeholpen, waut de Toopkomes von äare Vesaumlunk ooda von opp JW Stream nich seenen kjennen, wiels dee wua wonen, wua daut Internet ooda Fon nich fein schauft ooda sea dia es. Oba daut es nich fa de Breeda opp soone Städen, wua dee sikj fein met äare Vesaumlunk toopknekjen kjennen fa de Toopkomes.
b Aulawäajen, wua daut en disen Artikjel von Dola rät, sent stätsche Dola jemeent.
Veleicht jleichst du uk dit
WAUT FOAKEN JEFROACHT WOAT
Woo drajcht daut Woakj von Jehova siene Zeijen sikj?
Bie ons es daut met de Gowen nich soo aus en väl aundre Kjoakjen.
