En Latien-Amerika jeft daut mank de hundade Millionen Menschen uk millionende, waut Indiauna-Sproaken räden un äare ieejne Jewanheiten haben. Väle von dise Indiauna-Velkja sent onse Gloowesbreeda un -sestren, un dee jleichen daut, woo see daut haben. Wiels dee aundre Menschen em jeisteljen halpen wellen, äwasaten dee Bieekja von Jehova siene Zeijen opp äwa 130 Indiauna-Sproaken, waut en Latien-Amerika jerät woaren. a Oba eenje von dee haben Wadastaunt jekjräajen, wiels dee Jehova deenen wullen un dan eenje Jewanheiten von äare Velkja nich mea metmuaken, waut jäajen de Bibel sent. Woo worden june Gowen jebrukt toom dise Breeda un Sestren halpen?

 Onse Breeda, waut Huitschol räden un en Mexiko en de Boaj von Jalisco wonen, musten waut sea schwoaret derch. b Dee wullen bie jewesse Gloowessitten nich metmoaken, waut äare Menschen doa haben, wiels daut jäajen äa Jewessen jinkj. Dit oajad aundre von de Huitschol-Menschen sea. Dän 4. Dezamba 2017 deed eene Grupp dolle Menschen onse Breeda un aundre, waut met an toop wieren, aunjriepen. Dee juagen onse Breeda von doa fuat, vestieeden äare Hiesa un säden, see wudden aul dee ombrinjen, waut trigjkomen wudden.

 Onse Breeda un Sestren en Städa dicht bie deeden sikj fuaz gaunz om dee kjemren. Oba waut kunn jedonen woaren, daut see wada trigj no äa Tus kunnen? Ons Brooda Agustín sajcht: “Wie hauden nich jenuach Jelt toom ons eenen Ofkot aunnämen un wisten uk nich wäm wie no Rot froagen sullen.”

 Wiels derch dise Sach de Gloowesfrieheit von onse Breeda un Sestren aunjejräpen wort, deed daut Betel von Meddel-Amerika doa fuaz waut met. Daut ieeschte malden dee daut doa verem Jesaz un fruagen, aus de Sach kunn unjasocht woaren. Dan kjrieejen see Frieheit vom Plonakommitee vom Väastaunt von Jehova siene Zeijen, daut see kunnen Help kjrieejen von de Aufdeelunk fa Jesazessachen en de Hauptoffiz. Dee holpen an dan, de Sach fa onse Huitschol-Breeda un -Sestren verem Jerecht to brinjen. Schlieslich kjeem daut ver daut hechste Jerecht en Mexiko.

 Eene Grupp Ofkoten von oppe gaunze Welt deed gaunz dietlich utlajen: Krakjt soo aus aundre daut respakjten motten, woo Indiauna-Velkja daut haben, soo motten uk de Indiauna-Velkja selfst de Frieheit von äare Menschen beschitzen un respakjten. Fa Menschenrajchten jeft daut kjeene Jrensen.

 Dän 8. Juli 2020 deed daut hechste Jerecht en Mexiko eenstemmich entscheiden, daut Jehova siene Zeijen rajcht wieren. Daut Jerecht säd, daut aul dee, waut wajchjejoacht worden, wada trigj no äa Tus kunnen. Agustín säd, woo hee un väle aundre sikj feelen: “Wie sent soo schaftich un dankboa fa daut, waut de Breeda fa ons jedonen haben. Wan dee ons nich jeholpen hauden, wudd wie nuscht haben kunt doonen.”

 En Ekuador musten onse Breeda von de Indiauna-Velkja meist soo waut derch. Dee läwen en daut Darp San Juan de Ilumán en daut Otavalo-Tol. En 2014 fungen onse Breeda aun, doa een Vesaumlungshus to buen, nodäm daut see aule Papieren doafäa reed hauden. Unja de Leidunk von eenen Priesta, kjeem eene Grupp von äwa 100 dolle Menschen doahan un bemusten de Breeda opptohieren met buen. Daut Darp säd Jehova siene Zeijen doa dan uk auf, sikj fa äare Gottesdeensten to vesaumlen.

 De Aufdeelunk fa Jesazessachen von daut Betel en Ekuador un von de Hauptoffiz schauften toop toom de Vesaumlunk halpen, äare Gloowesfrieheit to veteidjen, un dee brochten de Sach verem Jerecht. Dit brocht daut Darp bat doa, bosich bietojäwen, un see leeten an wada Toopkomes haben un äa Vesaumlungshus foadich buen. Oba toom de Rajchten von onse Breeda uk fa wieda beschitzen, fruag wie bie de hechre Jerechten no eene Entscheidunk en dise wichtje Sach: Motten de Indiauna-Velkja, soo aus aule aundre oppe Welt, uk de Menschenrajchten respakjten?

 Breeda, waut en Ekuador Ofkoten sent, brochten de Sach fa de Vesaumlunk verem Jerecht. Dän 16. Juli 2020 deed daut Jerecht, waut äwa daut Laundesjesaz en Ekuador entscheiden deit (daut hechste Jerecht en Ekuador), de Sach unjasieekjen. Doa kunn uk noch eene Grupp von vea aundre Breeda to daut Jerecht räden, waut Ofkoten sent un sea väl Erfoarunk met Jesazessachen von oppe gaunze Welt haben. (Oba wäajen de COVID-19 Krankheit deeden dee bloos äwa Video methalpen.) Daut wia daut ieeschte Mol, daut een Jerecht tooleet, daut eene Grupp Breeda, waut Jehova siene Zeijen oppe gaunze Welt veträden, bie eene Jerechtssach methalpen kunn, waut tweschen eene Vesaumlunk un een Launt wia. c De Breeda weesen doaropp han, waut aundre Jerechten von oppe gaunze Welt doatoo sajen, toom bewiesen, daut een Mensch nich sien perseeneljet Menschenrajcht velist, bloos wiels dee to een Indiauna-Volkj jehieet.

 Onse Breeda en daut Otavalo-Tol sent sea nieschierich, waut dit huage Jerecht entscheiden woat. Bat soo wiet sent de Breeda sea dankboa fa de Help, waut see aul jekjräajen haben. César, een Eltesta en de Ilumán Kitschua Vesaumlunk, sajcht: “Bloos Jehova wudd derch siene Organisazion soo väl fa soo weinich Menschen doonen.”

 Aule Ofkoten, waut en dise Sach methalpen, haben väl Erfoarunk un sent Jehova siene Zeijen. Dee sent schaftich mettohalpen onen betolt to nämen. Aul de Papieren foadich to moaken un dee verem Jerecht to brinjen, kost väl Jelt un Tiet. Onse Ofkoten un aundre Breeda haben äwa 380 Stund doaraun jeschauft, aules fa de Jerechtssach en Mexiko reedtomoaken. Un dan haben dee noch 240 Stund doaraun jeschauft, Sachen to äwasaten. Aun de Jerechtssach en Ekuador haben meist 40 Ofkoten von oppe gaunze Welt hundade Stunden jeschauft. Woo wort aul daut betolt toom onse Breeda met dise Jesazessachen halpen? Dit wia mäajlich, wiels jie Gowen jeewen un doatoo de veschiedne Mäajlichkjeiten brukten, waut opp donate.pr418.com aunjejäft sent. Sea dankscheen, daut jie soo friejäwrich sent.