Dit Joa kjeem waut rut, wua Jehowa siene Zeijen aul sea nieschierich to wieren: daut ieeschte Video von de Video-Seriee De goode Norecht äwa Jesus, waut nu aul Millionende jeseenen haben. Oba daut es mau bloos daut ieeschte von 18 Videos! Well wie mol seenen, woo väl Oabeit doa met en es, dise Video-Seriee to moaken, un woo du veleicht metjeholpen hast, daut daut mäajlich wia.

 Daut mieeschte von de Jesus-Seriee woat bie daut Betel von Australasien jemoakt. a Jiedatsmol wan jefilmt woat, komen doa tweschen 50 bat 80 Menschen han, waut dan entwäda bie de Videos metspälen ooda met daut Filmen halpen. Doa woat lang em Verut jeplont, waut dee to Meddach uk to Owentkost kjrieen; un doa es uk waut reed, wan dee biesied mol no waut hungat. Jieda Dach woaren doa fa eene Persoon ojjefäa 4 stätsche Dola fa Äten jebrukt. Esther halpt enne Kjäakj- un Ätstow un see vetalt: “Wie kjeepen bie veschiedne Stuasch daut, waut ons toom Äten moaken fält, soo daut wie goodet Ätwoa kjrieen un uk fa dän basten Pries. Un wie paussen daut emma aun, woo väl Äten wie moaken, om daut doa soo weinich aus mäajlich äwablift.”

 Fa aul dee, waut doa methalpen, mott nich bloos fa Äten jesorcht, oba dee mott uk fa daut Wada beschizt. Wuahäa soont? En Australien es daut äwa Dach heet met väl Sonneschien, un daut kaun eenen Mensch sea toosaten. Daut doa kjeena too lang em Sonneschien steit un von de Hett meed woat, jeft daut flietje Breeda un Sestren, waut doa Zelten un aundret oppstalen toom sikj em Schauten vereiwen. Dee seenen uk doano, daut doa fa aulem Wota un Schorms sent un uk Sonnenschmäa. Kevin, waut bie de Audio- un Video-Deensten schauft, sajcht äwa dise Breeda un Sestren: “Dee komen dise un uk aundre Oppgowen deemootich un met Freiden no, wan uk de mieeschte von dee nich em Betel wonen, oba opp un dol foaren toom ons hia halpen. Daut wudd ommäajlich sennen dise Video-Seriee to moaken onen dee äare Unjastettunk.”

 Välet von de Videos kaun em Betel jefilmt woaren, entwäda buten ooda bennen, wua se uzhent doafäa reedjemoakt haben. Oba bie eenje Poats von de Videos motten aul dee, waut doa metmoaken, rutfoaren toom filmen. Foaken sieekjen se sikj eene eensome Städ, wua daut kjeene Porlein-Pols jeft, jepäwde Wäaj ooda niemootsche Hiesa, soo daut et em Video soo lat aus to Jesus siene Tiet. Doawäajen mott aules, waut se toom filmen brucken toopjepakt woaren, no dee Städ jefieet un doa rajcht oppbewoat: daut sent biejlikj de ieeschtemmasche Kjleeda un Sachen, waut em Video jebrukt woaren, un uk aul daut aundre Jereetschoft. Ea se aunfangen kjennen metem filmen, seenen Breeda, waut doafäa aunjestalt sent, doano, daut Fia-Plenten, reinet Wota toom drinkjen un Zekjreets reed sent. Jeweenlich kjennen dee, waut metfoaren, bie Breeda von dee Jäajent Nacht bliewen; ooda dee bliewen en Hus-Trälasch, Hotels ooda en aundre jerente Hiesa.

 Toom filmen rutfoaren kaun dia komen, väl Tiet nämen un aul dee, waut metfoaren, meed moaken. Doawäajen jeef de Väastaunt aune 2023 de Frieheit, daut doa sull fa 2.5 Millionen Dola eene Video-Waunt jekoft un toom filmen jebrukt. Dise Video-Waunt woat hinjakaunt oppjestalt, un dee kaun soon kloaret un krakjtet Bilt wiesen un soo met daut Licht schaufen, daut et lota em Video soo sitt, aus wan dit wia buten jefilmt. Doaderch es daut foaken nich needich, aundatwäajen hantofoaren un doafäa Jelt to brucken. Darren deent em Betelkommitee von Australasien un hee sajcht: “Met eene Video-Waunt moak wie dee, waut doa metspälen, lang nich soo meed. Un uk de aundre, waut doa methalpen, haben de Mäajlichkjeit jewesse Poats noch een Mol to filmen. Saj wie mol, wie wellen buten waut filmen ver eenen Sonnenunjagank. Dan wudd wie doafäa bloos een poa Minuten Tiet haben, ea de werkjelje Sonn wajch wia. Oba met eene Video-Waunt kjenn wie dänselwjen Sonnenunjagank miere Mol aufspälen loten, bat wie ieescht aules soo jefilmt haben, aus wie wellen.”

 Bie jieda Video von de Jesus-Seriee spälen hundade Breeda un Sestren met, waut lota em Video to seenen sent. Oba doa sent bowenenn noch väle mea, waut doa biem filmen halpen. Woo denkjen dee aula äwa daut, woo fa äant jesorcht woat?

 Amber wont en de Staut Melbourne un see reisd äwa 700 Kilomeeta (435 Miel), om bie dise Videos mettomoaken. See schreef: “Fuaz von dan aus ekj biem Zhett-Plauz aunkjeem, kjemmaden de Breeda em Betel sikj sea goot om mie. Väle kroagden mie no äant fa eene Moltiet ooda fa eene Tauss Tee. Wua wie filmen deeden, feeld ekj mie von aulem jeleeft un maklich. Dise Reis wia werkjlich een groota Säajen un daut feeld sikj goanich no soo waut Schwoaret.”

 Derek schauft mank de Breeda, waut biem filmen halpen, un hee sajcht: “Von Aunfank aun haben ons veschiedne Aufdeelungen em Betel jeholpen. Ekj sie soo dankboa, daut ekj kaun met soone Breeda un Sestren toopschaufen, waut leeftolich sent un wellich halpen. Dee haben von äare Tiet un Krauft jebrukt un uk von äare ieejne Sachen toom bie dise Videos halpen. Dauts kloa to seenen, daut Jehowa äant un uk ons säajent. Ekj sie mie gaunz secha, daut et am nich bloos wichtich es, woo daut met dise Videos utkjemt, oba uk woo wie onse Oabeit doonen.”

 Wie bedanken ons aun junt, daut jie dise Video-Seriee derch june Gowen unjastett haben, waut jie biejlikj opp donate.pr418.com jeewen.