En daut Deenstjoa 2020 jeef daut väl Owwadasch, un de COVID-19-Krankheit vespreed sikj oppe gaunze Welt. Woo haben Jehova siene Zeijen deejanje utjeholpen, waut doarunja lieden musten?

 En daut Deenstjoa 2020 a jeef daut Plonakommitee vom Väastaunt de Frieheit 28 Millionen Dola b to jäwen, om em Nootfaul uttohalpen. Onse Breeda musten biejlikj lieden wäajen de COVID-19-Krankheit, väle Uarkauns, Äwaschwamungen en Afrika, Hungaschnoot en Venezuela un wäajen daut en Simbabwe sea drieech wia. En äwa 200 soone Loagen kunn onse Breeda utjeholpen woaren. Met friewelje Gowen kunn doafäa jesorcht woaren, daut de Breeda Äten, Wota, eenen Veblief, Kjleeda un Medizien hauden un uk de needje Sachen toom reinmoaken, Sachen repäaren un fresch oppbuen. Räd wie mol äwa eenje Biespels, woo onse Breeda utjeholpen wort.

 COVID-19. Dise Krankheit haft onse Breeda aul oppe gaunze Welt truarich jemoakt un em kjarpalichen un em tieteljen toojesat. Om onse Breeda to halpen, worden doa oppe gaunze Welt äwa 800 Nootfaulkommitees (NFKs) oppjestalt. De Breeda von dise Kommitees sent sea oppmoakjsom, waut onse Breeda fält, un sajen dan daut Plonakommitee daut, daut dee doano seenen kjennen, woo see dee uthalpen kjennen.

 En daut gaunze Joa haben de NFKs doafäa jesorcht, daut onse Breeda Äten, Wota, Reinjungsmeddel un uk de needichste Medizien kjrieejen. Opp eenje Städen schauften de NFKs uk met de Eltestasch doa toop, om de Breeda to halpen, daut dee de Unjastettunk kjrieejen, waut de Rejierunk aunbeeden deed.

 Soone, waut nich Zeijen sent, es daut uk oppjefollen, woo wie onse Breeda em Nootfaul utholpen. Biejlikj Field Simwinga, de Väaschta von de Poliezen en Nakonde, Sambia, säd to onse Breeda: “Wie sent junt sea dankboa, daut jie to de rajchte Tiet de Famieljes utjeholpen haben, waut daut fäld.”

 Hungaschnoot en Angoola. Wäajen de COVID-19-Krankheit wort daut Äten en Angoola knaup un doawäajen wort daut emma diera. Fa väle von onse Breeda wia daut sea schwoa, Äten to kjeepen.

 Daut Betel en Brasilien wort jefroacht, aus see wullen Paks met Äten no de Breeda en Angoola schekjen. Om de friewelje Gowen daut baste uttonutzen, unjastunden dee sikj daut krakjt, wua daut daut baste utkjeem, daut Ätwoa to kjeepen un wajchtoschekjen, un dee koften uk een deel opp eemol. Jieda Pak met Äten kost met veschekjen toop em Derchschnett mau 22 Dola un daut wieren meist 20 Kilo jieda Pak (44 Punt). Doatoo jehieeden biejlikj Ries, Schaublen un Fat. Em gaunzen worden 33 544 soone Paks Ätwoa wajchjeschekjt, un daut wieren em gaunzen 654 Tonnen. Met aul dit Ätwoa toop met daut, waut noch en Angoola jekoft wort, kunn fa mea aus 50 000 Menschen jesorcht woaren.

 Woo feelen onse Breeda sikj äwa dise Help, waut see jekjräajen haben? Alexandre, waut en Angoola wiet enne wille Hundat wont, sajcht: “Dit bewiest mie, daut Jehova mie leeft un daut ekj nich auleen sie. Ekj sie bie Jehova siene Organisazion werkjlich waut wieet.” Mariza, eene Mutta, waut äare Kjinja auleen opptrakjt, sajcht: “Jehova haft mien Jebäd jehieet. Ekj bedank mie bie am un bie siene Organisazion.”

 Drieeje Tiet en Simbabwe. En daut Deenstjoa 2020 wia daut en Simbabwe sea drieech. Daut leet soo, daut millionende Menschen wudden motten doothungren. Dusende von Jehova siene Zeijen en Simbabwe hauden nich jenuach to äten.

 Om onse Breeda met Äten to vesorjen, worden doa fief Nootfaulkommitees oppjestalt. Hundade Vekjindja holpen met, dit Ätwoa entopaken, opptoloden un brukten doatoo mau rajcht äare Foatieja. c En daut Deenstjoa 2020 worden 691 561 Dola jebrukt, om 22 700 Menschen met Äten to vesorjen.

 Eenje von onse Breeda hauden kjeen Äten mea, aus daut Ätwoa aunkjeem, waut de Organisazion schekjt. Aus de Breeda doa daut Ätwoa kjrieen, lowden dee Jehova. Eenje fungen mau rajcht aun Kjennichrikjsleeda to sinjen.

 Opp eene Städ jinjen twee von onse Sestren, waut Wätfrues sent, no een Darpstoopkomen, wua äwa de Help jerät wort, waut eene Organisazion aunbeeden deed, waut nich von de Rejierunk wia (NGO). Oba dit Toopkomen dreid soo en de Politikj nenn, daut onse Sestren sikj eenich worden, daut see de Help nich kunnen met dise Bedinjungen aunnämen. Aus onse Sestren von dit Toopkomen veleeten, worden dee von aundre vespott, waut säden: “Jie brucken nich no ons komen un no Äten schlemmen.” Oba mau twee Wäakj lota wieren onse Breeda met de Help bat doa un vesorjden onse Sestren met Äten. Daut wia noch lang ea de NGO met äare Help bat doa wia.

 Daut Jehova siene Zeijen de Breeda en Simbabwe holpen, wia uk een goodet Zeichnis. See wie mol de Erfoarunk von Prisca, waut en een kjlienet Darp wont. Wan daut doa uk sea schwoa wia wäajen de drieeje Tiet, deed Prisca doawäajen jieda Medwäakj un Friedach prädjen, mau rajcht wan daut uk de Tiet wia, daut Launt reedtomoaken. De Menschen hauden sikj domm äwa ar un säden: “Diene Famielje woat noch vehungren, wäajen du prädjen jeist.” Prisca säd dan to dee: “Jehova haft siene Deena noch nienich em Stäakj jeloten.” Nich lang no daut kjrieech see Ätwoa von onse Organisazion. Eenje Menschen von doa rom wieren sea vewundat doaräwa un säden to Prisca: “Gott haft die kjeenmol em Stäakj jeloten. Soo, wie wudden jleichen mea äwa am to lieren.” Säwen Nobasch von doa horchen sikj nu emma de Toopkomes aun, waut äwa Rädio komen.

 Wie komen emma dichta no daut Enj von dise Welt un daut woat fa wieda Schoden derch Owwadasch jäwen (Matäus 24:3, 7). Daut jie soo friejäwrich sent met june Gowen, waut jie opp veschiedne Wäaj derch donate.pr418.com jäwen, woat sea jeschazt. Dee sent eene groote Help krakjt to de rajchte Tiet.