Jehova siene Zeijen halpen Menschen en äwa 200 Lenda em jeisteljen un em tieteljen. Oba mau 35 von dise Lenda kjrieen jenuach Gowen, daut see äare Onkosten selfst dakjen kjennen. Woo steit daut dan met soone Lenda, waut äare Onkosten nich selfst dakjen kjennen?

 De Väastaunt kjikjt doano, waut Jehova siene Zeijen oppe gaunze Welt fält, daut dee Jehova deenen kjennen un de goode Norecht bekauntmoaken. Daut Jelt, waut doa nenkjemt, woat rajcht jebrukt. Wan een Betel biejlikj mea Gowen kjricht, aus daut doa fa daut Woakj needich es, dan schekjt daut Betel Gowen no een aundret Betel, wua daut aun mea Help fält. Daut woat soo jedonen, wäajen de ieeschte Christen daut uk soo deeden. Dee holpen sikj unjarenaunda ut, un daut wia, “om uttojlikjen” (2. Korinta 8:14, PB). Dee brukten daut, waut see mea hauden, om dee Christen to halpen, waut nich jenuach hauden.

 Woo feelen onse Breeda sikj doaräwa, wan see Unjastettunk kjrieen von een aundret Betel? En Tansania motten biejlikj mea aus de Halft Menschen met weinja aus 2 Dola dän Dach foadich woaren. Doa worden soone Gowen jebrukt, om een Vesaumlungshus opptofreschen, waut von de Mafinga-Vesaumlunk jebrukt woat. De Breeda von dise Vesaumlunk schreewen: “Von dan, aus ons Vesaumlungshus es oppjefrescht worden, komen doa väl mea no de Toopkomes. Wie sent Jehova siene Organisazion un de Breeda oppe gaunze Welt sea dankboa fa äare Gowen, wiels doaderch hab wie nu eene wundaschmocke Städ, wua wie Jehova aunbäden kjennen.”

 Eenje von onse Breeda en Sri Lanka es daut aul sea knaup jegonen wäajen de COVID-19-Krankheit. Imara Fernando un äa kjliena Jung Enosh sent eenje von dee. Oba derch de Gowen von aundre Betels haben see dee Help jekjräajen, waut an fäld. See muaken eene Koat un schreewen: “Wie bedanken ons bie dee Breeda, waut ons en dise schwoare Tiet soo väl Leew jewäsen haben. Wie sent sea schaftich, daut wie Poat von dise jeistelje Famielje sent. Wie bäden wieda to Jehova, daut hee aul onse Breeda en dise latste Tiet halpen mucht.”

 Krakjt endoont, wua onse Breeda un Sestren sent, dee aula wellen daut jäwen, waut see kjennen. Enosh biejlikj muak sikj een kjlienet Gowenkaustkje, daut hee uk kunn Gowen jäwen, om dee Famieljes to halpen, waut daut fäld. Guadalupe Álvarez es krakjt soo friejäwrich. See wont opp eene Städ en Mexiko, wua de mieeschte nich eene fauste Oabeit haben un dee poa, waut eene fauste Oabeit haben, kjrieen mau een sea biljet Loon. Oba see jeft doawäajen soo väl Gowen, aus see kaun. See schrift: “Ekj sie Jehova dankboa, daut hee soo goot un soo leeftolich to mie es. Ekj weet, daut miene Gowen toop met aundre äare dee Breeda halpen woaren, waut daut werkjlich fält.”

 Betels, waut Jelt no soone Städen schekjen, wua dee daut werkjlich fält, sent sea schaftich, daut see daut doonen kjennen. Anthony Carvalho, waut en daut Betelkommitee von Brasilien es, sajcht: “Fa väl Joaren brukt wie fa daut Woakj en ons Launt de Unjastettunk von aundre Betels. Derch dise Help haft daut Prädichtwoakj en ons Launt sea toojenomen. Oba wäajen daut hia em tieteljen nu bäta jeworden es, hab wie de Iea, daut wie aundre halpen kjennen. Onse Breeda seenen daut Prädichtwoakj aus een weltwiedet Woakj un dee kjennen seenen, daut see aus Jesus siene Jinja aundre unjastetten kjennen, onen doabie aun sikj selfst to denkjen.”

 Woo kjennen Jehova siene Zeijen äare Breeda un Sestren halpen, waut daut werkjlich aun Help fält? Nich doaderch, daut dee Jelt no een Betel von een aundret Launt schekjen, oba wan dee Gowen jäwen fa daut Woakj oppe gaunze Welt. Daut kaun eena, wan eena Jelt enlajcht en dän Gowenkausten fa daut Woakj opp de gaunze Welt em Vesaumlungshus ooda derch donate.pr418.com. Aul dise Gowen woaren werkjlich sea jeschazt.