En Jaunewoa 2021 muak de Väastaunt bekaunt, daut wie een nieet Buak met dän Tietel Een scheenet Läwen fa emma! a brucken woaren, om met aundre toop de Bibel to studieren. Woo feelsd du die, aus dee daut bekauntmuaken? Matthew von Kanada sajcht: “Ekj freid mie sea! Un aus ekj de Räden un de Videos sach, waut daut utlajen deeden, wuarom see daut Buak jemoakt haben, un woo see utjefungen haben, woo goot daut schauft, freid ekj mie noch dolla. Ekj kunn daut meist nich aufluaren, daut Buak to seenen un to brucken.”

 Daut Buak Een scheenet Läwen fa emma! es eene niee Wajch, om met aundre toop de Bibel to studieren. Oba daut es nich de eensja Unjascheet tweschen daut niee Buak un de Bieekja, waut wie ea brukten. Wan du daut jedrekjte Buak Een scheenet Läwen fa emma! brukst, dan hast du daut veleicht uk aul met diene Henj jemoakt, daut sikj daut aundasch späat. Toom seenen, wuarom daut soo es, well wie mol kjikjen woo daut Buak jemoakt es.

 Dikjaret Papia. Wuarom wia daut needich? Wan daut Papia wudd denn sennen, dan wudd daut Jeschräwne un de Bilda opp de aundre Sied derchtoseenen sennen, wan uk mau een bät. Doawäajen deeden de Breeda von de internazionale Drekjarie-Aufdeelunk en de Stäts en Wallkill, New York, vea veschiedne Sorten Papia testen, waut wie en onse Drekjarie brucken. De Breeda vom Schriewkommitee vom Väastaunt unjasochten jieda Sort Papia, om to seenen woont daut weinichste wudd derchtoseenen sennen. Wan dit Papia uk rom 16 Prozent diera es aus daut Papia, waut wie fa aundre Bieekja brucken, es daut oba bäta. Daut Buak Een scheenet Läwen fa emma! haft äwa 600 Bilda met veschiedne Kalieren. Daut es meist tieen Mol soo väl aus en daut Lieet-ons-Buak! En daut niee Buak es opp de Sieden weinja jeschräwnet ooda jemoldet. De Bibelschiela kjennen soo jieda Sied von daut Buak Een scheenet Läwen fa emma! läsen, onen daut de Bilda von de aundre Sied derchtoseenen sent.

 Eene aundre Sort Omschlach. De Omschlach von daut niee Buak es aundasch aus dee von de aundre Bieekja, wiels dee eenen Schutz haft von Plastikj, waut nich blenkjat. Un doawäajen es daut Bilt opp dän Omschlach bäta to seenen. Un dis Schutz halpt uk, daut daut Buak nich soo schwind vebrukt woat. Oba dis Schutz von Plastikj, waut nich blenkjat, es fief Mol diera aus eena, waut blenkjat. Soo daut daut bilja kjeem, stunden sikj miere Betels toop, om disen Schutz to kjeepen.

 Wuarom brukten see dän dieren Omschlach? Een Brooda, waut met de internazionale Drekjarie-Aufdeelunk toopschauft, sajcht: “Wie weeten, daut daut Buak woat sea jebrukt woaren. Un wie wullen, daut daut dan noch wudd schmock loten, wan daut uk sea jebrukt es.” Eduardo, waut en de Drekjarie-Offiz en daut Betel von Brasilien schauft, sajcht: “Wie sent sea froo, daut Jehova siene Organisazion soont brukt, daut daut Buak schmock lat, lang uthelt un scheen jeit to brucken, un daut de Gowen opp eene goode Wajch jenuzt woaren.”

 Wie fungen met daut drekjen von daut Buak Een scheenet Läwen fa emma! en Moaz 2021 aun un daut wia en de Tiet von de COVID-19-Krankheit. Daut wia schwierich, wäajen dee, waut von buten komen toom em Betel methalpen, kunnen nich nenkomen. Un dee kjennen uk nich niee Breeda un Sestren enloden toom fa voll em Betel schaufen, un doawäajen fält daut en de Drekjarie aun Helpa. Eenje Drekjarieen wieren fa een Stootskje too, wäajen de Rejierunk en dise Tiet nich Frieheit jeef, doa to schaufen.

 Woo kunn wie dan wiedakomen met daut drekjen von daut Buak? Aus wie ieescht wada de Frieheit hauden, de Drekjarie to brucken, fruach wie Breeda un Sestren von aundre Aufdeelungen em Betel, aus dee fa een Stootskje en de Drekjarie halpen kunnen. Joel, waut bie de internazionale Drekjarie-Aufdeelunk schauft, sajcht: “Dee deeden wellich niee Sachen lieren, un wieren dolla om aundre todoonen aus om sikj selfst, un doawäajen kunn wie de Oabeit jedonen kjrieen.”

 Wan daut uk soo väl Schwierichkjeiten jeef, hab wie aul kunt millionende Bieekja von daut Buak Een scheenet Läwen fa emma! drekjen. Om daut Buak to moaken, fält daut aun veschiednet, soo aus Ploten toom drekjen, Plastikj fa dän Omschlach, Papia, Tint un Liem. Fa daut hab wie aul en de ieeschte fief Moonat äwa 2,3 Millionen stätsche Dola jebrukt. Toom Jelt spoaren, proow wie bloos soo väl Bieekja to drekjen, waut de Vesaumlungen werkjlich fält.

 Waut denkjen Bibelliera un Bibelschiela äwa daut niee Buak, waut wie nu brucken? Paul, een Brooda von Australien, sajcht: “Daut Buak Een scheenet Läwen fa emma! jeit soo scheen to brucken, daut ekj mie sea frei, wan ekj met wäm kaun de Bibel studieren. Daut es sea scheen soo aus daut Buak jemoakt es, un de Bibelliera un de Bibelschiela kjennen sikj fein unjahoolen. Daut es sea fein toopjestalt un kloa to vestonen. De Froagen halpen dän Bibelschiela to sajen, waut dee em Hoaten haft. Doa sent uk Videos, Bilda un Listen bennen un uk waut de Schiela sikj venämen sull. Daut es soo wundascheen jemoakt, un daut brinjt mie bat doa, daut ekj noch een bätra Liera well sennen.”

 Een Bibelschiela enne Stäts sajcht: “Ekj jleich daut niee Buak eefach sea. De Bilda halpen mie, de wichtichste Lieren to vestonen. De Videos gonen mie to Hoaten un halpen mie daut notokomen.” Hee studieet tweemol de Wäakj un es pinkjlich bie de Toopkomes.

 Doa motten noch millionende Bieekja von daut Buak Een scheenet Läwen fa emma! opp veschiedne Sproaken jedrekjt. Bat nu haft de Väastaunt Frieheit jejäft, daut dit Buak opp 710 Sproaken kaun rutjejäft woaren; daut sent 340 mea aus daut Lieet-ons-Buak!

 Woo woaren de Onkosten fa daut drekjen jedakjt? Derch Gowen fa daut Woakj oppe gaunze Welt, un väle brucken doatoo donate.pr418.com. Wie räakjnen daut sea, woo friejäwrich jie sent, wiels daut halpt ons, mea Bieekja to moaken toom de Bibel studieren. Soo kjennen mea Menschen von Jehova lieren un “fa emma een scheenet Läwen haben” (Psalm 22:27, NW).