Jehova siene Zeijen kjrieen nu soo väl ellektroonische biblische Bieekja un Videos aus noch kjeenmol ea. Oba opp väl Städen oppe Welt haben onse Breeda nich soo väl Jelt toom Internet kjeepen. Aundre wonen opp soone Städen, wua daut Internet foaken goanich schauft, sea langsom es ooda verheipts kjeen Internet es.

 Un doch kjennen onse Breeda un Sestren nu de ellektroonische Bieekja un Videos raufloden, wan daut doa uk kjeen Internet jeft. Woo es daut mäajlich?

 Daut jeft eene kjliene JW Box, waut no Vesaumlungen jeschekjt woat, waut meist nich Internet haben. Dit kjliene Dinkj haft eenen Utstrola, waut se von eene Kompanie jekoft haben, un een Program, waut de Komputa-Aufdeelunk vom Betel jemoakt haft. En dise kjliene Box sent aule ellektroonische Bieekja un Videos bennen, waut daut opp jw.org jeft. Jieda Box kost soo bie 75 stätsche Dola.

 Em Vesaumlungshus kjennen de Breeda un Sestren sikj dan met äare Fons un Tablets met de JW Box toopknekjen un Bieekja un Videos raufloden. Mau rajcht soone, waut een ooltmootschet ooda biljet Fon haben, kjennen sikj fein toopknekjen. Oba wan eene Vesaumlunk nich Internet haft, woo kaun dise JW Box dan emma de nieste Bieekja un Videos haben? Daut Betel schekjt emma wada USB-Dinja un jieda eent kost rom 4 stätsche Dola. Doa bowen es daut nieste von jw.org un daut kaun dan opp de JW Box noppjelot.

 Woo es de JW Box onse Breeda togood jekomen? Nathan Adruandra, waut en de Demokratische Republikj Kongo wont, sajcht: “Ekj hab lang emma jeprooft, de lange Videos rauftoloden Jehova, ekj vetru opp die un Denkjt aun Lot siene Fru. Oba daut wia kjeenmol mäajlich, un daut muak mie sea mootloos. Oba nu kaun ekj dise Videos opp mien Fon raufloden, un daut halpt ons aus Elren, daut wie onse Kjinja noch bäta lieren kjennen.”

 Een Brooda, waut Vesaumlungen en Nigeria halpt, dise JW Box opptostalen, sajcht: “De Breeda talen dise JW Box aus een besondret Jeschenkj von Jehova. Dee sent sea schaftich, daut see nu soo leicht kjennen de Bieekja un Videos raufloden, waut fa ons Jereetschoft fa dän Deenst sent.”

 Äwa 1 700 soone Dinja sent aul no onse Breeda jeschekjt worden, biejlikj no Afrika, de Pazifische Inslen un no Sied-Amerika. Un doa es jeplont, daut doa noch väl mea soone Dinja no Vesaumlungen jeschekjt woaren. Woo woat daut aules betolt? Met Gowen, waut fa daut Woakj oppe gaunze Welt jejäft woaren, un väle woaren derch donate.pr418.com jejäft. Sea dankscheen, daut jie soo friejäwrich sent met june Gowen.