Jehova moakt daut Freid, siene Deena uttolieren. Doawäajen jeft daut en siene Organisazion miere Schoolen, wua wie fa onse Oppgowen em Deenst utjelieet woaren. Eent von dise Schoolen es de School fa Kjennichrikjsvekjindja (SKE). Enne latste Joaren haft Gott siene Organisazion daut vebätat, waut bie dise School jelieet woat un uk woo de Jebieda sent, wua de Klaussen aufjehoolen woaren. Eent von daut wichtichste es, daut de Schiela uk de Lierasch daut leichta es to lieren. Woo woaren june Gowen jebrukt, om de Städen fa dise Schoolen bäta to moaken?

 Fa väl Joaren worden onse Bibelschoolen en Vesaumlungshiesa ooda Kongresshiesa aufjehoolen. Wuarom wia daut dan needich, daut wie de latste Tiet noch mea Jebieda jebut ooda oppjefrescht haben uzhent fa onse Bibelschoolen? Hia sent mol dree Jrind.

 Daut fält aun mea Help. Christopher Mavor es een Helpa von daut Deenstkommitee vom Väastaunt un hee sajcht: “Von veschiedne Betels weet wie, daut an daut aun väl mea Breeda un Sestren fält, waut en äare Vesaumlungen halpen kjennen. Aune 2019 biejlikj säd daut Betel von Brasilien, daut an daut aun ojjefäa 7,600 Breeda un Sestren fälen wudd, waut von de SKE kjeemen, om de Vesaumlungen von äare Jäajent to unjastetten.” Dee, waut de School derchjegonen sent, kjennen uk noch opp eene aundre Wajch halpen. Daut Betel von de Stäts säd, daut an daut sea aun Pionieren fälen wudd, waut aundre utlieren kunnen fa daut besondre prädjen en groote Städa un daut prädjen bie Howes ooda en Jefenkjnisen. Buta daut fält daut uk aun Breeda, waut bie de Aufdeelunk fa daut Buwoakj (LDC) halpen kjennen un bie daut Hospitol-Vemedlungs-Kommitee.

 Doa sent väl mea Schiela. En väl Betels haben sikj mea Breeda un Sestren fa de School aunjejäft, aus see werkjlich enloden kjennen. En Brasilien biejlikj hauden sikj benna een Joa rom 2,500 fa de SKE aunjejäft. Oba wäajen doa nich Rum wia toom soo väl Klaussen aufhoolen, kunnen se mau bloos 950 Schiela enloden.

 Daut fält aun paussende Stowen fa de Schiela. Wan eene School en een Kongress- ooda Vesaumlungshus aufjehoolen woat, kjennen de Schiela jeweenlich bie Breeda doa dicht bie bliewen. Daut schauft fein en Lenda, wua daut mau wietleftich Klaussen jeft. Oba doa, wua daut jieda Joa miere Klaussen jeft, es de Breeda daut veleicht nich mäajlich, fa soo väl Moonaten em Joa Schiela opptonämen. Doawäajen woat doano jeseenen, daut de Schiela en soone Jebieda bliewen kjennen, waut uzhent fa an enjerecht sent un waut doa dicht bie sent, wua de Klaussen aufjehoolen woaren.

 Soon Jebied haft jeweenlich eene groote Stow fa Klaussen un uk Rum fa de Stowen un noch aundret, waut de Lierasch un ojjefäa 30 Schiela brucken. Doano wua daut es un waut doa sest noch met en es, kaun soon Jebied miere Millionen stätsche Dola kosten.

 Schooljebieda woaren jeweenlich butakaunt groote Stauten oppjestalt, wua daut ruich es un wua daut leicht jeit hantofoaren. Doa woat besonda no soone Jäajenden jesocht, wua aul väl Breeda un Sestren wonen, waut doabie methalpen kjennen, de School to ranen un daut Jebied un de Sachen doa to unjahoolen.

 En soon Jebied jeft daut eene Bibliotäkj, Rum toom studieren, Komputasch un noch aundret, biejlikj toom waut utdrekjen. Foaken jeft daut doa uk eene Ätstow, wua de Schiela un de Lierasch kjennen toop äare Moltieden haben. Un dan jeft daut doa noch Rum, wua eena sikj vereiwen kaun ooda toom ekserseisen.

 Doa woat besonda no jekjikjt, woo de Stow sennen saul, wua de Klaussen aufjehoolen woaren. Troy halpt en Warwick, New York, bie de Aufdeelunk fa daut Buwoakj oppe gaunze Welt. Hee sajcht: “Wie fruagen de Aufdeelunk fa Bibelschoolen no Help, daut see ons wiesen kunnen, woo wie de Stowen fa de Klaussen enrechten sullen, soo daut de Schiela doa bäta lieren kunnen. De Breeda säden ons mea doaräwa, woo groot de Stow sennen sull, woo dee oppjestalt must un uk woo daut sennen sull met daut Licht un daut Audio/Video-Jereetschoft.” Äwa daut Audio/Video-Jereetschoft sajcht Zoltán, waut en Ungarn Schoolliera es bie de SKE: “Aum Aunfank must wie de Schiela denkjen halpen, daut see luda räden sullen, wiels wie nich Mikrofoons hauden. Oba nu es doa bie jieda Desch een Mikrofoon un daut es väl bäta.”

 Woo denkjen de Schiela un de Lierasch doaräwa, daut se daut bäta jemoakt haben met de Jebieda fa de Schoolen? Angela, waut en Palm Coast, Florida, enne Stäts no de SKE jegonen wia, sajcht: “Opp dise Städ es daut sea aunjenäm un ruich. Un daut Hus fa de School es fein jeplont, soogoa de Stow fa de Klaussen un onse ieejne Stowen, soo daut wie biem studieren un lieren gaunz bie de Sach bliewen kjennen.” Csaba es een Liera bie eent von dise Schoolen en Ungarn, un hee jleicht daut sea, daut hee fa de Moltieden met de Schiela toopsennen kaun. Hee sajcht: “Foaken vetalen de Schiela [biem Desch] mea von sikj un waut dee beläft haben. Soo kaun eena aus Liera dee bäta kjanen lieren. Un enne Klaussen es daut dan leichta dän Schoolplon doano paussent to moaken, waut de Schiela fält.”

 Daut daut nu bätre Jebieda fa de Schoolen jeft, talen de Schiela uk de Liera aus eenen Säajen von Jehova, dee ons “Groota Liera” es (Jesaja 30:20, NW; 30:21, PB). Eene Sesta von de Filippinen, waut de SKE en een Jebied haud, waut uzhent doafäa omjebut wort, sajcht soo aus dit: “Soo aus aules enjerecht wia fa de School, späad sikj daut soo, daut wie nich bloos Schiela wieren, oba Jehova siene besondre Jast. Hee well haben daut ons daut scheen jeit; dän Tiet, waut wie deep sien Wuat studieren.”

 Derch june Gowen, waut väle opp donate.pr418.com jäwen, kjennen Jebieda fa Schoolen jebut, oppjefrescht un unjahoolen woaren. Wie sajen von Hoaten dankscheen, daut jie soo friejäwrich Gowen jäwen.