Musikj es een scheenet Jeschenkj von Jehova. Daut kaun waut aun onse Jefeelen doonen, woo wie denkjen un ons uk oppmuntren, waut to doonen. Un onse besondre Leeda doonen noch mea aus daut: Dee kjennen ons Jehova noda brinjen.

 Von 2014 aun sent aul äwa 70 von de besondre Leeda jemoakt worden. Un oppet weinichste eent von dise Leeda jeft daut aul opp äwa 500 Sproaken! Oba veleicht hast du mol jewundat: “Wäa moakt dee un waut mott doa aules jedonen toom dee moaken?”

 De besondre Leeda woat von Breeda jemoakt, waut en de Audio- un Video-Deensten schaufen. Un daut Liakommitee vom Väastaunt es äwa dise Breeda aunjestalt. En dise Grupp sent 13 Breeda un Sestren, waut biejlikj halpen de Leeda dichten, Musikj toopstalen, plonen un aundre Oabeit doonen, waut doatoo needich es. Un daut Liakommitee haft uk Frieheit jejäft, daut friewelje Tusoabeida von aulawäajen oppe Welt bie dit methalpen kjennen. Daut sent biejlikj Breeda un Sestren, waut Leeda dichten, Musikj moaken un sinjen. Dee vestonen sikj sea goot doamet, oba dee halpen deemootich met, onen daut dee selfst wellen de Iea doafäa kjrieen.

 Woo woat een besondret Leet jemoakt? Ieescht woat daut Liakommitee sikj eenich, opp waut von Bibelvarsch dit Leet sikj stetten saul un uk waut dit Leet aun de Menschen, waut daut horchen woaren, doonen saul. Dan kjemt de Grupp Breeda toop, waut met de Leeda schaufen, un dee plonen, wäa de Musikj woat toopstalen un wäa de Leeda dichten woat. Un dan schnaken dee een Proowstekj doavon opp. Lota horcht daut Liakommitee sikj daut äwa un jeft noch wieda Aunwiesungen. No daut moaken de Breeda, waut met de Leeda schaufen, de Endrungen, waut needich sent, un dan schnaken dee daut soo opp, aus daut bliewen saul. Wua woaren dise Leeda oppjeschnakt? Daut kaun opp veschiedne Städen sennen, soo aus en Betels ooda uk bie de Breeda tus.

 Toom de besondre Leeda oppschnaken un dichten, brucken de Breeda veschiedne Komputa-Programs. Dee brucken uk Musikj-Instrumenten un aundret Jereetschoft toom jewesset biejlikj luda moaken, toom de Musikj toopstalen, uk Spiekers un Mikrofoons. Dise Mikrofoons kjennen von 100 bat äwa 1 000 stätsche Dola kosten. Aune 2020 wort 116 000 stätsche Dola jebrukt toom soon Jereetschoft kjeepen.

 Waut doonen de Breeda toom daut Jelt von de Gowen rajcht brucken? Enne Städ daut dee eene groote Grupp Breeda em Betel aunstalen toom aun de Leeda schaufen, brucken dee väl friewelje Tusoabeida. Un enne Städ daut doa werkjlich opp eene Städ väl Breeda toopkomen un Musikj moaken, kjennen de Breeda daut met Komputa-Programs doonen.

 De Breeda un Sestren jleichen daut, de besondre Leeda to horchen. Tara, waut en Dietschlaunt wont, sajcht: “Dee Leeda halpen, mie to berujen, wan ekj daut met waut schwoa hab. Dee opp miene Sproak to horchen es soo, aus wan Jehova mie wudd ompaken.” Een Brooda von Kasachstan, waut Dmitri heet, sajcht: “Ekj jleich daut, daut ekj kaun no dise Leeda horchen, onen daut ekj mie mott Sorjen moaken, aus doa waut jesajcht woat, waut jäajen de Schreft es. Un dee halpen mie uk, daut jeistelje em Uag to hoolen.”

 Delia von Sied-Afrika sajcht äwa de besondre Leeda: “Dee halpen mie, mienen Gloowen stoakj to hoolen. Wan ekj mootloos sie ooda eenen Trubbel hab, dan jeft daut emma een Leet, waut dan jroz paussent es fa mie. Foaken es daut aul jenuach, bloos de Mellodie to horchen, daut ekj mie bäta feel!”

 Väl Breeda haben mank de besondre Leeda aul soone jefungen, waut see sea jleichen. Lerato, waut uk en Sied-Afrika wont, sajcht: “Wan ekj de Leeda Aul gaunz dicht bie un De niee Welt, waut Gott vesprakjt horch, dan stal ekj mie daut väa, woo ekj miene leewe Mame wada woa oppnämen. Jiedatsmol, wan ekj no dise Leeda horch, dan stal ekj mie väa, daut see no mie rant met opne Oarms.”

 Een besondret Leet holp eene junge Mejal en Sri Lanka sea. See sajcht: “Miene Schoollierasche grunzt mie sea ut ver de aundre Schoolkjinja, wäajens ekj eent von Jehova siene Zeijen sie. Ekj haud Angst un wist nich, waut ekj sajen sull. Aus ekj no Hus kjeem, dan rod miene Mame mie too, daut ekj daut Leet Studium macht dich stark sull horchen. Daut Leet holp mie to vestonen, daut ekj must studieren un mie reedmoaken, om to weeten, waut ekj sajen kunn. Dän näakjsten Dach räd ekj met miene Schoollierasche. See horcht mie too un säd, daut see nu bäta vestonen kunn, waut Jehova siene Zeijen jleewen. Ekj sie Jehova siene Organisazion sea dankboa fa soone Leeda aus dise, waut ons Moot jäwen.”

 Von wua kjemt daut Jelt häa toom dise Leeda moaken? Von de Gowen, waut jie fa daut Woakj oppe gaunze Welt jäwen, soo aus daut opp donate.pr418.com utjelajcht woat. Sea dankscheen, daut jie soo friejäwrich sent!