Onse Bieekjakrotasch sent nu aul fa äwa tieen Joa een wichtjet Poat von onsen Deenst un dee faulen de Menschen sea opp. Aulawäajen oppe Welt weeten de Menschen fuaz, to wäm dise Krotasch jehieren. Dee sitt nich bloos schmock, oba dee sent uk sea hendich. Veleicht jeit die daut uk soo aus Asenata, eene Sesta en Poolen, waut sajcht: “De Bieekjakrotasch sent eefach jebut, oba dee lat doawäajen sea schmock. Dee sent leicht to brucken un mettonämen.”

 Hast du die uk aul mol jefroacht, woo se sikj daut utjedocht haben un woo dee jemoakt woaren?

 Aune 2001 jeef de Väastaunt Frieheit, daut de Breeda un Sestren en Frankreich veschiedne Sorten effentlichet prädjen proowen kunnen. Eent von daut wia met Krotasch. Dee haben veschiednet jeprooft: Biejlikj haben dee Schemmedauns un Krotasch soo enjerecht, daut dee doamet kunnen de Menschen nich bloos Bieekja wiesen, oba uk noch mea Bieekja metnämen. Met de Tiet worden de Breeda von daut Betel en Frankreich sikj eenich, bloos eene Sort von dise Krotasch to brucken, un de Vekjindja haben dee fa väl Joaren em Deenst jebrukt.

 De Breeda en Frankreich freiden sikj sea, woo goot daut met dise niee Sort effentlichet prädjen utkjeem. Doawäajen jeef de Väastaunt aune 2011 Frieheit, daut se noch waut aundret proowen kunnen fa daut effentliche prädjen. Dit mol wia daut en New York City enne Stäts un dee deeden Bieekjakrotasch un uk Deschen met Bieekja brucken. De Pionieren, waut doa metmuaken, worden boolt en, daut de Bieekjakrotasch en väl Stekjen bäta wieren – biejlikj kunn eena dee sea leicht metnämen. Dise Pionieren hauden uk gooden Rot, woo eena dise Krotasch noch bäta moaken kunn. De ieeschte Krotasch wieren von Holt jemoakt un wieren ernoa schwoa. Doawäajen wia daut nich leicht, daut eena dee bie Trapen nopp ooda rauf nämen kunn. Aus dee dan niee Krotasch muaken, muaken se dee leichta, oba uk nich soo leicht, daut de Wint dee omweien kunn. De niee Bieekjakrotasch hauden uk jratre un bätre Räda. Daut holp besonda opp soone Wäaj, waut een bät struckrich wieren. Un hinjen deeden dee noch eenen kjlienen Kausten naunbuen, wua eena noch mea Bieekja metnämen kunn.

 Un wada kjeem daut sea goot ut, waut se proowden. Aune 2012 jeef de Väastaunt dan Frieheit, daut se dise Krotasch aulawäajen oppe Welt brucken kunnen. Doa worden uk Plons jemoakt met eene Kompanie, waut fuaz een deel von de Krotasch opp een mol moaken kunn – un dee sullen dan uk leicht sennen un lang hoolen.

 Met de Joaren haben se de Bieekjakrotasch emma wada een beskje vebätat. Biejlikj aune 2015 muaken se eenen Räajenschutz von Plastikj, waut väaren derchsechtich wia. Dina, waut en Georgien wont, jleicht dit sea. See sajcht: “Nu haft de Bieekjakrota sien ieejnet, kjlienet Räajenwanikj, daut de Bieekja nich naut woaren!” Vonne 2017 aun wieren de Zeins fa de Bieekjakrotasch opp eenje Sproaken eefacha omtotuschen, wäajen dee schauften dan met eenen Magneet. Tomasz, en Brooda en Poolen, sajcht: “Ea wia daut een deel Oabeit, de Zeins omtotuschen, aus dee doa noch noppjebakt wieren. Nu es daut väl leichta, wäajen dee eenen Magneet haben.” Aune 2019 fungen se dan aun, de Bieekjakrotasch noch wieda to vebätren, daut dee noch lenja sullen hoolen.

 De Bieekjakrotasch woaren aula von eene Kompanie jebut un dan no Vesaumlungen oppe gaunze Welt jeschekjt. Nu jroz kost een Bieekjakrota 43 stätsche Dola, un doatoo komen noch de Onkosten fa daut Schekjen un aundret. Bat nu haben de Breeda äwa 16 Millionen stätsche Dola fa daut jebrukt un dee haben uk aul äwa 420,000 Bieekjakrotasch no Vesaumlungen oppe gaunze Welt jeschekjt.

 De Breeda bestalen emma fuaz een deel Bieekjakrotasch opp een mol, wäajen soo aus dit kjennen dee de Gowen daut baste brucken. Un de Vesaumlungen kjennen nu uk oppoat Repäares bestalen. Wan waut twei es, brucken dee nich fuaz eenen freschen Bieekjakrota, oba dee kjennen dän wada foadich moaken.

 Oppe gaunze Welt jleichen de Breeda dän Bieekjakrota sea. Martina von Ghana sajcht: “Wan wie prädjen, dan go wie de mieeschte Tiet no de Menschen. Waut ekj bie dän Bieekjakrota jleich, es, daut de Menschen dan no ons komen. Daut es mau rajcht een Zeichnis, wan de Menschen doa bloos vebiegonen.”

 En een aundret Launt en Afrika kjeem een Maun no dän Bieekjakrota un neem sikj doa Bieekja, waut opp siene Sproak wieren. Eene Wäakj lota kjeem hee wada trigj un säd to de Breeda: “Ekj hab aul de Bieekja jeläst. Waut doa bennen steit, es sea wichtich! Ekj woa to miene Famielje en mien Darp äwa aul dit räden.” Dän sien Darp wia rom 500 Kilomeeta (311 Miel) wiet auf. Twee Moonat lota kjeem hee dan wada trigj un säd: “De Menschen en mien Darp haben aul de Bieekja jeläst, un dee jleichen daut sea. Dee wellen Jehova siene Zeijen woaren! Dee haben oba noch Froagen, biejlikj wellen dee sikj deepen loten, oba doa, wua wie wonen, es nich een Riefa. Mott wie hia han komen toom ons deepen loten?” De Breeda räden dan met eenen Pionia, waut dän Maun siene Sproak räd, daut dee sikj om am kjemmat. Von dan aun haben dise beid pinkjlich kunt äwa de Woarheit räden.

 Daut es bloos sea scheen to seenen, woo de Bieekjakrotasch jebrukt woaren, daut “en de gaunze Welt jeprädicht [woat] . . ., soo daut aule Velkja daut hieren” (Matäus 24:14, PB). Woo kaun aul dit betolt woaren? Derch de Gowen, waut fa daut Woakj oppe gaunze Welt jejäft woaren. Väle von dise Gowen woaren derch donate.pr418.com jejäft. Sea dankscheen, daut jie soo friejäwrich sent!