Jesus säd to siene Jinja: “Jie woaren miene Zeijen sennen . . . äwa de gaunze Welt” (Aposteljeschicht 1:8, PB). Jehova siene Zeijen komen dit Jeboot vondoag dän Dach flietich no. Oba opp jewesse Städen oppe Welt es noch nich väl jeprädicht worden un doa sent uk Städa met en, wua een deel Menschen wonen. Un en eenje Lenda sent mau weinich von Jehova siene Zeijen (Matäus 9:37-38). Waut doo wie, daut doa soo väl Menschen aus mäajlich jeprädicht woat?

 Daut wie Jesus sien Jeboot noch bäta nokomen kjennen, deit daut Deenstkommitee vom Väastaunt von Jehova siene Zeijen Missionoaren no soone Städen oppe gaunze Welt schekjen, wua daut needich aun Help fält. Nu jroz sent daut 3 090 Missionoaren äwa de gaunze Welt. a De mieeschte sent bie eene Bibelschool utjelieet worden, biejlikj bie de School fa Kjennichrikjsvekjindja. Missionoaren sent wellich reed, äa Tus to veloten un no een framdet Launt to trakjen. Wiels dee jeistlich riep un utjelieet sent un väl Erfoarunk haben, kjennen dise true Missionoaren halpen de goode Norecht to prädjen un sent een goodet Väabilt fa de niee Breeda.

 En jieda Betel schauft daut Betelkommitee met daut Poat en de Deenstaufdeelunk toop, waut sikj om de Sondavoltietdeena butakaunt Betel kjemmat. Soo sorjen dee doafäa, daut de Missionoaren eene paussende Woninj haben un doktren kjennen un een bät Jelt toom läwen haben. En daut Deenstjoa 2020 haben Jehova siene Zeijen meist 27 Millionen stätsche Dolla fa de Missionoaren jebrukt. Wiels fa de Missionoaren jesorcht woat, kjennen dee sikj gaunz un goa fa dän Deenst ensaten un äare Vesaumlunk halpen.

 Waut fa goodet haben de Missionoaren fa daut Prädichtwoakj jedonen? Frank Madsen, waut en daut Betelkommitee en Malawi deent, sajcht: “De Missionoaren sent sea äwanäment un vestonen sikj fein met dän Deenst. Doaderch haben dee de Vesaumlungen jeholpen, opp soone Städen to prädjen, wua daut nich soo leicht es, soo aus wua de Hiesa sea vesechat sent ooda wua de Menschen eene aundre Sproak räden. Dee sent uk een goodet Biespel fa aundre, wiels dee sikj sea aunstrenjen eene niee Sproak to lieren un sikj to eene aundre Sort Menschen to wanen. Dee halpen de junge Menschen uk, äwa dän Voltietdeenst notodenkjen. Wie sent Jehova sea dankboa fa de Missionoaren.”

 Een Brooda, waut en een aundret Launt em Betelkommitee deent, sajcht: “De Missionoaren sent een Bewies, daut Jehova siene Deena äwa de gaunze Welt veeent sent. Mau rajcht soone, waut nich von Jehova siene Zeijen sent, kjennen daut seenen, daut wie nich eenen Unjascheet manke Menschen moaken, wiels de Schreft ons jelieet haft, ons soo tooptohoolen aus Breeda un Sestren.”

 Woo haben de Missionoaren de Vekjindja von äare Vesaumlunk jeholpen? Paulo wont en Timor-Leste un es sea dankboa fa de Missionoaren en siene Vesaumlunk. Hee sajcht: “Doa, wua wie wonen, es daut grulich sea woam. Wan de Missionoaren uk von eene kolde Jäajent komen, haben dee wäajen daut Wada nich oppjehieet to prädjen. Zemorjes sent dee emma bie daut Toopkomen fa dän Prädichtdeenst. Ekj hab foaken jeseenen, woo dee aum Nomeddach, wan daut soo rajcht woam es, äare Wadabesuchs moaken, krakjt soo aus aum Zeowes. Dee haben mie un uk väl aundre jeholpen, de Woarheit kjanen to lieren. Fa dee jeft daut nuscht waut wichtjeret, aus Jehova to deenen, un doaderch daut dee soo flietich un bejeistat sent, wirkjt sikj daut opp de gaunze Vesaumlunk ut.”

 Ketti es eene Pionia-Sesta en Malawi. See kaun sikj noch besennen, woo een Ehepoa, waut Missionoaren wieren, äare Famielje jeholpen haben. See sajcht: “Aus dee no onse Vesaumlunk kjeemen, wia ekj de eensje von Jehova siene Zeijen en miene Famielje. Dee haben mie sea jeholpen un sent goode Frind von miene Famielje jeworden. Dee äa feinet Biespel haft onse Kjinja jeholpen to seenen, woo schaftich un tofräd daut moakt, Jehova to deenen. Doaderch daut de Missionoaren soon goodet Biespel wieren, haben onse dree Mejalen met dän Pioniadeenst aunjefongen un mien Maun haft aunjefongen, no de Toopkomes to wanken.”

 Von wua kjemt daut Jelt, waut fa de Missionoaren jebrukt woat? Von de Gowen, waut fa daut Woakj oppe gaunze Welt jejäft woaren, biejlikj opp donate.pr418.com. Wie räakjnen daut sea väl, daut jie soo friejäwrich sent!