Jehova siene Zeijen leewen äare Gloowesbreeda (1. Petrus 2:17). Doawäajen denkjen väle uk soo aus Tannis, eene Sesta von Kenia. See sajcht: “Ekj jleich daut to hieren, woo miene Breeda un Sestren daut oppe gaunze Welt jeit.” Oba woo kjennen soone aus Tannis un millionende aundre von Jehova siene Zeijen weeten, woo daut met äare Breeda steit? Doatoo jeft daut vonne 2013 aun opp onse Websied jw.org daut Poat “Norechten”.

 Doa jeft daut Norechten äwa Jehova siene Zeijen, dee opp to veloten sent, soo aus äwa een Buwoakj, wan de Bibel opp eene aundre Sproak äwasat woat, wan bie een Nootfaul utjeholpen woat un noch aundre Norechten. Derch dise Norechten hia wie uk von onse Breeda un Sestren, waut wäajen äaren Gloowen em Jefenkjnis sent. Doa jeft daut uk scheene Erfoarungen, waut ons Moot jäwen, biejlikj äwa een besondret Prädichtwoakj ooda äwa de Tiet von daut Owentmol. Oba wäa moakt dise Artikjels reed un woo woat daut jedonen?

 De Norechten opp jw.org woaren von de Norechten-Offiz enne Hauptoffiz rutjejäft. Dise Aufdeelunk recht sikj no de Aunwiesungen, waut see von daut Plonakommitee vom Väastaunt kjrieen un doa schaufen mea aus 100 Breeda un Sestren, un väle von dee aus friewelje Tusoabeida. Dee doonen biejlikj schriewen, sikj Sachen nosieekjen, äwasaten ooda uk Bilda un aundret toopstalen. Aundre wada räden met Rejierungsmana, Lierasch von Schoolen un Uniwersitäten, un uk met soone, waut fa een Tellewizhen- ooda Rädio-Stäschen schaufen ooda fa de Post. De Norechten-Offiz woat uk unjastett von äwa 80 Norechten-Aufdeelungen en de veschiedne Betels äwa de gaunze Welt.

 Om eene Norecht reedtomoaken, schauft de Norechten-Offiz enne Hauptoffiz met de Breeda toop, waut en de veschiedne Betels en de Norechten-Aufdeelungen sent. Wan onse Breeda von waut intressauntet hieren, dan unjastonen see sikj de Sach un sieekjen mea doaräwa no. Doa es met en, daut dee biejlikj wäm befroagen ooda met Utjelieede räden, un soo moaken dee sikj secha, daut daut aula soo es. Nodäm daut dee daut jedonen haben, woat de Artikjel jeschräwen, derchjeseenen un dan woaren doa noch Bilda biejedonen. Daut latste woat daut nom Plonakommitee jeschekjt, daut dee dise Norecht friejäwen.

 Waut sajen onse Gloowesbreeda äwa de JW Norechten? Cheryl es eene Sesta von dän Filippinen. See sajcht: “Ekj jleich daut sea, daut ekj aum Aunfank vom Dach Norechten läsen kaun äwa Jehova siene Organisazion un sien Volkj.”

 Väle von dee, waut dee JW Norechten läsen, worden en, daut dee aundasch sent aus de aundre Norechten. Tatiana von Kasachstan sajcht: “Ekj sie soo dankboa, daut ekj mie opp de Norechten opp jw.org veloten kaun. Wiels waut doa jeschräwen es, es woa.” Eene Sesta von Mexiko, waut Alma heet, sajcht: “Em Vejlikj met de schlajchte Norechten, waut daut sest soo jeft, moaken de JW Norechten eenem sea väl Moot.”

 De JW Norechten sent nich bloos opp to veloten, oba dee stoakjen uk onsen Gloowen. Bernard, waut en Kenia wont, sajcht: “Dise Norechten haben mie jeholpen, miene Breeda un Sestren äwa de gaunze Welt aus miene Famielje to talen, krakjt endoont von wua dee sent. Doaderch weet ekj uk dee äare Nomes un kaun dee em Jebäd brucken un kaun fa daut bäden, waut dee nu jroz derchmoaken.” Eene aundre Sesta en Kenia, waut Bybron heet, sajcht: “Ekj frei mie emma sea, wan daut en eenen Artikjel sajcht, daut de Bibel opp eene aundre Sproak äwasat wort! Soone Norechten wiesen mie, daut Jehova kjeen Unjascheet moakt.”

 Soogoa soone Norechten, wua daut sajcht, daut onse Breeda vefolcht woaren, kjennen waut goodet aun ons doonen. Jackline en Kenia sajcht: “Wan ekj doa äwa nodenkj, woo äwanäment dise Breeda sent, stoakjt daut mienen Gloowen sea. Ekj proow doano to kjikjen, waut de halpt uttohoolen. Ekj wort en, daut gaunz jeweenelje Sachen, soo aus bäden, Bibel läsen un soogoa sinjen, onse Breeda sea jeholpen haft, stoakj to bliewen.”

 Eene Sesta en Costa Rica, waut Beatriz heet, es uk dankboa fa de Norechten äwa Owwadasch. See sajcht: “Derch de JW Norechten kaun ekj seenen, woo fein, leeftolich un bosich onse Organisazion fa daut sorcht, waut onse Breeda fält. Daut äwazeicht mie, daut dit werkjlich Jehova siene Organisazion es.”

 Woo dankboa sent wie nich fa de nieste Norechten äwa onse Breeda von oppe gaunze Welt! Dit wudd nich mäajlich sennen, onen june Gowen fa daut Woakj oppe gaunze Welt, un väle von dise Gowen woaren opp donate.pr418.com jejäft. Sea dankscheen, daut jie ons soo friejäwrich unjastetten.