Aul äwa 130 Joa komen Jehowa siene Zeijen jieda Joa opp groote Vesaumlungen toop, waut wie Kongressen nanen. Soon Kongress-Program haft mea aus 40 Räden, wua Musikj, Befroagungen un Videos met en sent. Om daut deejanje waut doavon haben, waut no onse Kongressen komen, mott aules goot “jehieet un jeseenen” woaren (Lukas 2:20). Woo woaren june Gowen jebrukt, soo daut aule opp dise Kongressen eenen Nutzen von daut Program haben, endoont, wua dee wonen?

 Väle niemootsche Stadiums en de Lenda em Wasten haben aul Audio- un Video-Jereetschoft. Wan wie soone Städ fa eenen Kongress renten, woosoo doo wie doawäajen foaken ons ieejnet Jereetschoft oppstalen? David, waut en de -Broadcasting-Aufdeelunk enne Hauptoffiz schauft, sajcht: “Von de Städen, waut wie renten sent weinich doafäa jemoakt, daut de Menschen doa oppmoakjsom fa äwa sas Stund een Program aunhorchen, wua de mieeschte Tiet wäa rät. Biejlikj soone Städen, waut fa Sport-Späls enjerecht sent, brucken daut Jereetschoft toom to de Menschen mieeschtens bloos kort waut bekauntmoaken ooda toom Enjakjes Spell aufspälen. Dee brucken äare Tellewizhens toom wiesen, woo väl Punkta jieda Sied von de Späla haft, toom Aunjebots wiesen ooda toom Enjakjes von daut Gäm noch mol wiesen. Wie oba wellen, daut dee, waut doa sent, lenjre Videos kjikjen un daut dee jieda Wuat, waut doa vom Plautform jesajcht woat, kloa hieren un vestonen kjennen”.

 Jieda Städ fa eenen Kongress es veschieden, un doawäajen mott jieda Audio- un Video-Jereetschoft uzhent doano aunjepaust. Soo schwind aus se de Städen utjeläst haben, berät de Broadcasting-Aufdeelunk bie jieda Betel, wua de Menschen setten woaren. Dee rechten sikj doano, woo väl see talen daut doa hankomen woaren un uk woo väl Menschen doa bie de Städ nennkjennen. Dan beräden de Breeda wua de Spiekers un daut Jereetschoft toom Videos wiesen sellen oppjestalt woaren; dee talen sikj daut uk äwa, woo dee sellen toopjekjnekt sennen. Un dan moaken see eene List von aul daut Jereetschoft, waut doa fälen woat toom secha moaken, daut aule woaren kjennen daut Program hieren un seenen.

 Daut woat noch schwanda met daut Audio- un Video-Jereetschoft fa soone Kongressen, wua daut Program opp väl Sproaken woat äwajebrocht. Un wan daut Program opp eene aundre Sproak äwasat woat, dan motten de Äwasata daut Program ieescht hieren un seenen, un dan mott daut, waut dee äwasaten, äwa een aundret Rädio-Stäschen jebrocht, wua dee, waut dee Sproak vestonen, daut dan hieren kjennen. Un met een besondret Komputa-Program kjennen de Menschen de Videos tojlikj seenen, wan daut Audio uk opp acht veschiedne Sproaken es. David sajcht: “Daut haft noch waut opp sikj met dise Komputa-Programs omtogonen, un de friewelje Breeda, waut met dee Programs schaufen, mott sea fein utjelieet doatoo”.

 De mieeschte Betels haben soon Audio- un Video-Jereetschoft, waut jieda Joa jebrukt woat. Un doa, wua se soont haben, kjemren de Breeda sikj doarom, daut jieda Stekj von dit Jereetschoft von een Kongress no dän aundren jeschekjt woat. Bloos daut Betel enne Stäts brukt jieda Joa äwa 200,000 Dola a toom Kongress-Jereetschoft opp un dol schekjen. Oba dit kjemt doawäajen noch bilja, aus mea Jereetschoft to kjeepen un to unjahoolen. Steven, waut sikj en Kanada oppem Kongress om Audio- un Video kjemmad, vetalt: “Onse Audio- un Video-Grupp deed aules, waut mäajlich wia, om secha to moaken, daut jieda Bolten un Mieta un Drot un aule Sachen doa wieren un om jekjemmat un fein toopjepakt worden un soo reed wieren fa dän näakjsten Kongress.”

 Audio- un Video-Jereetschoft to to pachten kjemt grulich dia, un daut Jereetschoft es foaken goanich goodet un schlajcht unjahoolen. Doawäajen kjeep wie jeweenlich daut Jereetschoft, waut ons fält. Nu jroz kost eene LED-Video-Waunt fa bennen, waut 5 bie 3 Meeta (16 bie 10 Schoo) groot es, rom 24,000 Dola. Un een 15-meetaja (50-schooja) Mikrofoon-Drot es aul 20 Dola. Doawäajen schauft de Broadcasting- met de Enkjeep-Aufdeelunk toop toom de “Kosten uträakjnen”, ea dee irjent Jereetschoft kjeepen (Lukas 14:28). Dee äwalajen biejlikj, woo väl Menschen woat dit Jereetschoft togood komen? Es et daut baste fa dit waut nieet to kjeepen? Hab wie eene paussende Städ toom dit oppbewoaren, un hab wie daut Jereetschoft un utjelieede Friewelje, waut ons fälen toom daut unjahoolen?

 Daut daut Audio- un Video-Jereetschoft lenja helt un toom friewelje Gowen spoaren, doo wie daut ellektroonische un uk aundret doaraun pinkjlich repäaren. Wie schekjen daut Jereetschoft uk en stoakje Kaustes opp un dol, waut jemoakt sent toom väl uthoolen, om daut to beschitzen. Dise Kaustes woat uk repäat, wan emma daut fält.

 Soone, waut nich Jehowa siene Zeijen sent, haben sikj aul sea jewundat, woo goot daut met Audio un Video opp onse Kongressen rant. Biejlikj opp eenen Kongress säd een Oabeida von eent von de väaschte Rädio- un Tellewizhen-Kompanie oppe Welt, woo goot daut, waut wie väabrochten, wia un uk woo goot daut jemoakt wia. Jonathan, waut oppe Kongressen halpt Audio- un Video-Jereetschoft opptostalen un uk doamet to schaufen, sajcht äwa dän: “Hee wist sien Wunda nich to loten, aus hee enwort daut aule en onse Grupp friewelje Helpa wieren un nich Huach-Utjelieede. Un dee säd, soont wudd siene Kompanie fief Doag dieren, daut aula opptostalen, waut ons bloos eent un eenen haulwen Dach dieed.” Opp eenen aundren Kongress säd de Aunjestalda äwa daut Jebied: “Hia sent aul väl Huach-Utjelieede en Musikj un Videos jewast, oba ekj hab noch kjeenmol ea Menschen jeseenen, waut soo goot weeten, waut see doonen, aus jie!”

 Woo es die daut Audio- un Video-Jereetschoft oppe Kongressen togood jekomen? Veleicht jeit die daut soo aus David, waut en Enjlaunt wont. Hee sajcht: “Ekj sie aul 88 Joa un sie mien gaunzet Läwen no de Kongressen jewankt. Oba nu es daut leichta aus jeemols ea miene gaunze Oppmoakjsomkjeit opp aul daut to haben, waut doa väajebrocht woat. Wäajen de sea schmocke Videos rant daut Program bosja auf un waut eenem daut lieren saul, es dietelja un jleia.” Micheal, waut en Nigeria wont, sajcht: “Wiels onse Breeda un Sestren de Rädna nu soo väl bäta hieren kjennen un de Videos soo väl bäta seenen, kjennen dee oppmoakjsom sennen un dee woat daut nich enoolent opp daut Program”.

 Dit Joa, wan du opp dän dreedoagschen Kongress “Vebreed de goode Norecht!” best ooda opp eenen von de besondre Kongressen, dan nemm die een bät Tiet doaräwa notodenkjen, waut doa aules met en wia, daut du daut Program hieren un seenen kust. Wie sent dankboa, daut june Gowen, uk dee waut jie opp donate.pr418.com jeewen, haben jeholpen dit mäajlich to moaken. Sea dankscheen!