Eene junge Sesta en Kolumbien, waut Nicole heet, sajcht: “Ekj jleich ons Vesaumlungshus sea! Doa kaun ekj met miene Gloowesbreeda toop sennen.” Jeit die daut krakjt soo?

 Oppe gaunze Welt jeft daut ojjefäa 63,000 Vesaumlungshiesa, wua Jehowa siene Zeijen äare Toopkomes haben. En dise Jebieda kjenn wie Gott aunbäden un am deenen. Oba daut es nich aules. Een Pionia en Kolumbien, waut David heet, sajcht: “Wäajen ons feinet Vesaumlungshus denkjen eenje noch bäta äwa de goode Norecht. Väle von dee, waut doa hankomen, wundren sikj, woo goot daut unjahoolen woat.” Daut es nich bloos toofalich. Wie strenjen ons sea aun, daut onse Vesaumlungshiesa rein un fein en Ordninj sent. Woo woat daut jedonen?

 Dee Vesaumlungen, waut daut Vesaumlungshus brucken, sent uk veauntwuatlich doafäa, daut enne Go to hoolen. Doawäajen doonen de Breeda un Sestren äa Vesaumlungshus pinkjlich besorjen. Dee doonen uk kjlandre Sachen repäaren un seenen doano, daut doa nuscht twei woat.

 Om de Vesaumlungen to halpen, äa Vesaumlungshus fein en Ordninj to hoolen, stalt de Aufdeelunk fa daut Buwoakj (LDC) Breeda aus Liera aun. Een LDC-Liera kjemmat sikj om sas bat tieen Vesaumlungshiesa. Dee foat doa han un lieet de Vekjindja von de Vesaumlungen ut, woo dee sikj kjennen om äa Vesaumlungshus kjemren. Aule dree Joa unjasieekjt dee uk krakjt daut Jebied un kjikjt doano, aus doa waut fält opptofiksen ooda aus doa irjentwaut onsecha es.

 Onse Breeda un Sestren jleichen daut sea, wan dee soo aus dit utjelieet woaren. Eene Sesta von Indien, waut Indhumathi heet, sajcht: “De School wia sea fein! Ekj jleicht daut sea, daut ekj doa lieed, woo wie kjennen ons Vesaumlungshus fein enne Go hoolen.” Un Evans, een Brooda en Kenia, sajcht: “Wie haben daut jelieet, woo wie kjennen väl Jelt spoaren, wan wie kjlandre Trubbels fuaz oppfiksen, ea daut groote Trubbels woaren.”

 De Onkosten fa een Vesaumlungshus sent tweschen hundade bat dusende stätsche Dola daut Joa – doano, wua daut Vesaumlungshus es, woo oolt daut aul es un woo väl Vesaumlungen daut brucken. Wäa betolt aul dise Onkosten?

 Een Vesaumlungshus to unjahoolen woat derch Gowen betolt. Alexander, een Brooda en Kasachstan, lajcht daut soo ut: “Een Poat von de Gowen woat doafäa jebrukt, daut Internet un aundret to betolen, biejlikj daut Wota- un daut Fiabill. Dan woat doa noch een Poat fa aundre needje Sachen jebrukt, soo aus Rollpapia, Haunschkjes, Sachen toom Reinjen un Foaw.” Un wan doa noch waut äwablift, dan woat daut fa daut weltwiede Woakj jejäft, daut daut kaun sestwua jebrukt woaren, wan doa mea fält opptofiksen un daut diera kjemt.

 Wan doa en een Vesaumlungshus waut fält opptofiksen, waut oba diera sennen wudd aus twee ooda dree Moonat von de Onkosten fa dit Vesaumlungshus, dan räden de Eltestasch met dän LDC-Liera. Wan daut LDC uk jleeft, daut dise Oabeit fält to doonen, dan woat daut fa jeweenlich derch de Gowen fa daut weltwiede Woakj betolt. En daut Deenstjoa 2023 worden 8,793 von soone Oabeiden jedonen un aul dit toop kost 76.6 Millionen stätsche Dola. See wie mol twee Biespels.

 En Angoola jeef daut een Vesaumlungshus, waut 15 Joa oolt wia un ernoa twei. Aules, waut met elektrischet Fia to doonen haud, wia aul nich mea to brucken, de Wenj wieren opjeräten, un de Nobasch säden, daut en äare Hiesa Wota nennschäld vom Vesaumlungshus. Daut LDC deed daut oppleinen, daut dise Trubbels kunnen jefikst woaren. Dise Oabeiden kosten 9,285 stätsche Dola. De Nobasch freiden sikj sea, un dee jeef daut grootet Nies, woo dise Oabeit jedonen wort.

 En een Vesaumlungshus en Poolen wia daut Dak ondicht un de wieekje Flua wia aul nich mea to brucken. Daut LDC jeef Frieheit, daut Dak to repäaren un eene niee, wieekje Flua doa nenntolajen. Dit aules kost 9,757 stätsche Dola. Wäajen se dit deeden, woat daut en de näakjste Joaren nich mea needich sennen, jratre Sachen opptofiksen en dit Vesaumlungshus.

 Wan Vesaumlungshiesa fein enne Go jehoolen woaren, brukt daut nich soo väl Jelt vonne Gowen un daut brinjt uk Iea opp Jehowa sienen Nomen. Shaun, een Brooda en Tonga, sajcht: “Wäajen wie ons Vesaumlungshus goot unjahoolen doonen, kjenn wie Jehowa opp eene reine, ordentliche Städ deenen, wua aules fein schauft. Doaderch kjennen de Menschen doa rom seenen, woo goot Jehowa es. Ons jeit daut scheen, de Menschen no ons Vesaumlungshus to kroagen!”

 Wie aula kjennen methalpen, ons Vesaumlungshus to unjahoolen un rein to hoolen. Marino, een LDC-Liera en Australien, sajcht: “Wie aula haben een scheenet Väarajcht, no ons Vesaumlungshus opptopaussen. Wan wie daut doonen, halp wie met, daut väl Gowen jespoat woaren. Doaderch kjennen dee doa jebrukt woaren, wua daut werkjlich fält.”

 Joel, een Brooda en Indien, jeit daut scheen, mettohalpen, daut Vesaumlungshus to unjahoolen. Hee sajcht: “Wan ekj met miene Breeda toopschauf, denkj ekj doaraun, woo daut enne niee Welt woat sennen.” Nicole, von dee wie ea aul räden, sajcht: “Korz holp ekj met, de Flua reintomoaken, aus Breeda enne Bodstow eenen Wotatrubbel fiksen deeden. Wan ekj uk nich dän Trubbel fiksen deed, holp ekj oba met, daut doa nich een Ojjlekj passieed.”

 Wan du wurscht jleichen to halpen, dien Vesaumlungshus to unjahoolen, dan räd met diene Eltestasch. Un wan du Gowen jefst, kaust du nich bloos halpen, dien Vesaumlungshus enne Go to hoolen, oba uk aundre Vesaumlungshiesa oppe Welt. Wan du Gowen jäwen west, kaust du daut en dien Vesaumlungshus bie de Gowenkaustes nenn ooda äwa donate.pr418.com. Wie sent sea dankboa, daut jie soo friejäwrich sent!