Wäajen wie en de latste Doag läwen, wundat ons daut nich, wan wie von “Kjrich un Kjrichsjeschrech” hieren (Matäus 24:6, PB). Oba wan onse Breeda schwoare Tieden derchgonen wäajen eenen Kjrich, dan kjrieen dee de Help, waut an fält. Ons haft daut sea jetreest, daut wie en dän 3. Berecht vom Väastaunt 2022 doavon hieeden, waut doa aules jedonen woat em Oosten von Europa fa dee, waut von dän Kjrich en Ukranien betroffen sent. Oba woo kjennen de Breeda doa halpen, wan doa doch Kjrich es? Un waut haft dise Help aun de Breeda en Ukranien jedonen?

 Dän 24. Feebawoa 2022 funk de Kjrich en Ukranien aun. Krakjt dän Dach jeef daut Plonakommitee de Frieheit, daut doa kunn eene jewesse Somm Jelt jebrukt woaren, om de Breeda en Ukranien to halpen. Daut Betel en Ukranien funk fuaz aun, doa de Sachen to kjeepen. Doa worden uk 27 Nootfaulkommitees aunjestalt, waut dise Sachen dan utdeelden.

 Om daut Betel en Ukranien noch dolla to unjastetten, fungen de Breeda en de Hauptoffiz von Jehowa siene Zeijen aun, doaräwa notodenkjen, woo dee an noch dolla halpen kunnen. De Plonakommitees un de Drekjariekommitees vom Väastaunt säden, daut de Enkjeep-Aufdeelunk fa de gaunze Welt sull met de Betels von Ukranien un Poolen toopschaufen, om to seenen, waut doa aules fäld, un dee sullen uk eenen Plon moaken, waut doa aules jedonen sull. Om goot to plonen, kjeemen doa jieda Dach Breeda toop von de Enkjeep-Aufdeelungen, de Aufdeelungen toom veschekjen, de Aufdeelungen fa Jesazessachen von jieda Betel, eena von daut Betelkommitee en Ukranien, un uk soone von de Enkjeep-Aufdeelunk fa de gaunze Welt.

 Jay Swinney von de Enkjeep-Aufdeelunk fa de gaunze Welt, sajcht: “Daut ieeschte must wie doano kjikjen, waut doa fäld. Wie wullen de Breeda soon Ätwoa, Reinjungsstoff un aundre Needichkjeiten schekjen, waut dee uk jewant wieren. Oba daut wia noch mau bloos eene Sach to seenen, waut doa fäld. Een aundra Trubbel wia, woo wie aul daut wudden en Ukranien nennbrinjen, wan doa doch Kjrich wia, un daut dan uk noch opp eene sechre un bosje Wajch.”

 Aum 9. Moaz 2022 wisten de Breeda dan, waut de Breeda un Sestren doa en Ukranien aules fäld. Dee plonden, woo see de Paks toopstalen wudden. Dee wullen doa Äten nenn, soo aus enjekaundet Fleesch un Fesch, Jrett, Ries, Schaublen, un dan uk noch veschiednet Reinjungsstoff un Sachen soo aus Seep un Rollpapia. Aus dee dise Plons muaken, dochten dee, wan dee wudden soo väl en de Doosen nenndoonen, daut daut fa eenen Mensch fa vea Wäakj toorieekjen wudd, dan wudd an daut fa eenen Mensch soo rom 65 stätsche Dola kosten. Wäajen doa dusende Breeda wieren, waut daut aun dise Sachen fälen wudd, haft daut Plonakommitee eene groote Somm Jelt friejejäft, waut dee doafäa brucken kunnen. Oba woo wudden dee aul dise Sachen doa hanbrinjen, onen irjentwäm onneedich en Jefoa to brinjen?

 Twee Breeda von Poolen fuaren aum 13. Moaz daut ieeschte Mol von daut Betel en Poolen no eenen Spikja dicht bie Lviv en Ukranien toom rutfinjen, woo daut schauft, de Sachen doa hantobrinjen. En dee Doag ea dee wajchfuaren, holpen Breeda von daut Betel en Poolen un en Ukranien de twee Friewelje, sikj fa dise Reis reedtomoaken. Daut Betel kjemmad sikj uk om de Papieren, waut an doa fälen wudden toom äwa de Jrens komen, om doa to halpen. Dee sagen uk doano, daut daut aun de Foatieja von de Breeda kloa to seenen wia, daut dee doa hankjeemen toom halpen. Un dee schauften uk met de Breeda en Ukranien toop toom seenen, woont de bosichsta Wajch wia, wan dee ieescht äwa de Jrens wieren. Aus dise beid Breeda en Lviv aunkjeemen, dieed daut mau jroz 24 Stund, bat de Nootfaulkommitees de Sachen utjedeelt hauden, un de beid Breeda kjeemen wada goot trigj no Poolen. Daut schauft bloos, wäajen dee sikj goot reedmuaken un Jehowa daut säajend.

 Wan de ieeschte Reis uk fein jejlekjt haud, wia daut doch mau bloos een Bät weinja aus eene Tonn (1 stätsche Tonn), waut de Breeda doa hanbrochten. Doa fälden noch emma rom 200 Tonnen (220 stätsche Tonnen) hantobrinjen! Woo wudden dee soon deel Sachen doa hanbrinjen un uk noch utdeelen kjennen, un daut dan aules noch soo bosich aus mäajlich?

 Menschen romme gaunze Welt wullen halpen, nodäm see opp jw.org jeläst hauden, waut onse Breeda en Ukranien aules derchmuaken wäajen dän Kjrich. Väle, waut wiet auf von Ukranien wieren, deeden Jelt no daut weltwiede Woakj von Jehowa siene Zeijen schekjen, wäajen see wisten, daut dee daut Jelt wudden daut baste brucken. Aundre, waut en de Lenda rom Ukranien wonden, kunnen von äare Tiet, Krauft un aundre perseenelje Sachen jäwen toom halpen. Hia sent eenje Biespels doafäa.

 En Poolen deeden friewelje Helpa tieendusende Paks reedmoaken fa de Breeda, un Kjinja molden Koaten. Bartosz Kościelniak von de Enkjeep-Aufdeelunk em Betel en Poolen vetalt: “Ekj haud aul foaken dän Varsch von Psalm 110:3, (PB) jeläst, wua daut sajcht: “Dien Volkj [woat] die friewellich . . . deenen”. Oba nu kunn ekj daut selfst seenen, woo hundade Friewelje fuaz reed wieren to komen un sea to schaufen. Daut wees mie, daut dise Wieed werkjlich krakjt stemmen.”

 Een Brooda es de Wieet äwa eene internazionale Kompanie toom veschekjen. Hee muak daut mäajlich, daut se siene Trälasch brucken kunnen un hee jeef uk daut Brennstoff fa dee. Hee sajcht: “Fa mie es daut eene Mäajlichkjeit, miene Leew fa Jehowa un fa miene Breeda to wiesen. Ekj sie soo schaftich, daut ekj aunbeeden deed to halpen.” Doa worden rom 7,700 Lieta (2,034 Galoon) Brennstoff jejäft, un de Breeda brukten uk äare Tiet un Krauft, om meist 48,000 Kilomeeta (30,000 Miel) to foaren un de Sachen doa hantobrinjen!

 Wäajen de Breeda un Sestren soo sea un von Hoaten schauften, hauden dee bat dän 28. Moaz – aulsoo bloos 15 Doag no de ieeschte Reis – 100 Tonnen (110 stätsche Tonnen) Äten, Reinjungsstoff un Medizien no Ukranien jebrocht! Un wäajen de Breeda un de Hendla soo friejäwrich Sachen jeewen, kjeem daut väl bilja, aus dee jedocht hauden. Bat nu haben Jehowa siene Zeijen aul äwa 190 Tonnen (209 stätsche Tonnen) Sachen no Ukranien jeschekjt. Woo holp onse Breeda daut doa?

 Aus dise Paks ieescht en Lviv aunkjeemen, sagen de Nootfaulkommitees doano, daut dee en Ukranien no deejanje jebrocht worden, waut daut fäld. Dise Paks worden no veschiedne Städa jeschekjt, un eenje worden wieda aus 1,300 Kilomeeta (800 Miel) von Lviv jebrocht. Wan daut uk soo goot aus mäajlich jedonen wort, neem daut doawäajen siene Tiet. a

 Markus Reinhardt es Poat von daut Betelkommitee en Ukranien. Hee sajcht: “En dise schwoare Tiet haben väl Breeda selfst Jehowa siene Leew jespäat un uk woo goot daut utkjemt, wan eena sikj krakjt aun daut helt, waut de Organisazion sajcht – mau rajcht ea doa waut Schlemmet passieet. Een Biespel doafäa es, daut ons aula toojerot woat, fa miere Wäakj Äten un Wota tus to haben. Een Eltesta, waut Anton heet un en Kiew deent, säd äwa dise Aunwiesunk: ‘Wie sent sea dankboa, daut Jehowa siene Organisazion ons aul reedmuak fa eene schwoare Loag. Daut wie jenuach Äten un Wota tus hauden un uk een Rädio, haft ons opp iernst daut Läwen jerat.’ Wie sent sea dankboa, daut de Breeda dise Aunwiesungen nokjeemen, wäajen daut jeef daut Betel Tiet, dise gaunze Help to plonen.”

 Woo feelden onse Breeda sikj, aus dise Help ieescht aunkjeem? Mykola un Zinaida, waut en Charkiw wonen, säden daut soo aus dit: “Ons jeit daut werkjlich to Hoaten, woo sea dee om ons bekjemmat sent. Sea dankscheen fa daut Äten un de Medizien. Wie kjennen seenen, daut Jehowa hinja aul daut steit.” Valentyna wont en deeselwje Jäajent. See sajcht: “Von dan, aus de Kjrich aunfunk, must wie emma lang luaren, om Ätwoa to kjrieen. Daut wia uk nich emma mäajlich, daut wie daut kjeepen kunnen, waut ons jroz fäld. Oba Jehowa wist doa om un sach disen Trubbel. Hee stald Breeda aun, daut dee dise Paks no ons brochten, wua krakjt daut bennen wia, waut ons fäld. En soone schwoare Loagen, wan daut aula hopninjsloos lat, kaun eena daut krakjt späaren, woo Jehowa un siene Organisazion eenem opp eene besondre Wajch halpen. . . . Daut wie dise Help un Unjastettunk kjrieejen, waut ons soo needich fäld, un daut noch krakjt to dee Tiet, wia sea beruijent fa ons.”

 Yevhen un Iryna, waut von Mariupol flichten deeden, sajen: “Wie sent sea dankboa, daut jie onse Famielje soo sea halpen un unjastetten deeden. Jie kjennen ons daut jleewen, daut wia krakjt de rajchte Tiet! Weet jie, ieeschtlich docht wie, daut en dise Doosen bloos Sachen bennen wieren. Oba aus wie dee ieescht opmuaken, sag wie, doa wia uk june Leew bennen!”

 Secha kaust du uk seenen, woo Jehowa sienen heiljen Jeist brucken deed, om siene Deena auntoleiden, daut dee uthalpen kunnen mank “Kjrich un Kjrichsjeschrech”. June Gowen fa daut weltwiede Woakj, wua uk dee met en sent, waut äwa donate.pr418.com jejäft woaren, haben doa sea metjeholpen. Dankscheen, daut jie soo friejäwrich sent!

Soo bosich un soo secha aus mäajlich uthalpen

1. 24. Feebawoa 2022: Daut Plonakommitee jeft Jelt frie toom en Ukranien uthalpen. Doaderch es daut mäajlich, daut daut Betel doamet aunfangen kaun

2. 24. Feebawoa – 8. Moaz 2022: Daut ukranische Betel kjaft doa eenje Sachen un fangt aun, dee derch de Nootfaulkommitees to veschekjen. Daut Betel moakt sikj uk reed, daut see woaren Sachen von Poolen kjrieen un dee dan wiedaschekjen

3. 9. Moaz 2022: Daut Plonakommitee jeft daut frie, needje Sachen en Ukranien nenntoschekjen

4. 10. – 12. Moaz 2022: Doa woaren Plons jemoakt toom utfinjen, woo see kjennen Paks von Poolen no Lviv en Ukranien brinjen

5. 13. Moaz 2022: Toom utfinjen brinjen dee toom ieeschte Mol Sachen von Poolen no Lviv en Ukranien

6. 14. – 16. Moaz 2022: Friewelje Buoabeida halpen bie een Kongresshus met, waut dicht bie Poznan en Poolen es, wua se Paks toopstalen met Äten, Reinjungsstoff un aundre needje Sachen

7. 17. Moaz 2022: Vea Doag lota von de ieeschte Reis, foaren de Breeda loos met 13 Tonnen (14 stätsche Tonnen) Paks met needje Sachen no Ukranien

8. 21. – 27. Moaz 2022: Krakjt soo woaren de äwaje von dee Paks en Poolen toopjestalt un no Ukranien jeschekjt un benna 24 Stund no dee Städen jeschekjt, wua daut aun Help fält

9. 28. Moaz 2022: Benna 20 Doag von dan, aus se Frieheit jeewen, hauden dee aul 100 Tonnen (110 stätsche Tonnen) Äten, Reinjungsstoff un Medizien no Ukranien jeschekjt

 Bat nu haben Jehowa siene Zeijen äwa 190 Tonnen (209 stätsche Tonnen) needje Sachen no Ukranien jeschekjt.