“Wie freien ons sea, junt weeten to loten, daut de Väastaunt dit beschloten haft: Aule Vesaumlungen woaren oppjemuntat, vom 1. Aprell aun wada de Toopkomes en de Vesaumlungshiesa auftohoolen, wan de Rejierunk daut en dee Jäajent toolat.” Aus dit aunfangs Moaz 2022 opp jw.org bekauntjemoakt wort, freiden Jehova siene Zeijen sikj äwa de gaunze Welt bloos sea. Oba dit bediet nich, daut daut met de COVID-19-Krankheit äwa wia. a Waut must wie enrechten un waut vonne Sachen must wie kjeepen toom dee fa COVID-19 beschitzen, waut doa wudden hankomen? Wudden onse Vesaumlungshiesa reed sennen, wäajen wie hauden dee aul rom twee Joa nich jebrukt?

 Onse Breeda hauden aul fa miere Moonaten doaraun jeschauft, daut wie wada wudden kjennen onse Toopkomes perseenlich haben bie de Vesaumlungshiesa.

 Aune 2020 – bloos eene Moonat nodäm daut wie nich mea onse Toopkomes perseenlich hauden – muak de Aufdeelunk fa daut Buwoakj oppe gaunze Welt (WDC) en Warwick, New York aul wada Plons. Dee wullen utfinjen, woo wie wada wudden kjennen onse Vesaumlungshiesa brucken, wan doa uk de COVID-19-Krankheit rom wia. Oba waut fäld doa to doonen, soo daut wie wudden secha sennen bie onse Vesaumlungshiesa?

 Waut en eenje Lenda fäld, wia foaken waut gaunz aundret, aus waut opp aundre Städen fäld. Brooda Matthew De Sanctis, waut fa de WDC schauft, sajcht: “En eenje Lenda wia daut schwoa, daut soo entorechten, daut dee sikj kunnen de Henj wauschen. Dit wia, wäajen de Vesaumlungshiesa nich Wota hauden. Dee musten daut Wota kjeepen ooda von eenen Riefa ooda Borm holen. Un en aundre Lenda velangen eenje Rejierungen daut nu, daut dee motten Äarkondischen haben, uk soone Maschienen, waut mea fresche Loft von buten nennholen un Zeins äwa de Jesuntheit un Reinjunk.”

 Woo worden onse Breeda met dise Schwierichkjeiten foadich? Matthew säd: “Bie väle Vesaumlungshiesa kunnen se foaken eene eefache Leesunk finjen, waut nich sea dia wia un waut sea goot schauft.” Biejlikj en Papua-Nie-Guinea stalden se Wotakrucken opp von 20 Lieta (5.3 Galoon) un doa muaken se dan Krons naun. Soo deeden onse Breeda von butakaunt Staut daut, un daut kost bloos 40 stätsche Dola. Fa de Vesaumlungshiesa en Afrika worden von eene Kompanie en Asien äwa 6 000 Dinja jekoft toom sikj de Henj wauschen, waut sea goot jemoakt wieren.

 Wie stalden uk noch aundret opp, soo aus mea Wintmälen ooda soone Maschienen, waut mea fresche Loft von buten nennholen. Väle Vesaumlungen koften noch lange Stangen fa de Mikrofoons, soo daut kjeena de Mikrofoons aunschieren must. Wie moaken uk pinkjlich aul daut rein, waut foaken aunjeschieet woat, soo aus Däarenjräpen un Wotakrons, soo daut kjeena sikj de Krankheit oppschlapt. Eenje Vesaumlungen stalden soone Wotakrons opp, wua daut Wota von veselfst rutkjemt. En Chile kost daut rom 1 400 stätsche Dola fa jieda Vesaumlungshus toom aules enrechten, waut needich wia.

 Wan daut uk wichtich wia, daut de Vesaumlungen secha wieren, proowden onse Breeda oba, onse Gowen soo goot aus mäajlich to brucken, daut dee wieda utrieekjen. En eenje Lenda neemen de Breeda daut woa, daut de Rejierunk halpt, Dinja toom sikj de Henj wauschen to kjeepen un uk de Stangen fa de Mikrofoons. Miere Betels deeden toop soone Sachen kjeepen, daut daut nich wudd soo dia komen. De Enkjeep-Aufdeelunk fa de gaunze Welt koft dise Sachen foaken bie de Fabrikjen, wua dee jemoakt woaren. Soo kjeem daut bilja un dieed uk nich soo lang, bat daut nom Betel kjeem.

 De Endrungen, waut wie en onse Vesaumlungshiesa muaken, haft deejanje beschizt un beruicht, waut wada nom Vesaumlungshus kjeemen. Dulcine, eene Sesta von Peru, stunt too, daut see “een bät Angst” haud, aus see enwort, daut wie wada wudden perseenlich toopkomen. See säd: “Aus de COVID-19-Krankheit aunfunk, kjrieech ekj dee fuaz, un doawäajen haud ekj Angst, wada nom Vesaumlungshus to komen. Ekj wist, wan ekj wada mank Menschen wia, kunn ekj mie de Krankheit wada oppschlapen. Oba aus ekj ieescht doa wia, sach ekj, daut de Eltestasch väl jedonen hauden, soo daut aules wudd secha sennen. Doa wia soont toom sikj de Henj met Spieetus reinmoaken un de Mikrofoons wieren aun lange Stangen. Un ver un no daut Toopkomen wort aules reinjemoakt. Doa kunn ekj mie secha feelen!” b

 Sara, eene Sesta von Sambia, haud eene aundre Schwierichkjeit. See sajcht: “Een poa Moonat trigj storf mien Maun aun de COVID-19-Krankheit. Doawäajen haud ekj Angst, woo ekj mie wudd feelen wan ekj toom ieeschte Mol wudd onen mienen Maun bie de Toopkomes sennen.” Un woo feelt see sikj nu doaräwa? See sajcht: “Perseenlich bie de Toopkomes sennen, haft mie jewäsen, daut Jehova met ons es en dise latste Doag. Nu kaun ekj mea aus jeemols ea späaren, woo sea de Eltestasch un de Breeda un Sestren mie leewen, mie unjastetten un mie Moot jäwen.”

 Onse leewe Breeda un Sestren von aulawäajen oppe Welt sent sea dankboa fa de Jeläajenheit, daut wie wada kjennen trigj no de Vesaumlungshiesa gonen fa onse Toopkomes. Välmol dankscheen fa june Gowen, waut väle von junt derch donate.pr418.com jäwen. Dise Gowen halpen ons, soo daut wie kjennen soone Städen haben toom Jehova deenen, wua wie ons secha un maklich feelen.