Jehova Gott well, daut aule Menschen von am un sien Kjennichrikj sellen lieren, krakjt endoont en waut vonne Omstend dee sent (1. Timotäus 2:3-4). Doawäajen jäwen Jehova siene Zeijen Biblen, Bieekja un Videos rut, daut soo väl Menschen aus mäajlich de Schreft vestonen kjennen, uk de Doowe. Doa sent aul dusende Videos opp äwa 100 Finjasproaken a jemoakt worden! Woo woaren dee jemoakt un woo kjrieen de Menschen dee? En waut vonne Stekjen hab wie ons met de Tiet vebätat, woo wie dee Videos moaken?

 Finjasproak-Videos woaren oppe gaunze Welt äwasat. Ieescht mott jieda eena von de Äwasata-Grupp sikj daut oppoat goot unjastonen, waut dee äwasaten woaren. Dan motten dee sikj aus Grupp eenich woaren, woo dee daut opp äare Finjasproak dietlich moaken wellen. Wan dee sikj ieescht eenich sent, dan moaken dee daut Video. Daut jeft 60 Äwasata-Gruppen, waut emma met Finjasproak-Videos schaufen, un 40, waut daut bieaun doonen.

 Ea wia daut sea dia, Finjasproak-Videos to moaken. Kembres un aules, waut eena brukt toom Videos moaken, wia väl diera aus vondoag dän Dach. Dee brukten besondre Stowen toom dise Videos moaken. Eenjemol kunn wie ons Jebieda enrechten, waut wie aul hauden; eenjemol must wie uk de Stowen selfst buen. Toom daut fa eene Äwasata-Grupp aules enrechten kost daut äwa 30 000 US$.

 Toom de Gowen fein brucken haben onse Breeda doano jeseenen, woo dee aules kunnen noch bäta un eefacha moaken. Wie brucken nu niemootschet Jereetschoft, waut fein schauft un bilja es. Enne Städ eene besondre un diere Stow, bruck wie nu bloos noch eenen jreenen Hinjagrunt, waut soo lat aus eene jreene Waunt. Soo kjennen de Äwasata de Videos dan fuaz en äare ieejne Offiz moaken. Wan en een Video veschiedne Breeda un Sestren een Poat traft, kjennen dee daut nu von äare Offiz ooda von tus moaken un brucken nich mea no eene besondre Stow komen doatoo.

 Wie haben uk selfst Komputa-Programs jemoakt, daut de Äwasata äare Oabeit leichta es. Wäajen wie nu dise Programs haben, dieet daut nu mau haulf soo lang een Video moaken von de Finjasproak. Onse doowe Breeda sent sea dankboa, daut daut nu bosja un leichta es. Een Brooda, waut Alexander heet, sajcht: “Nu kjrieej wie väl mea Videos von de Finjasproak aus ea un daut jeft mie groote Freid. Ekj kjikj jieda Dach de Videos.”

 Daut Jereetschoft tooptokjrieen fa eene Äwasata-Grupp kost nu weinja aus 5 000 US$. Doaderch kjenn wie nu väl mea Videos moaken un uk opp mea Finjasproaken.

 Wan de Videos von de Finjasproak ieescht foadich sent, motten dee uk no de doowe Menschen komen. Oba woo schauft daut? Ieeschtemma muak wie de Videos opp groote Seiden un DVDs oba daut brukt väl Tiet, wia väl Oabeit un wia uk dia. Wie schekjten daut Video no soone Kompanie, waut doa dan kunn mea Films von moaken. Un dan worden dise Films no de Vesaumlungen jeschekjt. Bloos en daut Joa 2013 haud wie mea aus 2 000 000 US$ jebrukt, om DVDs fa de Finjasproak to moaken.

 De Doowe räakjenden dise Videos sea väl. Oba daut wia uk nich emma leicht, de Seiden un DVDs to brucken. Eenjemol wieren doa miere DVDs bloos fa een Bibelbuak. Gilnei, een Brooda von Brasilien, säd, woo daut fa am wia: “Wan wie wullen eenen Bibelvarsch väaläsen, dan must wie de rajchte Video-Seid finjen un uk dän Varsch doabennen un daut wia sea schwoa.” Rafayane, eene Sesta, waut uk dise DVDs von de Finjasproak brukt, sajcht: “Daut wia toom meed woaren, wan eena fa sikj selfst studieed. Daut brukt soo väl Tiet sikj de Bibelvarzhen notosieekjen ooda waut aundret.” Onse Breeda un Sestren neemen de DVDs ooda Video-Seiden foaken met, wan see prädjen deeden. Un soo kunnen see dee Menschen, waut daut intressieed, daut en dee äa Tellewizhen wiesen. Eenje Breeda neemen soogoa äa ieejnet Jereetschoft met (DVD-Players) toom dee de Videos en äa Tellewizhen wiesen. Lota jeef daut dan soone DVD-Players, waut eena noanich brukt aunknekjen, eena kunn daut doa fuaz väaspälen un väl Breeda brukten daut. Bobby, waut enne Stäts wont, sajcht: “Wan wie ieescht eenen Bibelvarsch jewäsen hauden un wie wullen dee noch eenen aundren wiesen, dan must wie foaken eene aundre DVD nennsaten. Doawäajen dieed daut foaken lang un wia schwoa, Bibelvarzhen em Deenst to brucken.”

 Vonne 2013 aun haft Jehova siene Organisazion de JW Library Finjasproak-App jemoakt. Un doa kjennen de Breeda un Sestren sikj de Videos en äa Fon ooda Tablet raufloden un dee uk seenen. Ieeschtlich hauden dee dise App bloos fa de stätsche Finjasproak jemoakt. Oba dan aune 2017 wort dee oppjefrescht un dan wieren aule Finjasproaken doabennen. De Breeda un Sestren oppe gaunze Welt freiden sikj sea doatoo. Juscelino, een Brooda von Brasilien, sajcht: “Ekj kunn daut schia nich jleewen! Ekj denkj doa foaken äwa no, woo sea de Väastaunt uk ons doowe Menschen leeft un daut dee uk well, daut wie em jeisteljen veraunkomen, krakjt soo aus dee, waut eene jeweenelje Sproak haben. Ekj wia soo voll Freid un derch dise App wull ekj noch mea de Bibel studieren.”

 Vondoag dän Dach woaren aul dise Finjasproak-Videos metem Komputa jemoakt un äwa onse Websied un de JW Library Finjasproak-App vebreet. Un nu kjennen dee de Finjasproak-Videos en een poa Doag äwasaten, moaken un vebreeden, waut dee ieeschtemma Moonaten ooda Joaren dieed. Väle kjennen äare Finjasproak-Videos mau rajcht to deeselwje Tiet rutjäwen aus de jeweenelje Sproaken.

 See wie mol, waut eenje doowe Breeda un Sestren sajen. Eene Sesta, waut Klízia heet, sajcht: “Woone Organisazion es noch soo sea om de doowe Menschen besorcht, daut dee soogoa jeisteljet reedmoaken, waut soo leicht to haben es? Kjeene oppe Welt es soo om ons bekjemmat, aus Jehova siene Organisazion.” Vladimir sajcht: “Derch de Videos kaun ekj seenen, daut Jehova krakjt soo sea om de doowe Menschen besorcht es aus om dee, waut hieren kjennen.”

 Onse Finjasproak-Videos sajen foaken: “Dit Video es nich toom vekjeepen. Daut woat rutjejäft aus Poat von een weltwiedet biblischet Liawoakj, waut derch friewelje Gowen unjastett woat.” Wie sent sea dankboa fa june Gowen, waut foaken opp donate.pr418.com jejäft woaren. Derch dise Gowen kjenn wie Biblen un aundre Sachen toom studieren rutjäwen, fa aule Sorten Menschen.