De Schreft säd verut, daut daut en onse Tiet Kjrich, Ieedbäben un schlemme Krankheiten jäwen wudd un noch aundret “schrakjeljet” (Lukas 21:10-11, PB). Dise Profezeiunk haft sikj en daut Deenstjoa 2022 a noch wieda erfelt. Toom Biespel es de COVID-19-Krankheit oppe gaunze Welt noch nich gaunz äwa. Un de Kjrich en de Ukraine haft noch emma nich nojeloten un millionende Menschen motten doarunja lieden. Dan musten noch väl Menschen lieden wäajen aundret schlemmet, soo aus Ieedbäbens en Haiti un de groote Storms, waut väl Schoden brochten en Meddel-Amerika, de Filippinen, un en Siedoost-Afrika. Woo haben Jehova siene Zeijen deejanje jeholpen, waut doarunja lieden musten?

 En daut Deenstjoa 2022 haft Jehova siene Organisazion rom 200 Mol em Nootfaul utjeholpen! Aules toop wieren daut dicht bie 12 Millionen stätsche Dola, waut dee doatoo jebrukt haben. See wie mol, woo se met onse Gowen soone utjeholpen haben, wua daut een Ieedbäben jeef un wua een groota Storm wia.

 Dän 14. August 2021 wia en Sied-Haiti een Ieedbäben, waut 7.2 stoakj wia. Daut es sea schod, daut dree von Jehova siene Zeijen jestorwen sent: twee von onse Sestren un een Brooda. Dee, waut daut Ieedbäben äwaläwden, hauden kjarpalich Schoden jekjräajen un hauden daut uk met daut schwoa, waut see beläwden. Een Brooda, waut Stephane heet, sajcht: “En de Staut wieren fa äwa twee Moonat jieda Wäakj miere Bejrafnissen, wäajen doa soo väl todood kjeemen.” Éliézer, een aundra Brooda, sajcht: “Väle von onse Gloowesbreeda hauden nich mea een Hus, nich Kjleeda, nich Schoo un uk nich aundre needje Sachen, waut an fäld. Fa Moonaten läwden väle noch en Angst, wäajen doa noch miere kjlandre Ieedbäbens wieren.”

 Onse Organisazion deed sea bosich halpen. Daut Betel von Haiti brocht doa 53 Tonnen Ätwoa han, uk Zelten, Plastikj-Plons, Madrauzen, un Fon-Scharzhasch, waut met de Sonn scharzhen. En daut Deenstjoa 2022 deeden dee uk noch äwa 100 Hiesa buen ooda oppfiksen. Aules toop haft daut mea aus 1 Million stätsche Dola jekost.

 Onse Breeda un Sestren wieren von Hoaten sea dankboa. Lorette sajcht: “Daut Ieedbäben haft ons Hus un ons Jeschaft gaunz doljebroaken. Wie hauden nuscht to äten. Oba Jehova siene Organisazion stunt ons bie un brocht ons aules, waut ons fäld.” Micheline sajcht: “Daut eefache Hus, wua ekj met miene twee Säns wond, haud wäajen daut Ieedbäben grooten Schoden jekjräajen. Ekj wist sest nuscht to doonen, aus bloos noch to bäden, un Jehova brukt siene Organisazion toom miene Jebäda beauntwuaten. Nu won wie en een feinet, stoakjet Hus. Ekj well aules doonen, waut ekj kaun, toom Jehova miene Dankboakjeit wiesen.”

 De Rejierungsbeaumte worden daut uk en, waut vonne goode Oabeit wie doa jedonen hauden. Eena von de väaschte Aunjestalde von de Staut L’Asile säd: “Jie sent sea to lowen, daut jie soo bosich kjeemen halpen. Un ekj low junt uk, daut jie soonen grooten Respakjt fa de Rejierunk haben. Ekj frei mie to seenen, daut jie nich nom Jelt hinjaraun sent, oba daut jie werkjlich wellen Menschen halpen un daut ut Leew doonen.”

 Dän 24. Jaunewoa 2022 kjeem een groota Storm, waut Ana heet, äwa Mosambik un dan jinkj dee no Wasten äwa Malawi. Daut räajend sea un de Storm juach 100 Kilomeeta de Stund (62 mph). De Parleins bruaken dol, doa schälden Brigjen wajch un doa wia eene groote Äwaschwamunk.

 Äwa 30 000 von Jehova siene Zeijen en Malawi un Mosambik wieren von disen grooten Storm betroffen. Charles es een Brooda, waut doa uk biem Nootfaul uthalpen deed. Hee säd: “Aus ekj sach, woo onse Breeda lieden musten un woo väl dee veloaren hauden, daut bruak mie mien Hoat un ekj feeld mie helploos.” Un waut de Loag noch oaja muak: Daut bät Äten, waut dee hauden, un daut, waut dee jeakat hauden, wia aula wajchjeschält. Väle hauden äa Hus veloaren. Daut es sea truarich, daut eenen Brooda siene Fru un dee äare twee Mejales vedrunken wieren, wäajen daut Radungsboot omjestelpt wia.

 De Storm wia grulich sea stoakj. En Malawi, en de Staut Nchalo, hieed de Famielje Sengeredo Klock 1 de Nacht, daut doa een groota Stroom Wota schäld un dee hauden sea Angst. Daut wia, wäajen twee Riefasch sea äwaschälden. Brooda Sengeredo wort sikj eenich, daut see aus Famielje sullen daut Hus veloten. Daut wia sea kluak, wäajen äa Hus een Stootje wieda dolbruak. Dee äare Sachen wieren entwäda wiet vebrukt ooda wajchjeschält. De Famielje jinkj no daut Vesaumlungshus, waut an jeweenlich eene haulwe Stund dieed, oba nu dieed dee daut twee Stund bat doa to gonen. Aus dee ieescht bat doa kjeem, wieren dee gaunz naut, oba em Schutz.

 De Betels von Malawi un Mosambik fungen bosich aun to halpen. Dee stalden de Kjreisoppsechtasch un Eltestasch aun, daut dee sullen noseenen, waut de Breeda un Sestren fäld, waut doa von dän Storm betroffen wieren. Dee sullen dee uk jeistlich stoakjen un Moot toospräakjen. Miere Nootfaulkommitees worden aunjestalt, om sikj om dise Sach to kjemren. Dee fungen fuaz aun, de Breeda un Sestren Äten to brinjen un uk aundre needje Sachen. Dee brukten äwa 33 000 stätsche Dola toom de needje Sachen kjeepen, un äwa 300 000 Dola toom Hiesa buen un oppfiksen.

 De Nootfaulkommitees deeden sea oppaussen, woo see de Gowen brukten, un dit wia uk sea wichtich, wiels aules wia haustich väl diera jeworden. Biejlikj de ieeschte säwen Moonat, aus wie doa en Malawi utholpen, jinkj daut Kornmäl 70 Prozent nopp. Un daut es eefachet Äten, waut se doa schia jieda Dach äten. De Gesslien wort uk väl diera. Toom Jelt spoaren deeden de Breeda soont aus Ätwoa un Sachen toom buen von doa dicht bie, een deel opp een Mol kjeepen. Doaderch kjrieejen see Aufschlach un an kjeem daut nich soo dia met foaren.

 Woo doa utjeholpen wort, jinkj Jehova siene Zeijen sea to Hoaten. Felisberto, een Brooda von Mosambik, sajcht: “Ekj hab noch nienich ea eene Organisazion jeseenen, waut soo väl deed toom uthalpen: soo aus met Sachen toom buen, Sachen fieren, Buoabeida, Äten un leeftolich Rot jäwen. Dit wia werkjlich een groota Bewies doavon, waut vonne Leew doa mank ons es, soo aus Jesus en Johanes 13:34-35 säd.” Ester es eene Wätfru en Malawi un äa Hus wort gaunz vestieed. See sajcht: “Ekj feeld mie onen Hopninj, wäajen ekj haud nich Jelt toom een freschet Hus buen. Oba aus de Breeda hia han kjeemen un mie een Hus buden, feeld ekj mie soo, daut ekj aul em Paradies wia.”

 Ea wie bat de niee Welt sent, woat daut emma schlemma woaren met Ieedbäbens un Owwadasch (Matäus 24:7-8). Oba wie kjennen ons secha sennen, daut Jehova siene Deena emma em Nootfaul utjeholpen woat, wäajen jie soo friewellich Gowen jäwen. Woo eena Gowen jäwen kaun, woat opp de Websied donate.pr418.com utjelajcht. Wie sent sea dankboa fa june friewelje Gowen.