De Bibel säd verut, daut aum “Enj von dise TIET” “eene Sort Menschen . . . jäajen de aundre Sort Menschen feiten” wudd, un daut doa wudd väl Schlemmet passieren (Matäus 24:3, 7). En daut Deenstjoa 2023 a hab wie jeseenen, woo sikj dise Profezeiunk erfelt haft. Wan doa uk en meist 100 Lenda Kjrich un Owwada wia, haben Jehowa siene Zeijen kunt Gott siene Leew nodoonen. Woo krakjt?

 Em Deenstjoa 2023 passieeden äwa 200 schlemme Sachen, aus daut nu Owwadasch wieren ooda von Menschen veuasoaktet. Onse Breeda un Sestren musten doa uk unja lieden. Aules toop worden von Jehowa siene Zeijen äwa tieen Millionen stätsche Dola utjejäft von de Gowen von daut weltwiede Woakj, om em Nootfaul uttohalpen. Bowenenn haben een deel Breeda un Sestren väl Jelt utjejäft toom en äare Jäajent uthalpen. Well wie mol twee Biespels seenen, woo krakjt june Gowen jebrukt worden.

 En eenje Jäajenden en Nigeria jeft daut fa jeweenlich Äwaschwamungen to eene jewesse Tiet em Joa. Oba daut haud aul tieen Joa nich mea soo eene schlemme Äwaschwamunk jejäft aus em Oktooba 2022. Doa worden äwa 676,000 Hekta (1,670,432 Aka) Akaschlaunt venicht un äwa twee Millionen Menschen musten äa Tus veloten. Daut Betel en Nigeria haft fuaz Nootfaulkommitees oppjestalt, daut dee kunnen de Breeda uthalpen un uk em Jeisteljen biestonen.

•   7,505 Vekjindja haben must äare Hiesa veloten

•   860 Hiesa kjrieejen Schoden ooda worden gaunz vestieet

•   90 Vesaumlungshiesa un een Kongresshus wia unjajeschält

 Äwa 250,000 stätsche Dola worden jebrukt toom em Nootfaul uthalpen. Doa wia met en:

•   Ätwoa, soo aus Ries, Schaublen un Nudlen

•   Needjet soo aus Madrauzen un Loftdrot toom äwarem Bad

•   Tweinje Hiesa repäaren ooda fresch oppbuen

 Woo haben onse Breeda secha jemoakt, daut de Gowen goot jebrukt worden? Eent wia, daut dee bie jieda Jebied sea kjikjten, aus daut schauft to repäaren ooda nich. Wan daut fäld, daut fresch opptobuen, dan haben dee soon Moddel jebrukt, waut en dee Jäajent Mood es, leicht jeit to buen un nich dia kjemt.

 Onse Breeda un Sestren, waut jeholpen wort, sent sea dankboa. Eene Sesta säd: “De Äwaschwamunk haft ons gaunzet Läwen derchenaunda jebrocht, wiels ons gaunza Foarm venicht wort un wie kjeen Tus mea hauden. Daut jeef ons sea Moot, aus de Breeda un Sestren krakjt dänselwjen Dach kjeemen toom ons uthalpen un no eene sechre Städ fieren. Daut wia uk eene sea groote Help, aus daut Betel ons Ätwoa schekjt. Wie kunnen ons Wunda nich utspräakjen, wiels wie daut selfst beläwden, daut Johanes 13:34-35 sikj erfeld. . . . De woare Leew jeft daut werkjlich. Ekj un miene gaunze Famielje sent von Hoaten dankboa. Wie wellen ons bie dee Breeda bedanken, waut krakjt de rajchte Tiet kjeemen un ons utholpen.”

 Aundre Menschen worden daut uk en, daut Jehowa siene Zeijen doa utholpen. Een Väaschta en Sabagreia, enne Provinz Bayelsa, säd: “Daut jeft een deel Organisazionen un Jemeenten en dise Welt, oba bloos Jehowa siene Zeijen haben dit jedonen. June Organisazion es eent vonne baste, waut et jeft.”

 Em Feebawoa 2023 veuasoakten äwa 400 groote Fia en Chile sea väl Schoden. Äwa 430,000 Hekta (1,062,553 Aka) Launt wort venicht, un väl aundret Needjet wort vestieet. Rom 8,000 Menschen musten äa Tus veloten. Aus dit aules passieed, haft daut Betel fuaz doano jeseenen, daut doa utjeholpen wort.

•   222 Vekjindja haben must äare Hiesa veloten

•   20 Hiesa worden gaunz vestieet

 Äwa 200,000 stätsche Dola worden jebrukt toom em Nootfaul uthalpen, biejlikj fa:

•   Ätwoa un Wota

•   Brennstoff, Sachen toom Reinjen un Medizien

•   Tweinje Hiesa repäaren

 Eene Famielje wia gaunz vetwiewelt, aus dee enworden, daut dee aules veloaren hauden: äa Tus uk dee äa Jeschaft. Onen dit Jeschaft kunnen dee nich mea äa Läwen moaken. De ieeschte poa Doag sad äant daut sea too, de ladje Städ to seenen, wua ea äa Hus stunt. Oba aus dee dan sagen, daut äa nieet Hus emma wieda foadich wort, feelden dee sikj soo bie sacht bäta. Waut äant holp, met aul dit foadich to woaren, wia, de Leew von aul de friewelje Helpa to späaren. Daut jeef dise Famielje soo väl Moot, daut dee sikj uk aunjeewen un metholpen, eenen Brooda sien Hus fresch opptobuen.

 Daut jinkj väl Breeda un Sestren sea to Hoaten, woo doa utjeholpen wort. Een Brooda säd: “Daut doa Nootfaulkommitees oppjestalt woaren, kjemt von Jehowa un daut es werkjlich waut sea besondret. Aus daut Ojjlekj passieed, wieren de Breeda fuaz dän näakjsten Dach doa un hauden Sachen met, waut needich fälden. Daut jeft eenem väl Moot, wan eena daut läst, woo Breeda en aundre Lenda utjeholpen woat, oba wan eena daut selfst beläft, es daut gaunz aundasch. Eena schazt de Organisazion väl dolla. Eena räakjent daut uk mea, woo de Breeda Jehowa nodoonen un woo bekjemmat dee sent, daut wie aules haben em Tieteljen uk em Jeisteljen un daut wie ons kjennen ruich feelen. Wie kunnen werkjlich Jehowa siene Leew späaren.”

 Je noda wie nom Enj komen, je schlemma woat daut oppe Welt sennen (Lukas 21:10-11). Oba ons leeftolja Kjennich Jesus Christus wiest ons derch de Christenvesaumlunk, daut hee “dän Tiet äwa” bie ons es, “bat daut Enj von dise TIET” (Matäus 28:20). Aules, waut jie fa daut weltwiede Woakj jäwen, wiest, daut jie daut Kjennichrikj un dän leeftoljen Kjennich unjastetten – endoont, aus daut Jelt äwa donate.pr418.com ooda aundatwäajen es, ooda aus daut june Tiet un Krauft es. Sea dankscheen, daut jie nich opphieren, soo friejäwrich to sennen.