Wäarent daut Deenstjoa 2021 a, haud de gaunze Welt, met de wiet vespreede COVID-19-Krankheit to doonen. En dän Artikjel “Oppe gaunze Welt woat wäajen de wiet vespreede Krankheit utjeholpen” wort erkjläat, daut wie millionende stätsche Dola jebrukt haben toom aundre wäajen dise Krankheit uthalpen un daut wie mea aus 950 Nootfaulkommitees aunjestalt haben.

 Onse Breeda un Sestren oppe gaunze Welt musten nich bloos wäajen dise wiet vespreede Krankheit lieden, oba uk wäajen Owwadasch un Trubbels, waut Menschen veuasoakt haben. Wiels daut mea aus 200 Owwadasch un aundre Trubbels jeef, haft daut Plonakommitee vom Väastaunt 8 Millionen stätsche Dola utjejäft, buta daut, waut dee aul fa de COVID-19-Krankheit utjejäft haben. See wie mol twee Biespels, fa waut june Gowen en dit Deenstjoa jebrukt worden sent.

 En de Demokratische Republikj Kongo bruak aum 22. Mei 2021 de fiaspieenda Boajch Nyiragongo ut. De Lawa, waut heete jeschmoltne Steena sent un utem fiaspieenden Boajch rutkomen, vestieed Hiesa, Schoolen un eene Städ wua se Wota oppbewoaren. Oba de Lawa wia nich de eensje Jefoa. Miere Doag no daut, aus dis Boajch utjebroaken wia, jeef daut noch jeftje Ausch enne Loft äware gaunze Staut Goma un noch een deel kjliene Ieedbäbens. Mea aus de Halft von de Menschen enne Staut wort jesajcht, daut dee sikj sullen en Sechaheit brinjen. Miere dusent jinjen äwa de Jrens no Ruanda.

 Mank dee, waut veloten musten, wieren ojjefäa 5 000 von Jehova siene Zeijen. Eenje von dee äare Hiesa worden derch dän fiaspieenden Boajch vestieet, aundre äare Hiesa worden bestolen, nodäm daut see musten veloten. De Nootfaulkommitees von Ruanda un de Demokratische Republikj Kongo schauften toop, om de Breeda uttohalpen. Daut Betel von Kongo (Kinshasa) sajcht äwa een Nootfaulkommitee: “Uk wan de Loag enne Staut gaunz derchenaunda wia un dee noch nich jesajcht hauden, daut de Menschen sikj sullen en Sechaheit brinjen, deed daut Kommitee aul Äten, Wota, Dakjen un Kjleeda utdeelen.” En eene Staut wieren äwa 2 000 Breeda, waut sikj toop jefungen hauden, un een Nootfaulkommitee stald doa Zelten opp un deeld dee Näsenfiltasch ut un erkjläad dee, waut see kunnen doonen, om väatobieejen, daut see nich COVID-19 un uk nich Kolera kjrieejen.

 Benna dree Moonat von dan aus daut passieed, hauden onse Breeda von beides äwa 6 Tonnen Ries uk Kornmäl utjedeelt un von Fat un Wota uk beides äwa 8 000 Lieta. Om Jelt to spoaren, koft daut Betel een deel Äten opp eemol em Launt, enne Städ vom Utlaunt, wua daut diera es.

 Aus de fiaspieenda Boajch utbruak, wort eene Sesta äa nieet Hus vestieet. See sajcht: “Wie wieren wäajen daut sea ommootich un doljeschloagen.” Oba see un äare Famielje kjrieejen em tieteljen un em jeisteljen Help, soo daut see daut uthoolen kunnen un see sajcht nu: “Met Jehova siene Help, hab wie daut needichste, waut ons fält. Wie haben jeseenen, woo Jehova ons jeholpen haft, doamet foadich to woaren, un doaderch es daut nich mea soo schwoa fa ons.”

 Venezuela haft aul fa Joaren unja groote Wirtschoft-Trubbels jeläden. Doawäajen musten onse Breeda aul eenjet uthoolen, soo aus daut de Jewault emma dolla toonemt un daut daut Äten knaup es. Oba Jehova siene Organisazion haft dee nich em Stäakj jeloten.

 Wäarent daut latste Deenstjoa haben wie 1,5 Millionen stätsche Dola jebrukt, om Äten un Seep to kjeepen, fa dee, waut daut fält, un dee daut dan brinjen. Daut Betel en Venezuela sajcht: “Daut es nich leicht, jieda Moonat doano to seenen, daut 130 Tonnen Äten en daut gaunze Launt vedeelt woaren, soo daut aule Breeda, waut en Noot sent, daut uk kjrieen.” Om secha to moaken, daut daut Äten nich schlajcht woat, schekjen de Breeda soont rut, waut noch lang goot blift. Doatoo sajcht daut Betel: “Wie proowen emma een deel Äten to de Arnttiet to kjeepen, wiels dan es daut uk nich soo dia. Dan schekj wie daut opp soone Wajch rut, daut wie doatoo nich derwen soo väl Gowen brucken.”

 Leonel, waut en een Nootfaulkommitee en Venezuela es, räakjent siene Oppgow sea väl. Hee sajcht: “Daut es eene scheene Oabeit em Nootfaul uttohalpen. Von dan aus miene leewe Fru aun COVID-19 storf, haft mie dise Oppgow werkjlich Moot jemoakt. Soo bliew ekj drock un ekj weet, daut ekj fa dee waut doonen kaun, waut Help fält. Ekj hab daut selfst beläft, woo Jehova sien Vespräakjen helt, sien Volkj nich em Stäakj to loten.”

 Een Brooda, waut ea selfst en een Nootfaulkommitee metjeholpen haft, sajcht: “Nu es daut mol bat mie, Help to kjrieen. Wie kjrieejen nich bloos em tieteljen Help, de Breeda holpen miene Fru un mie uk, daut wie ons nich onneedich Sorjen muaken. Dee wieren om ons bekjemmat, dee treesten ons un spruaken ons Moot too.”

 Owwadasch un aundret schlemmet kjemt eenjemol gaunz onverhofs. Oba derch june friewelje Gowen fa daut Woakj oppe gaunze Welt es Jehova siene Organisazion daut foaken mäajlich, daut see bosich kjennen Sachen kjeepen un em Nootfaul doa utdeelen, wua daut fält. Woo eena Gowen jäwen kaun, jeit opp donate.pr418.com to seenen. Sea dankscheen, daut jie soo friejäwrich sent.