Aum Aunfank von daut niee Joa 2023 wensch wie ons aula daut baste fa ons un onse Famielje. Wuarom kjenn wie Hopninj haben?

 De Schreft haft eene goode Norecht: Dee lat ons weeten, daut de Trubbels, waut wie nu haben, nich woaren fa emma sennen un daut dee boolt woaren jeleest woaren. Un de Schreft es “jeschräwen, daut wie doarut lieren sullen, daut wie derch . . . dän Troost en de Schreft wudden Hopninj haben” (Reema 15:4, PB).

•   Wan du wurscht jleichen, mea doaräwa to lieren, waut de Schreft vesprakjt, dan läs dän Artikjel “Eine echte Hoffnung für die Zukunft”.

 De Schreft sajcht, daut de Hopninj soo es, aus eenen sechra “Anka fa onse Seel” ooda fa ons Läwen (Hebräa 6:19, PB). Dise Hopninj halpt ons, ruich to bliewen un met de Trubbels foadich to woaren, waut wie nu haben. Un dee halpt ons uk, daut wie kjennen eene goode Enstalunk haben un mootich un schaftich bliewen. Hia sent twee Biespels:

•   Woo holp de Hopninj ut de Schreft eenen Maun von sienen Lausta loostokomen? Kjikj daut Video “Mie äakjeld daut Läwen, waut ekj fieed”.

•   Woo kaun de Hopninj ut de Schreft ons halpen, wan doa wäa jestorwen es, waut wie väl jeräakjent haben? Kjikj daut Video Troost fa dee, waut truaren.

 Väl Menschen wenschen sikj, daut daut Joa 2023 goot utkomen saul, oba dee kjennen sikj nich secha sennen, daut daut woat. Bie daut, waut de Schreft vesprakjt, es daut gaunz aundasch. Wuarom? Wiels, waut de Schreft vesprakjt, kjemt von Jehova Gott a, “dee nich lieejen kaun” (Titus 1:2, PB). Bloos Jehova haft de Macht, aul daut to erfellen, waut hee vesproaken haft, wiels hee “deit aules waut Hee well” (Psalm 135:5-6, PB).

 Wäajen wie ons opp de Hopninj ut de Schreft veloten kjennen, rod wie die too, dienen Gloowen to stoakjen. Un daut kaust du doonen, wan du “aule Dach en de Schreft” forschen deist (Aposteljeschicht 17:11, PB). Proow daut mol selfst un studia de Bibel met eenen Bibelliera toop. Dan kaust du daut niee Joa 2023 met eene goode Enstalunk aunfangen.