Kaun de Schreft mie halpen, von Droggs loostokomen?
Jieda Joa stoawen millionende Menschen, wäajens dee von irjenteen Meddel aufhenjich sent, soo aus Droggs. En de Tiet von de COVID-19-Krankheit es daut mau rajcht noch oaja jeworden. De Schreft haft aul een deel Menschen jeholpen, von Droggs loostokomen. Wan du met soont jeploacht best, dan kaun de Rot ut de Schreft die halpen. a
Waut wie en disen Artikjel seenen woaren
Kaun de Bibel mie werkjlich halpen, wan ekj aufhenjich sie?
Forscha haben rutjefungen, daut Menschen foaken dan von Droggs aufhenjich woaren, wan dee sikj auleen feelen, wan dee äwafoddat sent, wan dee sikj Sorjen moaken ooda wan dee bedrekjt sent. De Schreft kaun die halpen, soonen stoakjen Gloowen to kjrieen, daut du met aul soone Loagen foadich woaren kaust. Un dee wiest die, woo du kaust een gooda Frint von Gott woaren (Jakobus 2:23). Met siene Help kaust du soone Trubbels derchstonen, waut met diene ieejne Krauft nich wudd mäajlich sennen (Markus 11:22-24).
Veatlei ut de Schreft, waut die halpen kaun, von Droggs loostokomen
1. Lia Jehova b Gott kjanen (Johanes 17:3). Hee haft aules jemoakt un siene Krauft woat nienich aula. Hee es mau rajcht dien leeftolja himlischa Voda. Hee well dien Frint sennen un hee well die biestonen (Jesaja 40:29-31; Jakobus 4:8). Jehova leeft die sea un hee haft eene wundascheene Hopninj reed fa aul dee, waut doa wellen siene Frind sennen (Jeremia 29:11; Johanes 3:16).
2. Froag Jehova no Help. Bäd to Gott un froag am no Help, daut du kaust von Droggs looskomen un een reinet Läwen fieren, waut Gott aunnämen kaun (Reema 12:1). Gott woat die derch sienen heiljen Jeist “butajeweenelje Krauft” jäwen (2. Korinta 4:7, NW; Lukas 11:13). Dise Krauft woat die halpen, opptohieren met Droggs brucken, un doaderch woascht du eene “niee Natua” kjrieen, waut met Gott sienen Wellen tooppaust (Kolossa 3:9-10, PB).
3. Proow, dolla soo to denkjen, aus Gott deit (Jesaja 55:9). Hee woat die halpen, daut du kaust em “denkjen wieda nie jemoakt woaren”. Daut bediet, du woascht aundasch aun Sachen naunkjikjen, un daut kaun die halpen, von Droggs loostokomen (Efeesa 4:23, NW). Daut es sea wichtich, pinkjlich enne Schreft to läsen, wiels doa finj wie Gott siene Jedanken (Psalm 1:1-3). Väle es daut togood jekomen, daut dee haben Help aunjenomen toom de Schreft bäta vestonen (Aposteljeschicht 8:30-31). Jehova siene Zeijen beeden aundre een Bibelstudium aun, waut emsonst es. Wie loden die uk en, no onse Toopkomes to komen, wua jewäsen woat, waut de Schreft sajcht un woo wie dee Lieren en ons Läwen nokomen kjennen.
4. Sieekj die goode Frind. Diene Frind kjennen väl aun die doonen, aus daut nu toom gooden ooda toom schlajchten es (Spricha 13:20). Mank Gott siene Deena woascht du goode Frind finjen, waut die doarenn unjastetten woaren, von Droggs loostokomen. Un Gott wenscht sikj, daut du soone Frind hautst (Psalm 119:63; Reema 1:12). Pauss uk opp, waut du die toom Tietvedrief aunhorchst, kjikjst ooda läst. Go aul soont utem Stich, waut die doavon aufhelt, daut rajchte to doonen (Psalm 101:3; Amos 5:14).
Bibelvarzhen, waut die halpen kjennen, von Droggs loostokomen
Psalm 27:10 (PB): “Wan mien Voda un miene Mutta mie uk veloten, de HAR woat sikj mie aunnämen.”
Wilby von Haiti sajcht: “Ekj hab mienen Voda kjeenmol kjanen jelieet. Doawäajen feeld ekj mie emma soo, daut doa waut en mien Läwen fäld. Oba aus ekj ieescht Jehova Gott kjanen lieed un lieed, daut hee opp iernst es, dan haud ekj eenen Senn em Läwen. Un doaderch kunn ekj von Droggs looskomen.”
Psalm 50:15 (PB): “Roop mie wan du en Noot kjemst. Ekj woa die raden”.
Serhiy von de Ukraine sajcht: “Dis Varsch haft mie emma wada de Krauft jejäft nich opptojäwen, wan ekj uk bieaun trigjfoll. Un Jehova haft sien Vespräakjen jehoolen.”
Spricha 3:5-6 (PB): “Velot die opp däm HARN met dien gaunzet Hoat, un velot die nich opp dien ieejnet Vestaunt. Denkj aun am en aules waut du deist, un hee woat die dän rajchten Wajch wiesen.”
Michele von Italien sajcht: “Dise Varzhen holpen mie, opp Jehova to vetruen un nich opp mie selfst. Met dee Krauft, waut hee mie jeef, kunn ekj mien Läwen gaunz endren.”
Jesaja 41:10 (PB): “Enjst die nich, wiels ekj sie met die; fercht die nich, wiels ekj sie dien Gott. Ekj woa die stoakj moaken, un die halpen, un met miene jerajchte rajchte Haunt woa ekj die hoolen un bewoaren.”
Andy von Sied-Afrika sajcht: “Wan ekj nich Droggs brucken kunn, wia ekj en groote Noot. Dis Varsch wees mie, daut Gott mie halpen wudd, miene Noot derchtostonen. Un hee deed uk.”
1. Korinta 15:33 (PB): “Lot junt nich aunschmäaren. Schlajchte Jesalschoft vedoaft goode Aunjewanheiten.”
Isaac von Kenia sajcht: “Schlajchte Frind brochten mie doatoo, Droggs to brucken un aufhenjich to woaren. Aus ekj ieescht opphieed, met dee Frind toop to sennen, kunn ekj uk met de Droggs opphieren. Un ekj socht mie goode Frind, waut soon reinet Läwen fieeden, aus ekj uk wull.”
2. Korinta 7:1 (PB): “Well wie ons nu von aules reinjen waut Kjarpa un Jeist besudelt”.
Rosa von Kolumbien sajcht: “Dis Varsch muak mie Moot, mie fa wieda auntostrenjen, om met Droggs un met soont opptohieren, waut mie bloos schoden deed.”
Filippa 4:13 (NW): “Fa aules sie ekj stoakj derch dän, dee mie de Krauft jeft.”
Patrizia von Italien sajcht: “Ekj wist, daut ekj auleen nich de Krauft haud, met Droggs opptohieren. Doawäajen fruach ekj Gott no Help. Hee jeef mie dee Krauft, waut mie fäld.”
Woo de Schreft eenje holp, von Droggs loostokomen
Joseph Ehrenbogen woss opp eene Städ opp, wua daut sea hunjsch toojinkj. Hee wort aufhenjich von Marihuana un aundre Droggs, uk von Stoakjet drinkjen un schmieekjen. Mieremol storf hee meist, wiels hee too väl Droggs jebrukt haud. Een Bibelvarsch holp am besonda to seenen, daut hee sikj endren kunn. Läs dän Artikjel “Ich lernte Frauen zu respektieren und mich selbst zu achten” toom seenen, waut hee beläft haft.
Dmitry Korshunov proowd foaken, met supen opptohieren. Kjikj daut Video “Mie äakjeld daut Läwen, waut ekj fieed” toom seenen, waut am holp, daut to volbrinjen.
Sajcht de Schreft daut auf, eenen Dokta no Help to froagen, wan eena aufhenjich es?
Nä. De Schreft sajcht je: “De jesunde brucken dän Dokta nich. Dän brucken mau de kranke” (Matäus 9:12, PB). Eenje Forscha en de Stäts sajen: “Von Droggs aufhenjich sennen es eene Krankheit. Daut es nich leicht to vestonen, woo daut oabeit, un jeweenlich kaun eena nich eefach doavon looskomen, bloos wäajen eena daut well ooda sikj sea aunstrenjt” (U.S. National Institute on Drug Abuse). Secha, Jehova kaun ons väl mea Krauft jäwen, aus wie selfst haben. Oba eenje, waut dän biblischen Rot nokjeemen, haft daut doawäajen noch aun de Help von eenen Dokta jefält, daut dee kunnen met Droggs brucken opphieren. c Biejlikj sajcht een Maun, waut Allen heet: “Aus ekj opphieed to supen, sad mie daut sea too. Ekj kjrieech je aul em jeisteljen Help, oba dan wort ekj en, daut mie uk de Help von eenen Dokta fälen deed.”
Sajcht de Schreft daut auf, Droggs aus Medizien to brucken?
Nä. De Bibel rät mau rajcht doavon, daut se Stoakjet brukten jäajen Krankheiten ooda om wäm siene Weedoag leichta to moaken, wan dee batem stoawen wia (Spricha 31:6; 1. Timotäus 5:23). Oba krakjt soo aus eena von Stoakjet leicht aufhenjich woaren kaun, kaun eena uk von Medizien sea leicht aufhenjich woaren, waut jäajen Weedoag jebrukt woat. Doawäajen mott eena väabedocht sennen, woo eena soone stoakje Medizien brukt (Spricha 22:3).
a Wan daut en disen Artikjel uk om Droggs jeit, kjennen dise Gruntsauzen ut de Schreft oba uk met aundre Trubbels halpen. Daut kaun soont sennen aus supen, schmieekjen, too väl ooda too weinich äten, opp Jelt spälen, schwiensche Bilda kjikjen ooda too väl em Internet hucken.
b Jehova, ooda Jahwe, es Gott sien Nomen (Amos 9:6, JHF). See dän Artikjel “Wäa es Jehova?”
c Soone Help kaun eena en veschiedne Hospitols finjen ooda opp soone Städen, waut uzhent doafäa sent. Oba jieda eena mott sikj daut selfst goot unjastonen un kjikjen, waut daut baste fa am sennen wudd (Spricha 14:15).
Veleicht jleichst du uk dit
DE WOAKTORM
Woo kjenn wie bäden, daut Gott no ons horcht?
Wie kjennen to irjenteene Tiet un opp irjenteene Städ bäden, endoont aus opp ludes ooda opp stelles. Jesus lieet ons mau rajcht, woo wie bäden kjennen.
WAUNTTOFEL-VIDEOS
Verieekja dien Läwen nich
Väle schmieekjen un aundre haben oppjehieet un eenje wellen sea jieren opphieren. Wuarom wellen dee daut? Es schmieekjen opp iernst soo schlajcht?
MEA ÄWA ONS
West du met ons räden?
Räd äwa eene biblische Froag ooda lia mea äwa Jehova siene Zeijen.
