Waut de huach aunjestalde Gloowesleidasch äwa dän Kjrich en de Ukraine sajen:

•   “De Väaschta von de rusche-orthodoxen Kjoakj, Patriarch Kirill, haft noch nuscht doajäajen jesajcht, waut Russlaunt deit. . . . Siene Kjoakj haft dän Tiet äwa faulsche Jeschichten vebreet äwa de Ukraine, un Putin haft dise Jeschichten jebrukt toom dän Kjrich rajchtfoadjen” (EUobserver, 7. Moaz 2022).

•   “De Patriarch Kirill . . . deit daut sea rajchtfoadjen, daut Russlaunt met Jewault en de Ukraine nenkjeem un hee sajcht, daut dis Kaumf es uk doatoo toom jäajen de Sind kjamfen” (AP News, 8. Moaz 2022).

•   “De Leida von de orthodoxen Kjoakj en de Ukraine, Metropolitan Epiphanius I. von Kiew, säajend aun Mondach siene Menschen un säd, see sullen jäajen de rusche Soldoten kjamfen . . .  Hee säd uk, daut rusche Soldoten dootmoaken nich eene Sind wia” (Jerusalem Post, 16. Moaz 2022).

•   De ukrainische Grupp von Kjoakjen un Gloowesorganisazionen (UCCRO) sajcht: “Wie unjastetten de Armee von de Ukraine un aul de Menschen, waut kjamfen toom ons Launt veteidjen. Wie säajnen daut, woo sea dee sikj aunstrenjen toom de Ukraine jäajen äare Fiend veteidjen un wie bäden fa dee” (UCCRO, a 24. Feebawoa 2022).

 Waut jleefst du? Sullen soone Gloowes, waut minkj Jesus Christus nofoljen, äare Menschen tooroden, nom Kjrich to gonen? Waut sajcht de Schreft doatoo?

Gloowes un Kjrich

 Von jeehäa es to seenen, daut de Gloowes aul foaken jesajcht haben, daut et nich orrajcht es, nom Kjrich to gonen ooda daut et mau rajcht goot ooda needich es. Un doabie doonen see sikj soo, daut see fa Fräd strieden. Jehova siene Zeijen haben aul fa Joaren de Menschen jeholpen to seenen, daut soone Gloowes Heichla sent. See mol eenje Biespels, waut en onse Bieekja un Artikjels sent.

•   De Artikjel “Die Kreuzzüge — Eine ‘tragische Illusion’” sajcht, daut de reemisch-katoolsche Kjoakj schuldich es fa väle grausom dootmoaken un daut en dän Nomen von Gott un Christus.

•   De Artikjel “Die katholische Kirche in Afrika” räd von een Biespel, woo de Gloowes daut nich väabieejen deeden, daut doa Kjrich manke Stam wia un dee hilden daut uk nich opp, wan se gaunze Velkja utroden wullen.

•   De Artikjels “Liegt die Schuld bei der Religion?”, “Die Rolle der Religion in den Kriegen der Menschheit” un “Die Religionen ergreifen Partei . . .” lajen daut ut, woo de Väaschte von de katoolsche, orthodoxen un protestantische Kjoakjen beid Sieden vom Kjrich unjastetten deeden.

Sullen de Christengloowes Kjrich unjastetten?

 Waut Jesus lieed: “Du saust dienen Noba jrod soo goot sennen aus die selfst” (Matäus 22:39, PB). “Siet june Fiend goot” (Matäus 5:44-47, PB).

 Waut Jesus säd: “Mien Kjennichrikj es nich von dise Welt. Wan mien Kjennichrikj von dise Welt wia, wudden miene Deena jekjamft haben, daut ekj … nich faust jenomen wort” (Johanes 18:36, PB). “Wäa daut Schwieet nemt, woat derch daut Schwieet omkomen” (Matäus 26:47-52, PB).

 Äwalaj mol: Wan Christen nich mol sullen kjamfen toom Jesus beschitzen, wudden dee dan sellen Jewäaren nämen fa irjenteene aundre Uasoak? Läs dän Artikjel “Verträgt sich Krieg mit dem Christentum?” toom seenen, woo de ieeschte Christen tru Jesus sien Biespel un siene Lieren nofoljden.

Waut woat met dee Gloowes passieren, waut Kjrich wellich unjastetten?

 De Schreft lieet, daut Gott soone Gloowes nich aunnemt, waut sajen, daut see en Jesus sienen Nomen haundlen, oba nich daut nokomen, waut Jesus lieed (Matäus 7:21-23; Titus 1:16).

•   Daut Bibelbuak Openboarunk wiest, daut Gott soone Gloowes veauntwuatlich helt fa dän Doot von dee, “dee oppe Ieed sent dootjemoakt worden” (Openboarunk 18:21, 24, PB). Wuarom daut soo es, kaust du en dän Artikjel “Wer oder was ist die Hure Babylon?” läsen.

•   Jesus jeef auntovestonen, daut aul de Gloowes, waut Gott nich aunnemt, wäajen dee äare schlajchte Woakjen woat venicht woaren. Krakjt soo aus een schlajchta Boom, waut schlajchte Frucht brinjt, “aufjehakt [woat] un em Fia jeschmäten” (Matäus 7:15-20, PB). Toom seenen, woo dit romkomen woat, läs dän Artikjel “Das Ende der falschen Religion ist nahe!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images