Doa wort jejleeft, daut ojjefäa 5 000 Millionen Menschen dän FIFA World Cup kjikjen wudden, wua Footbaul-Gruppen von veschiedne Lenda oppe Welt eena jäajen dän aundren spälen. Dit Footbaulspäl funk dän 20. Nowamba aun un woat dän 18. Dezamba 2022 derch sennen. Väle hopen, daut de Menschen sikj nich bloos veeent feelen, wan dee toop daut Baulspäl kjikjen, oba daut daut noch väl mea aun dee deit.

•   “Sport [biejlikj Baul spälen] haft de Macht de Welt to endren. Daut kaun eenem bat doa brinjen, daut eena waut doonen well. Daut kaun Menschen opp eene besondre Wajch veeenjen” (Nelson Mandela, waut mol Präsident wia von Sied-Afrika).

•   “Footbaul spälen veeenicht de Menschen, wiels daut jeft an Hopninj un Freid. Doaderch haft eena waut äwareen met aundre, eena well dee leewen un es gaunz oppjebrocht äwa de Sach” (Gianni Infantino, de Väaschta von de FIFA). a

 Kaun dit Footbaulspäl ooda irjenteen aundret Sport soont volbrinjen? Es doa irjenteene Hopninj fa Fräd un Eenichkjeit?

 Bie daut Footbaulspäl von dit Joa, jinkj daut fa de Menschen om mea, aus bloos om een Footbaulspäl. Derch daut Späl räden de Menschen äwa veschiedne Trubbels en de Welt un dee wieren sikj nich eenich äwa jewesse Rejierungssachen. Doa sent biejlikj de Menschenrajchten met en, ooda daut se jewesse Sorten Menschen ojjerajcht behaundlen ooda daut nich aule jlikjen väl haben.

 Wan daut uk soo es, jleichen väl Menschen oba fa scheengonen soone Sports to kjikjen, soo aus bie dit Footbaulspäl. Soont kaun nich werkjlich Eenichkjeit brinjen, waut doa blift, endoont woo sea Menschen sikj daut wenschen. Enne Städ daut, kjemt bie soone Späls dolla verendach, woo de Menschen denkjen un woo oneenich dee sikj sent. Daut es krakjt soo, aus de Schreft äwa “de latste Doag” sajcht (2. Timotäus 3:1-5, PB).

 De Schreft jeft ons Hopninj, daut doa oppe gaunze Welt woat Eenichkjeit sennen. Gott vesprakjt, daut aule Menschen oppe Ieed woaren veeent sennen wan de himlische Rejierunk von “Gott sien Rikj” rejieet (Lukas 4:43, PB; Matäus 6:10).

 De Kjennich von dise Rejierunk es Jesus Christus un hee woat doafäa sorjen, daut doa Fräd oppe gaunze Welt es. De Schreft sajcht:

•   “En siene Tiet woat de Jerajchtichkjeit blieejen, un aules woat frädlich sennen” (Psalm 72:7, PB).

•   “Hee woat de oame raden wan dee schrieen . . . Hee woat an von dee raden, dee an unjadrekjen un vejewaultjen [ooda waut aundoonen]” (Psalm 72:12, 14, PB).

 Jesus siene Lieren haben nu aul millionende Menschen von 239 Lenda veeenicht. Dee haben jelieet, aundre nich mea to haussen. Toom noch mea doaräwa lieren läs de Artikjels von dän Woaktorm met dän Tietel “Met dän Hauss een Enj moaken”.