De Väaschta von eene Organisazion, waut oame Lenda Jelt lieen deit (World Bank Group), säd en eenen Berecht von Juni 2022: “De Wirtschoft von de gaunze Welt es wada en Jefoa”. Hee säd uk: “Ditmol es daut, wäajen aules haustich diera woat un en deeselwje Tiet haben de Menschen weinja Jelt toom Sachen kjeepen.”

 Eene Organisazion, waut met de Wirtschoft äwa de gaunze Welt todoonen haft (International Monetary Fund), sajcht: “De Priesen von Gess un Ätwoa sent bosich noppjegonen un daut es besonda schlemm fa soone oame Lenda, wua de Menschen nich väl vedeenen.”

 De Schreft halpt ons to vestonen, wuarom daut soone Trubbels met daut Jelt jeft. Dee wiest ons uk, woo wie doamet kjennen omgonen un jeft ons de Hopninj, daut daut dise Trubbels boolt nich mea jäwen woat.

•    No de Schreft no läw wie nu en “de latste Doag” (2. Timotäus 3:1, PB).

•    Jesus säd, en dise Tiet wudd väl “schrakjeljet” passieren, aulsoo soont, waut eenem Angst un Sorjen moakt (Lukas 21:11, PB). Daut moakt eenem Angst, wan aules bloos noch diera woat. De Menschen moaken sikj Sorjen äwa woo daut lota noch sennen woat un aus dee woaren fa äare Famielje sorjen kjennen.

•    En daut Bibelbuak Openboarunk wort verutjesajcht, daut en de latste Tiet de Priesen von daut Ätwoa wudden noppgonen. “Ekj hieed . . . eene Stemm sajen: Weit fa een Dach fa een Doages Loon, ooda Joascht fa dree Doag fa een Doages Loon” (Openboarunk 6:6, PB).

 Wan du west mea lieren äwa “de latste Doag” un äwa de Profezeiunk von de Openboarunk, dan kjikj daut Video De Welt haft sikj von 1914 aun veendat un läs dän Artikjel “Die vier Reiter der Apokalypse: Wer sind sie?”.

•    “Dee woaren Hiesa buen un en dee wonen; see woaren Wiengoades aunplaunten un von de Frucht äten. Dee woaren nich buen un een aundra doabennen wonen; dee woaren nich aunplaunten un een aundra daut äten” (Jesaja 65:21-22, PB).

•    Doa woat “jenuach Jeträajd em Launt sennen, un de Boaj bat bowen dicht voll stonen” (Psalm 72:16, PB).

•    “Wiels de schwake unjadrekjt woaren un de oame stänen, woa ekj mie äwahäa moaken [ooda oppstonen], sajcht de HAR” (Psalm 12:6, PB).

 De Menschen motten soo väl ojjerajchtet beläwen wäajen aul dise Jelt-Trubbels. Oba Gott woat doamet boolt een Enj moaken, un nich bloos en een Launt oba oppe gaunze Welt. Wan du west weeten woo, dan läs dän Artikjel “Wirtschaftliche Ungerechtigkeit – ein Ende in Sicht?”.

 Oba de Schreft kaun ons nu aul halpen, doamet foadich to woaren, daut aules emma diera woat. Woo krakjt? Dee jeft ons gooden Rot doaräwa, woo wie kjennen met Jelt rajcht omgonen (Spricha 23:4-5; Liera 7:12). Wan du west mea doaräwa weeten, dan läs de Artikjels “Bewoa daut, waut du toom läwen brukst” un “Wie man mit weniger Geld auskommt”.