Aune 2022 wort fa aule Armeeen oppe Welt toop 2.24 Billionen (2,240,000,000,000) stätsche Dola utjejäft – mea aus noch kjeenmol ea. De jratste Uasoak fa dit wia, wäajen Russlaunt de Ukraine aunjejräpen haft. En Aprell 2023 säd daut en eenen Berecht von daut Stockholm International Peace Research Institute (SIPRI), waut aune 2022 aules passieet wia:

•   De Lenda en Europa “brukten daut Joa 13 Prozent mea Jelt fa dee äare Armeeen. Enne Tiet vonne 1991 sent de Utgowen, waut se en een Joa fa de Armee brukten, noch nienich soo sea noppjegonen.”

•   “Russlaunt . . . brukt 9.2 Prozent mea Jelt fa äare Armee. Doaderch kjeemen see en de List, wäa enne Welt daut mieeschte Jelt brukt fa de Armeeen, von dän feften Plauz no dän dredden Plauz nopp.”

•   Von aule Lenda brukt de Stäts noch emma daut mieeschte Jelt fa dee äare Armee. “Von aul daut Jelt, waut enne Welt fa de Armeeen jebrukt woat, brukt de Stäts auleen aul 39 Prozent.”

 De Utjelieeda Nan Tian, waut bie dän Berecht von daut Stockholm International Peace Research Institute methalpen deed, säd: “Daut oppe gaunze Welt enne latzte Joaren emma mea Jelt fa de Armeeen utjejäft woat, es een Tieekjen doafäa, daut onse Welt emma onsechra woat.”

 De Schreft säd aul verut, daut de majchtichste Rejierungen oppe Welt sikj wudden emma oneenja woaren, un dee sajcht ons uk, waut daut eensje es, waut doa woaren Fräd brinjen kaun.

•   De Schreft nant onse Tiet de latste Doag ooda de “Tiet, dee fa daut Enj jeplont es” (Daniel 8:19, PB).

•   Daut Bibelbuak Daniel säd fa dise Tiet verut, daut doa majchtje Rejierungen wudden “äare Macht . . . mäten” un doaropp strieden, majchtja to sennen aus de aundre. Doa wudd met en sennen, daut se doafäa “wieetvolle Sachen” brucken wudden, aulsoo een deel Jelt (Daniel 11:40, NW; 11:42-43, PB).

 Wan du mea äwa dise intressaunte Profezeiunk ut de Schreft lieren west, dan kjikj daut Video Profezeiungen waut sikj erfelt haben – Daniel Kapitel 11.

•   De Schreft sajcht, daut Gott siene Rejierunk woat rejieren enne Städ de Menschen äare. Dan “woat Gott em Himmel een eewjet Rikj oppstalen. Kjeena woat daut jeemols äwamajchtjen. Daut woat aule aundre Kjennichrikjs en Bieta bräakjen un venichten, oba woat selfst opp emma bliewen” (Daniel 2:44, PB).

•   Boolt woat Jehova a Gott daut doonen, waut de Menschen kjeenmol kunnen. Hee woat doano seenen, daut doa woara Fräd es un daut dee uk fa emma blift. Woo woat hee daut doonen? Derch sien Kjennichrikj woat hee met aulet Kjrichsjereetschoft un grausomet een Enj moaken (Psalm 46:9-10).

 Wan du mea doaräwa lieren west, waut Gott sien Kjennichrikj noch aules tostaund brinjen woat, dan läs dän Artikjel: “Unja Gott sien Kjennichrikj woat aules ‘frädlich sennen‘”.