Oppe gaunze Welt sajen väl Menschen, daut see Jesus Christus nofoljen, oba dee menjen sikj aulawäajen manke Politikj. Eenje proowen äare Glooweslieren ooda daut, waut see fa rajcht talen, doaderch bekaunttomoaken, daut see jewesse polietische Gruppen unjastetten ooda Menschen, waut sikj fa de Politikj aunjäwen. Un wan daut äwa een Vehoolen ooda eene Sach veschiedne Meenungen jeft, dan nutzen soone, waut met polietische Sachen to doonen haben, daut foaken ut, om Jemeenten opp äare Sied to kjrieen. Foaken doonen Gloowesleidasch sikj mau rajcht aunjäwen toom enne Rejierunk schaufen. Un en eenje Lenda kaun daut mau rajcht sennen, daut eene Jemeent, waut sikj christlich nant, aus de väaschta Gloowen von daut Launt jetalt woat.

 Waut jleefst du? Wudden Jesus Christus siene Nofolja sikj sellen enne Politikj mankmenjen? Du kaust de Auntwuat finjen, wan du no Jesus sien Väabilt kjikjst. Hee säd: “Ekj hab junt een Biespel jejäft, daut jie uk soo doonen, aus ekj” (Johanes 13:15, PB). Woo docht Jesus äwa de Politikj?

 Nä. Jesus deed sikj nich en de Rejierungssachen von de Welt mankmenjen.

 Jesus sträwd nich no Macht enne Politikj. Aus de Soton, de Beesa Fient, Jesus “aule Kjennichsrikjs un äare Pracht opp de Ieed” aunboot, säd Jesus daut auf, wiels hee nich wull een Leida von menschelje Rejierungen woaren (Matäus 4:8-10, PB). a Opp eene aundre Sauz proowden Menschen Jesus to bemotten, de Kjennich äwa an to woaren, wäajen see wisten, Jesus wudd een gooda Leida sennen. Oba de Schreft sajcht: “Aus Jesus enwort, daut de Menschen bat doa wieren, daut see am met Jewault wullen toom Kjennich moaken, veleet hee doa un jinkj fa sikj auleen opp eenen Boajch” (Johanes 6:15, PB). Jesus deed daut nich, waut de Menschen von am haben wullen. Hee wull nuscht met polietische Sachen to doonen haben.

 Jesus stald sikj en polietische Sachen opp kjeenem siene Sied. To Jesus siene Tiet jleichten de Juden daut biejlikj nuscht, daut see musten de Rejierunk von de Reema Taks tolen. Dee talden daut fa ojjerajcht. Aus see wullen weeten, waut Jesus siene Meenunk doaräwa wia, stald hee sikj oba opp kjeenem siene Sied. Hee streed sikj nich äwa soone polietische Sachen, aus daut rajcht wia, Taks to fodren ooda nich. Oba hee säd to an: “Jäft dän Kjeisa, waut am traft, un jäft Gott, waut sient es” (Markus 12:13-17, PB). Hee stald sikj en dise polietische Froag opp kjeenem siene Sied. Hee wees, daut wan de Kjeisa, de reemische Rejierunk, Taks velangd, dan wudd eena dän uk sellen betolen. Oba hee wees uk, daut daut Sachen jeft, waut eena nich doonen mott, wan de Rejierunk daut uk velangt. Eena wudd biejlikj nich sellen de Rejierunk opp soone Wajch ieren ooda deenen, waut bloos Gott traft (Matäus 4:10; 22:37-38).

 Jesus unjastett Gott sien Kjennichrikj, eene himlische Rejierunk (Lukas 4:43). Hee wist, daut Gott sien Kjennichrikj doafäa sorjen wudd, daut daut oppe Ieed soo sennen wudd, aus Gott daut haben wull (Matäus 6:10). Menschelje Rejierungen wudden daut nich doonen kjennen un doawäajen deed Jesus sikj nich en polietische Sachen mankmischen. Un am wia daut uk kloa, daut Gott nich wudd de Menschen äare Rejierungen brucken. Oba hee wudd dise Rejierungen oppriemen un dan wudd bloos Gott sien Kjennichrikj rejieren (Daniel 2:44).

 Nä. Jesus siene Nofolja kjeemen sien Jeboot no: See sullen “nich von dise Welt” sennen (Johanes 15:19, PB). Dee deeden daut krakjt soo aus hee un hauden nuscht met de weltelje Politikj to doonen (Johanes 17:16; 18:36). Enne Städ daut dee sikj manke Politikj mischten, kjeemen see daut no, waut Jesus an oppjejäft haud: See deeden von Gott sien Kjennichrikj prädjen un lieren (Matäus 28:18-20; Aposteljeschicht. 10:42).

 Fa de ieeschte Christen wia daut daut wichtichste, Gott to jehorchen. Oba dee wisten uk, daut see doawäajen musten de Rejierungen Respakjt wiesen (Aposteljeschicht 5:29; 1. Petrus 2:13, 17). Dee hilden sikj aun de Jesazen un betolden Taks (Reema 13:1, 7). See nuzten daut ut, waut de Rejierunk fa äare Menschen deed un see brukten uk de Jesazen toom äa Rajcht beschitzen; oba see deeden sikj nich enne Politikj mankmenjen (Aposteljeschicht. 25:10-11; Filippa 1:7).

 De Schreft wiest gaunz kloa, daut Jesus un siene ieeschte Nofolja sikj nich manke Politikj menjden. Krakjt doawäajen doonen Jehova siene Zeijen daut uk nich, wiels see Christen sent, endoont en woon Launt dee wonen. Un soo aus de ieeschte Christen, komen dee uk daut no, waut Jesus siene Nofolja oppjeef: Dee prädjen “daut Evangelium von Gott sien Rikj” (Matäus 24:14, PB).