Aum Sindach, dän 20. Nowamba 2022, wia een Toopkomen von de Veeende Nazionen (COP27 United Nations Climate Change Conference) to Enj, waut aufjehoolen wort, wäajen daut Wada sikj veendren deit. Dee sent sikj eenich jeworden, soone Lenda em tieteljen to halpen, waut nich kjennen met dän Schoden foadich woaren, waut daut Wada veuasoakt. Väle stunden oba too, daut dit dän werkjeljen Trubbel nich leesen woat.

•   De Hauptvewaulta von de Veeende Nazionen, António Guterres, säd dän 19. Nowamba 2022, daut hee daut fa eene goode Entscheidunk talt, waut Jelt tosied to lajen fa soone Lenda, waut haben Schoden jeläden wäajen daut Wada. Hee säd oba uk, daut daut en Werkjlichkjeit nich jenuach es, wäajen de Ieedbaul es doawäajen noch emma enne Jefoa, grooten Schoden to kjrieen.

•   Mary Robinson, waut ea de Präsident von Irlaunt wia un waut ea uk enne Offiz fa Menschenrajchten von de Veeende Nazionen schauft, säd dän 20. Nowamba 2022, daut daut met daut Wada enne Welt noch sea oajch woaren kaun.

 Besonda de junge Menschen sent besorcht, waut enne Tookunft sennen woat met de Ieed. Oba kjennen de Lenda toopschaufen un äa Vespräakjen nokomen, daut see waut doonen woaren, daut daut Wada sikj nich veendren deit? Waut sajcht de Schreft doaräwa?

 De Schreft sajcht daut dietlich, daut uk wan de Lenda woaren sea doaraun schaufen un sikj sea aunstrenjen, woaren see nich kjennen dän Trubbel met daut Wada gaunz fiksen. Unjasto die twee Jrind, wuarom daut soo es:

•   “Waut kromm es, kaun nich jlikj woaren” (Liera 1:15, PB).

   Waut daut bediet: De Rejierungen haben Jrensen un kjennen nich aules volbrinjen, waut dee wellen, wäajen de Menschen nich jemoakt sent toom sikj selfst rejieren (Jeremia 10:23, NW). Uk wan de Lenda sikj wudden toopstonen, dee sent nich fäich toom de Trubbels von de Welt leesen, krakjt endoont woo sea dee wudden proowen.

•   “Menschen woaren väl von sikj selfst hoolen, nom Jelt hinjaraun sennen, sikj . . . nich veseenen loten”, ooda nich reed sennen, sikj to eenjen (2. Timotäus 3:2-3, PB).

   Waut daut bediet: De Bibel säd krakjt verut, daut de Menschen en onse Tiet woaren nosikj sennen un nich wellens sennen, met aundre tooptoschaufen, endoont aus daut fa de Mierheit wudd toom gooden sennen.

 De Tookunft von de Ieed henjt nich doavon auf, waut menschelje Rejierungen vespräakjen. Gott haft Jesus Christus aus Harscha äwa de Ieed aunjestalt, un Jesus es fäich äwa dee to rejieren. De Schreft sajcht äwa am:

•   “Hee haft daut Rajcht to rejieren. Hee woat de wundaboara Rotjäwa, de majchtja Gott, de eewja Voda, un de Frädensprins jenant woaren.” (Jesaja 9:5, PB).

 Jesus es de Kjennich von Gott sien Kjennichrikj, ooda himlische Rejierunk (Matäus 6:10). Hee haft de Macht, de Weisheit un daut Velangen, sikj om de Ieed to kjemren un om dee, waut oppe Ieed wonen (Psalm 72:12, 16). Dise himlische Rejierunk, woat dee opphoolen, dee de Ieed vedoawen, un woat dän Schoden en de Natua wada gaunz fiksen (Openboarunk 11:18; Jesaja 35:1, 7).

 Wan du mea doaräwa weeten west, woo de Trubbel met daut Wada werkjlich jefikst woat, dan läs dän Artikjel “Der Klimawandel und unsere Zukunft – was die Bibel sagt”.