BLIEFT WIEDA WAKA!

Russlaunt kjemt met Jewault en de Ukraine nenn

AUFSPÄLEN

Tiedich zemorjes, dän 24. Feebawoa 2022, kjeemen doa rusche Soldoten met Jewault en de Ukraine nenn, wan de Väaschte von väl Lenda daut uk proowden väatobieejen, daut et nich sull Kjrich jäwen. Waut kunn dis Kjrich enne Welt aunrechten? De Väaschta von de Veeende Nazionen (UNO), António Guterres, säd een poa Doag trigj: “Wie kjennen ons daut nich mol denkjen, woo väl Lieden dit woat veuasoaken, un woo väl dis Kjrich woat venichten un woo dee woat de Sechaheit von Europa un von de gaunze Welt wajchnämen.”

Waut bediet daut no de Schreft no, daut doa soont passieet?

Jesus Christus säd eene Tiet verut, wua doa “een Volkj woat jäajen daut aundre oppstonen, un een Kjennichrikj jäajen daut aundre” (Matäus 24:7, PB). Läs dän Artikjel “Waut es daut Tieekjen von ‘de latste Doag’ ooda daut Enj von de Welt?” toom seenen, woo de Schreft wiest, daut Jesus siene Wieed äwa Kjrich sikj nu erfellen.
Daut Bibelbuak Openboarunk rät von eenen Ritta opp “een fiaroodet Pieet”, waut Kjrich väastalt, un dee “dän Fräd von de Ieed [wajchnemt]” (Openboarunk 6:4, PB). Läs dän Artikjel “Die vier Reiter der Apokalypse: Wer sind sie?” toom seenen, waut dise Profezeiunk met dän Kjrich vondoag dän Dach to doonen haft.
Daut Buak Daniel säd verut, daut doa wudd Oneenichkjeit sennen tweschen dän “Kjennich vom Nuaden” un dän “Kjennich vom Sieden” (Daniel 11:25-45, PB). Kjikj daut Video Profezeiungen waut sikj erfelt haben – Daniel Kapitel 11. Doa kaust du seenen, wuarom eena kaun sajen, daut Russlaunt un siene Poatna de Kjennich vom Nuaden sent. a
De Openboarunk rät uk von dän Kjrich von “dän aulmajchtjen Gott sien grooten Dach” (Openboarunk 16:14, 16, PB). Oba dee Kjrich es nich tweschen Lenda soo aus dee, waut et nu jeft. Läs dän Artikjel “Waut es de Kjrich von Harmagedon?” toom mea utfinjen, waut doa noch passieren woat.

Wuarom weet wie neiw, daut doa woat eene bätre Tiet komen?

De Schreft sajcht, Gott woat “en aule Welt met aulem Kjrich een Enj” moaken (Psalm 46:10, PB). Läs dän Artikjel “Eine echte Hoffnung für die Zukunft”, un doa woascht du mea doaräwa lieren kjennen, waut Gott fa lota vesproaken haft.
Jesus lieed siene Nofolja, daut dee sullen bäden, daut Gott sien Kjennichrikj sull komen (Matäus 6:9-10). Dit Kjennichrikj es eene himlische Rejierunk un daut woat Gott sienen Wellen oppe Ieed utfieren, un doa es met en, daut doa woat oppe gaunze Welt Fräd sennen. Wan du weeten west, woo väl goodet dit Kjennichrikj fa die doonen kaun, dan kjikj daut Video Waut es Gott sien Kjennichrikj?

Daut jeft äwa 129 000 Jehova siene Zeijen en de Ukraine. Krakjt soo aus Jehova siene Zeijen en aundre Lenda nämen dee sikj Jesus toom Väabilt un hoolen sikj von de Politikj (ooda de Rejierungssachen) oppoat un gonen nich toom Kjrich (Johanes 18:36). Jehova siene Zeijen moaken wieda oppe gaunze Welt daut “Evangelium von Gott sien Rikj” bekaunt un sajen, daut bloos Gott sien Rikj met aule Trubbels oppe Welt woat een Enj moaken, wua uk Kjrich met en es (Matäus 24:14, PB). Du kaust wellich met ons räden toom mea äwa de Hopninj lieren, waut de Schreft ons jeft.

a Wan du die dise Profezeiunk noch krakjta unjastonen west, dan see de Artikjels “‘De Kjennich vom Nuaden’ en de Enjtiet” un “Wäa es vondoag dän Dach ‘de Kjennich vom Nuaden’?”