Em Juli 2022 wieren oppe gaunze Welt väle schlemme Scheetarieen:

•   “Shinzo Abe, waut ea de bekauntsta Väaschta en de Rejierunk en Jaupaun wia, wort dootjeschoten. Daut oajad de Menschen em Launt, un de gaunze Welt wia veschrocken, wiels Jaupaun doafäa bekaunt es, daut doa nich väl soon schlemmet passieet. Un en Jaupaun sent de Jesazen uk sea strenj äwa eene Flint haben” (The Japan Times, 10. Juli 2022).

•   “En Dänemark schoot een Maun dree Menschen doot, aus dee en een grootet Stua en de Staut Kopenhagen wieren” (Reuters, 4. Juli 2022).

•   “En Sied-Afrika storwen 15 Menschen, wiels eene Grupp Mana en een Suphus en Soweto romschooten” (The Guardian, 10. Juli 2022).

•   “Aun een Utgangswäakj vom 4. Juli storwen en de Stäts mea aus 220 Menschen derch Scheetarieen, aus dee eenen Heljedach fieeden” (CBS News, 5. Juli 2022).

 Woat daut met soon schlajchtet noch mol een Enj nämen? Waut sajcht de Schreft doaräwa?

 De Bibel sajcht, daut de Tiet en dee wie nu läwen “de latste Doag” sent, wua de Menschen Jewault eewen un grausom sent (2. Timotäus 3:1, 3, PB). De Menschen läwen en Angst wäajen soone Jewault (Lukas 21:11). De Bibel vesprakjt ons, daut de Tiet kjemt, wua daut kjeene Jewault mea jäwen woat. Daut sajcht: “Mien Volkj woat en een rujet Launt wonen . . . See woaren onvestieet un tofräd sennen” (Jesaja 32:18, PB). Woo woat daut met de Jewault een Enj nämen?

 Gott woat de schlajchte Menschen un de Jewäaren oppriemen.

•   “De Jesazloose woaren ut däm Launt utjerot” (Spricha 2:22, JHF).

•   “[Gott,] dee en aule Welt met aulem Kjrich een Enj moakt; dee de Boages tweibrakjt un de Spiessen tweischleit un de Kjrichswoages met Fia vebrent” (Psalm 46:10, PB).

 Gott woat daut wajchnämen, waut to Jewault fieet, doaderch daut hee de Menschen lieet, en Fräd to läwen.

•    “Doa woat kjeen Schoden ooda vedoawen opp mien gaunzen heiljen Boajch sennen; un soo aus Wota daut gaunze Mäa bedakjt, soo woat en daut gaunze Launt Vestentnis fa däm HARN sennen” (Jesaja 11:9, PB).

•    Gott lieet nu aul de Menschen oppe gaunze Welt, Jewault un Jewäaren gaunz tochtoloten, un daut dee “von äare Schwieed . . . Pluach Schoaren moaken, un von äare Spiessen . . . Säakjel moaken” (Micha 4:3, PB).

 Wan du mea doaräwa weeten west, waut de Bibel äwa eene Welt onen Angst vesprakjt, dan läs dän Artikjel “Frei von Angst — Ist das möglich?”

 Wan du mea doaräwa weeten west, woo daut met de Jewault noch mol woat een Enj nämen, dan läs dän Artikjel “Endlich Frieden auf der Erde!”