Oppe gaunze Welt motten väl Menschen met butajeweenlich schlemme Äwaschwamungen foadich woaren. Hia sent bloos een poa Biespels:

•   “En de Hauptstaut von China räajend daut en de latste poa Doag grulich sea. Soo sea haud daut en de latste 140 Joa nich jeräajent. . . . Von Sinowent bat Medwäakj räajend daut 29.3 Zoll” (AP News, 2. August 2023).

•   “Donnadach wia aul de tweeda Dach, daut de Uarkaun Khanun sea väl Räajen brocht, un daut wia uk grulich sea windich em Sieden von Jaupaun, wuaderch oppet weinichste twee Menschen todood kjeemen. . . . Se sajen, daut et wäajen dän Storm bat 0.6 Meeta (2 Schoo) Räajen jäwen kunn enne Boaj en de Medd von Taiwan” (Deutsche Welle, 3. August 2023).

•   “Utgangswäakj jeef daut groote Äwaschwamungen [en Nova Scotia], wäajen daut soo schrakjlich sea räajnen deed en dee Jäajent en Kanada, waut bie daut Atlantik-Mäa es. Daut haud doa fa 50 Joa nich soo sea jeräajent” (BBC News, 24. Juli 2023).

 Waut sajcht de Schreft doaräwa?

 De Schreft nant de Tiet, en dee wie läwen, “de latste Doag” (2. Timotäus 3:1, PB). Jesus säd fa dise Tiet verut, daut doa wudd “schrakjeljet . . . to seenen sennen”, aulsoo daut doa schlemmet passieren wudd (Lukas 21:11, PB). Wäajen daut Wada sikj soo sea endat, jeit daut nich mea soo leicht veruttosajen un daut jeft foakna Owwadasch un dee sent uk väl oaja.

 Aul daut Schlemme, waut de Schreft fa onse Tiet verutsäd, jeft ons en Werkjlichkjeit Uasoak fa Hopninj. Wuarom kjenn wie daut sajen? Wäajen Jesus säd: “Wan jie dit aula passieren seenen, räakjent doamet, daut daut Gottesrikj dicht bie es” (Lukas 21:31, PB; Matäus 24:3).

 Aul daut, waut wie nu seenen, wiest, daut Gott sien Kjennichrikj boolt de Natua gaunz unja Kontroll brinjen woat – uk dän Räajen un daut Wada (Hiob 36:27-28; Psalm 107:29).

 Wan du mea doaräwa weeten west, woo Gott sien Kjennichrikj de Ieed wada fiksen woat, kaust du dän Artikjel “Wer wird unseren Planeten retten?” läsen.