“Met daut Wada woat daut emma schlemma woaren. Groote Städa woaren unja Wota sennen. Doa woat groote Hett sennen soo aus kjeenmol ea. Doa woaren butajeweenlich stoakje Storms sennen. Opp väl Städen woat daut Wota knaup sennen. Millionende Sorten Plaunten un Tieren woat daut nich mea jäwen. Aul dit es nich waut utjedochtet ooda äwadräwnet. Soo woat daut no de Wissenschoftla no utkomen, wan de Rejierungen daut Brennstoff oppe Welt wieda soo brucken aus bat nu.” (Dit säd António Guterres, de Hauptvewaulta von de Veeende Nazionen, en eene Räd äwa dän Berecht von de Intergovernmental Panel on Climate Change, waut dän 4. Aprell 2022 rutkjeem.)

 “De Wissenschoftla woarnen, daut daut wäajen dän Wadawakjsel en de komende Joaren en meist aule 423 Nazional-Parks [en de Stäts] to grooten Schoden komen woat. Daut es, wiels de Natua en dise Parks daut nich vedroagen kaun, wan daut Wada emma woama woat. Wan eena wudd eene List moaken von aul de Sachen, waut doa passieren kjennen, dan hieet sikj daut een bät soo, aus wan daut von de Schreft kjemt: Wooltfia un Äwaschwamungen, daut daut Ies en de kolde Jäajenden wieda schmelten woat, daut daut Mäawota hecha komen woat un daut daut Wada emma heeta woat” (“Flooding Chaos in Yellowstone, a Sign of Crises to Come,” The New York Times, 15. Juni 2022).

 Kjennen aul de Trubbels enne Natua jefikst woaren? Wan jo, wäa woat daut dan doonen? Hia kaust du rutfinjen, waut de Schreft doatoo sajcht.

 De Schreft sajcht, daut fa Gott de Tiet komen woat, dee “omtobrinjen, dee de Ieed vedorwen haben”(Openboarunk 11:18, PB). Von disen Varsch kjenn wie ons dreeatlei rutnämen:

1.  1. Waut de Menschen doonen, woat grooten Schoden veuasoaken enne Natua.

2.  2. Daut de Menschen de Ieed vedoawen ooda schoden, woat gaunz secha een Enj haben.

3.  3. Gott woat de Trubbels enne Natua fiksen; daut woaren nich de Menschen doonen.

 De Schreft sajcht “de Ieed blift emma stonen” (Liera 1:4, PB). Daut woat emma Menschen oppe Ieed jäwen.

•   “De jerajchte woaren daut Launt oawen un eewich doabennen bliewen” (Psalm 37:29, PB).

 De Schoden enne Natua woat gaunz oppjefikst woaren un aules woat wada fein schaufen.

•   “De Wiltnis un daut Drieechlaunt woaren sikj freien; daut drieeje Ollaunt [ooda de Wiltnis] woat jlekjlich sennen un met Bloomen dachen” (Jesaja 35:1, PB).