Dän 24. Mei 2022 passieed waut grulich sea schlemmet en de kjliene Staut Uvalde en Texas en de Stäts. No de Post The New York Times no deed “een Maun 19 Kjinja un twee Liera dootscheeten. . . bie de Robb Elementary School.”

 Daut es sea truarich, daut soone schlemme Sachen foaken passieren. Mau auleen enne Stäts, heet daut en USA Today, “wieren doa tojoa 249 Scheetarieen en Schoolen jewast. Soo väl haft daut lang nich jejäft, oppet weinichste von daut Joa 1970 aun.”

 Wuarom passieet soon schlemmet? Woo kjenn wie met soont foadich woaren? Woat daut met Jewault un Vebräakjen noch mol een Enj haben? Wie kjennen en de Schreft de Auntwuaten finjen.

•    De Schreft nant onse Tiet de “latste Doag”. Dee sajcht, väl Menschen “woaren sikj nich goot sennen” un dee woaren “onbandich” sennen un väl beeset un grausomet doonen. Un daut sajcht, daut woat “je lenja, je schlemma” woaren met de schlajchte Menschen (2. Timotäus 3:1-5, 13, PB). Toom mea doaräwa lieren, läs dän Artikjel “Steht in der Bibel, wie die Menschen heute denken und handeln würden?”.

 Veleicht jrebbelst du uk: “Wuarom deit Gott nuscht doajäajen, daut soone schlemme Sachen aus Scheetarieen en Schoolen passieren?” Wan du west weeten, waut de Schreft doaräwa sajcht, läs dän Artikjel “Es trifft auch die Guten: Warum?”.

•   “Wautemma verhäa jeschräwen wia, wia jeschräwen, daut wie doarut lieren sullen, daut wie derch . . . dän Troost en de Schreft wudden Hopninj haben” (Reema 15:4, PB).

 De Schreft jeft gooden Rot, waut die halpen kaun, met aul daut grausome enne Welt foadich to woaren. See doatoo daut Erwachet! met daut Teema “Angst vor Gewalt: Wie lange noch?”.

 En dän Artikjel “Kinder und beunruhigende Nachrichten” kjennen Elren Rot finjen doaräwa, woo dee äare Kjinja kjennen halpen, met aul de schlemme Norechten foadich to woaren.

•   “Hee woat an von dee raden, dee an unjadrekjen” un Jewault aundoonen (Psalm 72:14, PB).

•   “Von äare Schwieed woaren see Pluach Schoaren moaken, un von äare Spiessen woaren see Säakjel moaken. Kjeen Launt woat jäajen daut näakjste daut Schwieet opphäwen, un see woaren nich jäajen eenaunda Kjrich plonen” (Micha 4:3, PB).

 Gott woat daut doonen, waut fa de Menschen ommäajlich es. Sien himlischet Kjennichrikj woat met aule Jewault un Vebräakjen een Enj moaken un daut woat uk aule Jewäaren venichten. Wan du west mea lieren, äwa waut Gott sien Kjennichrikj aules volbrinjen woat, läs dän Artikjel “Unja Gott sien Kjennichrikj woat aules ‘frädlich sennen’”.